នាវាផ្ទុកយន្តហោះចម្បាំងបារាំង ត្រលប់ចូលផែវិញ ក្រោយសង្ស័យមាននាវិកឆ្លងកូវីដ១៩
នាវាផ្ទុកយន្តហោះចម្បាំងរបស់បារាំង កំពុងបន្ថែមល្បឿន ត្រលប់ចូលផែវិញ មុនការកំណត់ បន្ទាប់ពីមានការសង្ស័យថា មាននាវិកជាច្រើននាក់ ឆ្លងមេរោគកូវីដ១៩។ យោងតាមក្រសួងកងទ័ពបារាំង ការបញ្ជារឲ្យនាវាផ្ទុកយន្តហោះចម្បាំង ត្រលប់មកវិញ គឺជាវិធានការបង្កា ការពារសុខភាពកងកម្លាំងទាហានទាំងអស់ ដែលនៅលើនាវា បើទោះបីជានៅលើនាវានោះ មានសម្ភាៈនិងក្រុមគ្រូពេទ្យជំនាញ គ្រាប់គ្រាន់ក្តី។
ចុះផ្សាយនៅថ្ងៃ៖
ស្តាប់ - ០២:០៤
នាវាផ្ទុកយន្តហោះចម្បាំងរបស់បារាំង ឈ្មោះ Charles De Gaulle ដែលបច្ចុប្បន្នកំពុងស្ថិតនៅក្នុងមហាសមុទ្រអាត្លង់ទិក បានបន្ថែមល្បឿនបើកត្រលប់មកកំពង់ផែក្រុងទូឡុង ភាគខាងត្បូងប្រទេសបារាំងវិញ ឲ្យបានមុនការកំណត់ ប្រមាណជា២សប្តាហ៍។ អ្នកនាំពាក្យអគ្គបញ្ជាការកងទ័ពបារាំង បានឲ្យដឹងថា នៅលើនាវា មាននាយទាហានជាច្រើននាក់ ដែលមានអាការៈជំងឺ គួរឲ្យសង្ស័យ ថាពួកគេអាចផ្ទុកមេរោគកូវីដ១៩។
បច្ចុប្បន្ន នាយទាហាន ដែលមានអាការៈជំងឺ ត្រូវដាក់ឲ្យនៅដាច់ដោយឡែក នៅលើនាវា ដោយពុំមាននរណា មានស្ថានភាពធ្ងន់ធ្ងរ គួរឲ្យបារម្ភឡើយ។ ក្រសួងកងទ័ពបារាំង បានបញ្ជាក់ នៅព្រឹកថ្ងៃទី៨មេសា ថាគេបានបញ្ជូនក្រុមអ្នកជំនាញ ទៅលើនាវា ដើម្បីធ្វើតេស្តស្វែងរកមេរោគ។
បើតាមប្រភពពីក្រសួងកងទ័ពបារាំង នាវា Charles De Gaulle មានផ្ទុកទាហានសរុបចំនួន១៧៦០នាក់ ដែលមានអាយុជាមធ្យម៣០ឆ្នាំ។ នៅរវាងពាក់កណ្តាលខែមីនា នាវានេះ បានចូលចតសម្រាកនៅកំពង់ផែទីក្រុងប្រេសត៍ ភាគខាងលិចបង្អស់នៃប្រទេសបារាំង បន្ទាប់ពីបានបញ្ចប់បេសកកម្មរួម ជាមួយកងទ័ពជើងទឹកហូឡង់ ដាណឺម៉ាក និងស៊ុយអែត។ អគ្គបញ្ជាការកងទ័ពបារាំង សង្ស័យថានាយទាហាន អាចប្រហែលជាបានឆ្លងមេរោគកូវីដ១៩ នៅក្នុងពេលចូលចតសម្រាកនៅទីក្រុងប្រេសត៍ ព្រោះរោគសញ្ញាបានចេញមកប្រមាណ៣សប្តាហ៍ក្រោយ។
សូមបញ្ជាក់ថា នាវាផ្ទុកយន្តហោះចម្បាំងបារាំង មានបំពាក់ដោយប្រព័ន្ធសុវត្ថិភាព និង សុខាភិបាល ដ៏ទំនើបបំផុត។ តែទោះជាយ៉ាងណា ក្រសួងកងទ័ពបារាំង បានជ្រើសយកវិធានការបង្កាទុកមុន ដោយតម្រូវឲ្យនាវាបើកចូលផែវិញ ឲ្យបានឆាប់បំផុត។ អ្នកនាំពាក្យក្រសួងបានអះអាងថា បើសិនជាមុនពេលនាវាបើកមកដល់កំពង់ផែក្រុងទូឡុង ហើយមាននាយទាហានអ្នកម្នាក់មានអាការៈជំងឺធ្ងន់ធ្ងរ នោះគេអាចបញ្ជូនយន្តហោះទៅដឹកយកនាយទាហាននោះមកព្យាបាលបន្ទាន់។
គួររំលឹកដែរថា នាវាផ្ទុកយន្តហោះចម្បាំងអាេមរិក Theodore Roosevelt ក៏មានករណីនាយទាហានជាង១០០នាក់ ឆ្លងមេរោគកូវីដ១៩ ដែរ បន្ទាប់ពីបានចូលចតនៅកំពង់ផែក្រុងដាណាង កាលពីដើមខែមីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ