ពិភពលោកកំពុងខ្វះ ម៉ាស៊ីនជំនួយការដកដង្ហើម ដែលចាំបាច់ដើម្បីសង្រ្គោះអ្នកជម្ងឺកូវីដ១៩
ប្រឈមនឹងអ្នកជំងឺកូវីដ១៩ ដែលមានស្ថានភាពធ្ងន់ធ្ងរកាន់តែច្រើនឡើង បញ្ហាខ្វះសម្ភារៈពេទ្យ ក្នុងការជួយសង្រ្គោះជីវិត បានចោទឡើង នៅតាមមន្ទីរពេទ្យទាំងអស់។ ឧបករណ៍ដែលចាំបាច់បំផុត ក្នុងការជួយសង្រ្គោះជីវិតអ្នកជំងឺកូវីដ១៩នោះ គឺឧបករណ៍ជំនួយការដកដ្ហើម។ ប្រឈមនឹងការខ្វះខាតនេះ មានក្រុមគ្រូពេទ្យអ៊ីតាលីខ្លះ បានយកបំពង់អ៊ុកស៊ីសែនមុជទឹកបាតសមុទ្រ យកមកឆ្នៃ ប្រើប្រាស់ដើម្បីជួយអ្នកជំងឺកូវីដ១៩។ គំនិតនេះ ត្រូវបានក្រុមគ្រូពេទ្យនៅប្រទេសបែលហ្ស៊ុិក យកទៅធ្វើតាមដែរ។
ចុះផ្សាយនៅថ្ងៃ៖ កែប្រែថ្ងៃទី៖
អង្គការសុខភាពពិភពលោក បានតម្រូវឲ្យគ្រប់ប្រទេសទាំងអស់ ត្រូវបំពាក់ម៉ាស៊ីនជំនួយដកដង្ហើម ឲ្យបានច្រើនបំផុត ដើម្បីជួយសង្រ្គោះអ្នកជំងឺកូវីដ១៩។ ក៏ប៉ុន្តែ សម្រាប់ពេលនេះ សហគ្រាសផលិតម៉ាស៊ីន និងឧបករណ៍ទាំងនេះ បើទោះបីជាប្រឹងប្រឹងធ្វើការទាំងថ្ងៃទាំងយប់ ក៏នៅតែមិនអាចផលិតម៉ាស៊ីនជំនួយដកដង្ហើម បានទាន់ គ្រប់គ្រាន់តាមតម្រូវការដែរ។
ប្រឈមនឹងកង្វះខាតនេះ ក្រុមគ្រូពេទ្យមួយចំនួន បានសាកល្បង យកម៉ាសនិងបំពង់អ៊ុកស៊ីសែនដែលប្រើសម្រាប់ការមុជទឹកបាតសមុទ្រ មកឆ្នៃដើម្បីធ្វើជាបំពង់ជំនួយការដកដង្ហើម របស់អ្នកជំងឺកូវីដ១៩ ដែលមានស្ថានភាពធ្ងន់ធ្ងរ។ ម៉ាសនិងបំពង់ពាក់មុជទឹកបាតសមុទ្រនេះ មិនខ្វះទេ។ ក្រុមហ៊ុន Decathlon ដែលលក់ផលិតផលនេះ បានអះអាងថាខ្លួន មាននៅក្នុងស្តុក ចំនួន១សែនសម្រាប់ ហើយអាចបញ្ជូនចេញបំពេញតម្រូវការរបស់មន្ទីរពេទ្យ បើសិនជាត្រូវការ។
តែយ៉ាងណា គេត្រូវការយកបំពង់និងម៉ាសប្រើសម្រាប់មុជទឹកបាតសមុទ្រទាំងនោះ ទៅកែឆ្នៃឲ្យបានត្រឹមត្រូវ ដើម្បីអាចប្រើវាបាននៅតាមមន្ទីរពេទ្យ។ ក្រុមគ្រូពេទ្យអ៊ីតាលី ដឹកនាំដោយលោកវិជ្ជបណ្ឌិត Renato Favero បានកែច្នៃវាបានសម្រេច។ លោកវិជ្ជបណ្ឌិតរូបនេះ បានថែមទាំងទាក់ទងទៅក្រុមហ៊ុនឈ្មោះ Isinnova ដែលជាអ្នកជំនាញផលិតសម្ភារៈពេទ្យ ដើម្បីឲ្យក្រុមហ៊ុននេះ ផលិតនូវផ្នែកដែលខ្វះ និងចាំបាច់ ក្នុងការតភ្ជាប់ម៉ាសមុជទឹកបាតសមុទ្រ ទៅនឹងបំពង់ជំនួយដង្ហើម។
គំនិតច្នៃប្រឌិតនេះ ត្រូវបានគេយកគំរូតាម នៅឯប្រទេសប៊ែលហ្សិុកដែរ។ មន្ទីរពេទ្យ Erasme នៅទីក្រុងព្រុចសែល ទើបតែសម្រេចបាន នូវឧបករណ៍គម្រូមួយ ឆ្នៃចេញពីម៉ាសពាក់មុជទឹកបាតសមុទ្រ តភ្ជាប់ដោយបំពង់ជាមួយនិងម៉ាស៊ីន ដែលផលិតជាខ្យល់ដង្ហើម។ ធ្វើបែបនេះ អ្នកជម្ងឺអាចដកដង្ហើមបានងាយស្រួល ដោយមិនចាំបាច់ដាក់បញ្ចូលបំពង់បង្ហូរខ្យល់ ទៅតាមបំពងករបស់អ្នកជម្ងឺ។
អ៊ីស្រាអែល ក៏កំពុងតែចាប់អារម្មណ៍ ស្វែងរកមធ្យោបាយ ដើម្បីបំពាក់ឧបករណ៍ជួយដកដង្ហើម នៅតាមមន្ទីរពេទ្យខ្លួនដែរ។ បច្ចុប្បន្ននេះ នៅអ៊ីស្រាអែល មានឧបករណ៍ជំនួយដកដង្ហើម តែ២៨០០គ្រឿងប៉ុណ្ណោះ នេះបើយើងតាមតួលេខរបស់ក្រសួងសុខាភិបាល។ ក្រុមហ៊ុនបច្ចេកវិទ្យាអាវុធដ៏ធំ របស់អ៊ីស្រាអែល ឈ្មោះ Rafael កំពុងតែរិះរកវិធី ផលិតឧបករណ៍ជំនួយការដកដង្ហើម ក្នុងតម្លៃថោក ដោយសហការជាមួយអ្នកជំនាញផលិតសព្វាវុធ របស់អ៊ីស្រាអែល។
លោក Erel Margalit អគ្គនាយកក្រុមហ៊ុន Cybertechnologie JVP ដែលផលិតបំពង់ជំនួយការដកដង្ហើម បានលើកឡើងថា ក្នុងកាលៈទេសៈនេះ ក្រុមហ៊ុនទាំងអស់ត្រូវតែចូលរួមជួយរដ្ឋាភិបាល ព្រោះរដ្ឋាភិបាលតែម្នាក់ មិនអាចប្រយុទ្ធឈ្នះមេរោគនេះទេ។ យុទ្ធសាស្ត្រដែលប្រទេសមួយធ្វើ ហើយបានជោគជ័យ គឺត្រូវតែអនុវត្តបន្ត នៅតាមប្រទេសផ្សេង តាមរយៈការបញ្ជូនដំណឹងឲ្យគ្នា ឲ្យបានឆាប់បំផុត។
ប្រឈមនឹងចំនួនអ្នកឆ្លងកូវីដ១៩ច្រើនលើសលប់ សហរដ្ឋអាមេរិក អាចជាប្រទេស ដែលត្រូវការម៉ាស៊ីន និងបំពង់ជំនួយការដកដង្ហើម ខ្លាំងជាងគេបង្អស់។ លោកអភិបាលរដ្ឋញូយ៉ក បានសម្រេច ទិញប្រដាប់ជំនួយការដកដង្ហើម ដើរដោយដៃ ជាច្រើនពាន់សម្រាប់។ ឧបករណ៍នេះ (AirOx) ត្រូវគេនិយមប្រើ ក្នុងប្រតិបត្តិការរបស់ក្រុមសង្រ្គោះបន្ទាន់។ តែបញ្ហាចោទ គឺថាឧបករណ៍នេះ គឺតម្រូវឲ្យមានដៃដើម្បីច្របាច់ដំណើរការ ២៤ម៉ោងទល់២៤ម៉ោង។ លោកអភិបាលរដ្ឋញូយ៉ក មានបំណង ចង់សុំអន្តរាគមន៍ពីកងឆ្មាំជាតិ ដើម្បីបំពេញបេសកកម្មនេះ។
តែយ៉ាណា លោកអភិបាលរដ្ឋញូយ៉ក ទទួលស្គាល់ថា នេះជាដំណោះស្រាយបន្ទាន់ បើទោះបីវាមិនល្អខ្លាំងក៏ដោយ។ លោកបានស្នើសុំ ម៉ាស៊ីននិងបំពង់ជំនួយដកដង្ហើម ចំនួន៣ម៉ឺនសម្រាប់ ពីរដ្ឋបាលសហព័ន្ធ។ តែលោកប្រធានាធិបតីសហរដ្ឋ ដូណាល់ ត្រាំ នៅតែបន្តគិតថា លោកអភិបាលរដ្ឋញូយ៉ក មានការភ័យបារម្ភ ស្លន់ស្លោជ្រុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ