ក្រុមប្រទេសផលិតប្រេងកំពុងជួបវិបត្តិដោយមេរោគកូរ៉ូណាថ្មី
ក្រុមប្រទេសផលិតប្រេងក្នុងអង្គការ Opep និងក្រុមប្រទេសសម្ព័ន្ធមិត្តរបស់ Opep រួមប្រជុំគ្នារយៈពេល ២ថ្ងៃដោយចាប់ផ្តើមក្នុងថ្ងៃព្រហស្បតិ៍ ទី៥ មីនា។ កម្មវត្ថុនៃកិច្ចប្រជុំ គឺស្វែងរកយុទ្ធសាស្រ្តថ្មីដើម្បីទប់នឹងការធ្លាក់ថ្លៃតម្លៃប្រេងដោយសារមេរោគកូរ៉ូណាថ្មី។ កាលពីខែធ្នូ ឆ្នាំ ២០១៩ និងដើម្បីដំឡើងតម្លៃប្រេងឆៅ Opep និងក្រុមប្រទេសដៃគូបានប្រើយុទ្ធសាស្រ្តដោយកាត់បន្ថយការបូមប្រេង។ តែគេនៅមិនទាន់ដឹងថា តើយុទ្ធសាស្រ្តដដែលនេះនឹងត្រូវយកទៅប្រើជាថ្មី ឬអត់ទេ។ យ៉ាងណាក៏ដោយ មានប្រទេសមួយចំនួនបន្តនិយាយមិនចុះសម្រុងគ្នា។
ចុះផ្សាយនៅថ្ងៃ៖
ស្តាប់ - ០២:១៥
នៅថ្ងៃអាទិត្យ ទី១ មីនា ឥទ្ធិពលរបស់មេរោគកូរ៉ូណាថ្មីបានធ្វើឲ្យតម្លៃប្រេងឆៅធ្លាក់ក្រោម ៥០ដុល្លារក្នុង ១បារីល។ ដើម្បីទប់កុំឲ្យធ្លាក់ថ្លៃជាងនេះ ក្រុមប្រទេសផលិតប្រេងទាំង ២៣ប្រទេសនៅក្នុងអង្គការ Opep និងនៅក្រៅអង្គការ Opep តែងប្រើយុទ្ធសាស្រ្តកាត់បន្ថយការបូមប្រេង។ តែនៅចំពោះវិបត្តិមេរោគកូរ៉ូណាថ្មី យុទ្ធសាស្រ្តដដែលមួយនេះហាក់មិនបានក្លាយជាកុងសង់ស៊ុសរួមទេ។ ក្នុងថ្ងៃពុធ ទី៤ មីនា ប្រទេសលីប៊ីមិនចង់ឲ្យមានការកាត់បន្ថយផលិតកម្មប្រេងឆៅបន្ថែមទៀត តែប្រទេសអ៊ីរ៉ង់ចង់ឲ្យកាត់បន្ថយការបូមយ៉ាងតិច ៥០០ ០០០បារីលក្នុងមួយថ្ងៃ។ អារ៉ាប៊ីសាអូឌីតបានយល់ស្របដូចអ៊ីរ៉ង់។
ចំណែករុស្ស៊ីដែលមិនមែនជាសមាជិក Opep មិនយល់ស្រប និងចង់រក្សាទុកបរិមាណផលិតកម្មប្រេងឆៅដូចសព្វថ្ងៃ ពោលដូចដែលបានកំណត់ក្នុងខែធ្នូ ឆ្នាំ ២០១៩។ ប្រធានាធិបតីរុស្ស៊ីលោកពូទីនបានស្នើឲ្យបន្តកិច្ចព្រមព្រៀងដែលកំពុងមានជាធរមាន។ គួរបញ្ជាក់ថា រុស្ស៊ីជាប្រទេសផលិតប្រេងឆៅទី២ ក្នុងលោក បន្ទាប់ពីអាមេរិក និងស្ថិតពីមុខប្រទេសអារ៉ាប៊ីសាអូឌីត។ តែតាំងពីចិនដែលជាប្រទេសនាំប្រេងឆៅចូលទី១ ក្នុងលោកបានធ្លាក់ក្នុងវិបត្តិមេរោគកូរ៉ូណាថ្មីមក រុស្ស៊ី និងអារ៉ាប៊ីសាអូឌីតបានស្គាល់ប្រាក់ចំណូលបានមកពីការលក់ប្រេងឆៅធ្លាក់ចុះយ៉ាងគំហុក។
ខណៈនេះ និងក្រៅពីចិន មេរោគកូរ៉ូណាថ្មីបានឆ្លងចូលជាង ៨០ប្រទេសក្នុងលោក និងប្រហែលមិនទាន់បញ្ឈប់ដំណើររបស់វានៅត្រឹមនេះទេ។ ផលវិបាកសេដ្ឋកិច្ចកើតចេញពីមេរោគកូរ៉ូណាថ្មីបានផ្តើមលេចកាន់តែច្បាស់។ អង្គការមូលនិធិរូបិយវត្ថុបានបញ្ជាក់ថា កំណើនសេដ្ឋកិច្ចក្នុងលោកសម្រាប់ឆ្នាំ ២០២០ នឹងមានតិចជាង ឆ្នាំ ២០១៩។ តាមអង្គការនៃកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច កំណើនសេដ្ឋកិច្ចក្នុងលោកនៅឆ្នាំ ២០២០ មានពីប្រមាណ ២,៤%។ គួររម្លឹកថា មេរោគកូរ៉ូណាថ្មីបានបង្ខំឲ្យប្រទេសរងគ្រោះមួយចំនួនឲ្យផ្អាកសកម្មភាពនៅសឹងគ្រប់វិស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ