កូវីដ១៩៖ អាល្លឺម៉ង់មានអត្រាអ្នកស្លាប់តិច បើធៀបនឹងចំនួនអ្នកឆ្លង
តាមទិន្នន័យរបស់អ្នកឆ្លើយព័ត៌មានវិទ្យុបារាំង RFI ប្រចាំនៅក្រុងប៊ែរឡាំង, នៅគិតត្រឹមថ្ងៃសៅរ៍ទី២៨មីនា ក្នុងចំណោមករណីឆ្លងជាង៤ម៉ឺនករណី គឺមានចំនួនអ្នកស្លាប់ តែជាង២៥០នាក់ប៉ុណ្ណោះ។ ក៏ប៉ុន្តែ តាមគេហទំព័រ worldometers របស់ក្រុមអ្នកជំនាញស្ថតិវិញ, អាល្លឺម៉ង់ នៅថ្ងៃសៅរ៍ដដែល មានអ្នកឆ្លងចំនួន ជាង ៥ម៉ឺន ៣ពាន់ ៣រយនាក់ ហើយស្លាប់តែ ប្រមាណ៤០០នាក់, ចំណែកទីភ្នាក់បារាំង AFP ថាមានស្លាប់ ប្រមាណ៦៥០នាក់។ ទោះយ៉ាងណាក្តី អត្រាអ្នកស្លាប់បាត់បង់ជីវិតដោយសារតែកូវីដ១៩ នៅអាល្លឺម៉ង់នេះ មានអត្រាតិចជាងប្រទេសជិតខាងឆ្ងាយណាស់ ពោលគឺស្លាប់តិចជាងនៅបារាំងនិងអ៊ីតាលី។
ចុះផ្សាយនៅថ្ងៃ៖
ស្តាប់ - ០៣:១៤
នៅអាល្លឺម៉ង់ អត្រាអ្នកស្លាប់តិចបើធៀបនឹងចំនួនករណីឆ្លង គឺអត្រាស្លាប់មានតែ០.៥ភាគរយប៉ុណ្ណោះ ហើយទិន្នន័យស្លាប់នេះ តិចជាង១០ដង បើធៀបនៅបារាំងនិងអ៊ីតាលី។ អត្រាអ្នកស្លាប់តិចធៀបនឹងចំនួនករណីឆ្លងនេះ ក៏ដោយសារតែអាល្លឺម៉ង់ បានធ្វើតេស្តរកមេរោគបានចំនួនច្រើន។ នេះបើតាមការបញ្ជាក់របស់អ្នកជំនាញអាម្លឺម៉ង់ខាងជំងឺឆ្លង Christian Drosten និងដែលឱ្យដឹងទៀតថា អាល្លឺម៉ង់ បានធ្វើតេស្ត ទៅលើមនុស្សចំនួនកន្លះលាននាក់ គ្រាន់តែក្នុងមួយសប្តាហ៍។ អាល្លឺម៉ង់ ក៏ត្រូវគេចាត់ទុកថា ជាប្រទេសដែលបានធ្វើតេស្តរកមេរោគកូរ៉ូណាថ្មី បានចំនួនច្រើនជាងគេលើពិភពលោកដែរ។
ដោយឡែក ចំពោះអ្នកស្លាប់ហើយ គេមិនធ្វើតេស្តទៀតទេ។ ការមិនធ្វើតេស្តក្រោយពេលស្លាប់នេះ វាអាចធ្វើឲ្យអត្រាចំនួនមនុស្សស្លាប់ដោយកូវីដ១៩ មានតិចដោយសារតែវាអាចមានអ្នកខ្លះ ស្លាប់ដោយកូវីដ តែគេមិនដឹង ដោយមិនបានធ្វើតេស្ត ហើយគេមិនរាប់ចូល។
ម្យ៉ាងវិញទៀត នៅអាល្លឺម៉ង់ អាជ្ញាធរមូលដ្ឋាន នៅថ្នាក់តំបន់ខ្លះ អាចមានសិទ្ធបិទសាលារៀន បិទកន្លែងមើលថែកុមារ បិទកន្លែងជួបជុំមួយចំនួនខ្លះជាមុន តាំងពីពេលផ្ទុះមេរោគដំបូងៗម្ល៉េះ ដោយមិនរង់ចាំទាល់តែមានវិធានការថ្នាក់ជាតិ ឱ្យបង្ខាំងមនុស្សមួយប្រទេសតែម្តងនោះឡើយ។ ដោយមានការភ្ញាក់រលឹកទាន់ពេលវេលាបែបនេះ ក៏បានជួយបង្ការការឆ្លងរាលដាលបានកម្រិតច្រើនដែរ។ រីឯការយកចិត្តទុកដាក់គិតគូរខាងសេដ្ឋកិច្ច និងចំណាយកញ្ចប់ថវិការដ្ឋបានទាន់ពេលវេលា គ្រប់តាមតម្រូវការ សម្រាប់សង្គ្រោះផ្នែកឯកជន និងជួយផ្នែកមន្ទីរពេទ្យ ក៏បានរួមចំណែកយ៉ាងសកម្មណាស់ដែរ ក្នុងការបន្ថយចំនួនអ្នក ស្លាប់។
ជាការកត់សម្គាល់មួយទៀត អាល្លឺម៉ង់បានបង្កើតកន្លែងសម្រាកព្យាបាល បានលឿននិងទាន់ពេលវេលា ហើយថែមទាំងបែងចែងមន្ទីរពេទ្យសម្រាប់ព្យាបាលអ្នកជំងឺកូវីដ១៩ នៅដាច់ឡែកពីគេ។ នេះក៏បានជួយ កុំឱ្យមានការឆ្លងរាលដាលទៅអ្នកជំងឺផ្សេងទៀត ក្នុងមន្ទីរពេទ្យតែមួយទៀតផង។
បណ្តាញព័ត៌មាននៅក្នុងស្រុកអាល្លឺម៉ង់ បញ្ជាក់ថា អាជ្ញាធរអាល្លឺម៉ង់ ទំនងអាចរៀនច្បិចយកគំរូតាមប្រទេសកូរ៉េខាងត្បូង ដែលប្រឹងប្រែងធ្វើតេស្តរកអ្នកឆ្លង ឱ្យបានច្រើន និងដាក់ឱ្យដាច់ដោយឡែក។ ចំពោះអ្នកដែលមិនឆ្លង អាចទៅធ្វើការបាន ក៏ជាផ្នែកជួយទ្រទ្រង់សេដ្ឋកិច្ចជាតិបានច្រើនដែរ។
អាល្លឺម៉ង់ គ្រោងនឹងបង្កើនចំនួនធ្វើតេស្ត ចាប់ពីពេលនេះទៅដល់ដំណាច់ខែមេសា ដើម្បីធ្វើតេស្តបាន ២០ម៉ឺននាក់ ក្នុងមួយថ្ងៃ។ ក្រុមហ៊ុន Bosch របស់អាល្លឺម៉ង់ បញ្ជាក់ក្នុងសប្តាហ៍នេះថា នៅខែមេសាខាងមុខ អាល្លឺម៉ង់អាចមានមធ្យោបាយថ្មី ធ្វើតេស្តរកមេរោគកូវីដ១៩ ដោយចំណាយពេលតែ ២ម៉ោងកន្លះ តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ