រុស្ស៊ី នឹងប្រកាសជំហរខ្លួន ទៅ អង្គការ OPEP ក្នុងប៉ុន្មានថ្ងៃទៀត
រដ្ឋមន្ត្រីក្រសួងថាមពលរុស្ស៊ី បានប្រកាសនៅថ្ងៃសុក្រនេះថា ប្រទេសគាត់ ដែលជាដៃគូ នៃ ក្រុមប្រទេស សមាជិកអង្គការប្រទេសនាំប្រេងចេញ ក្នុងក្របខ័ណ្ឌ OPEP + នឹងប្រកាន់យកជំហរខ្លួន ចំពោះ សំណើរកាត់បន្ថយបន្ថែមទៀតជាយថាហេតុ កាផលិតប្រេងឆៅ គឺ ក្នុង”ប៉ុន្មានថ្ងៃចំពោះមុខ”។
ចុះផ្សាយនៅថ្ងៃ៖ កែប្រែថ្ងៃទី៖
តាមប្រព័ន្ធផ្សព្វផ្សាយជាច្រើន រុស្ស៊ី ថ្ងៃព្រហស្បតិ៍ម្សិលមិញ បានថ្លែងជំទាស់នឹង អនុសាសន៍ នៃ គណៈកម្មាធិការបច្ចេកទេស របស់ អង្គការ OPEP+ គឺ នាកិច្ចប្រជុំវិសាមញ្ញនៅក្រុង Vienne ឲ្យបញ្ចុះ ការផលិតប្រេងឆៅ ក្នុងទំហំដល់ ៦០០.០០០ បារីល ក្នុងមួយថ្ងៃ បន្ថែមទៀត ដើម្បីទប់កុំឲ្យ តម្លៃប្រេងនេះ ធ្លាក់ចុះតទៅទៀត ដោយមកពី ជម្ងឺឆ្លងរាលដាល នៃ កូរ៉ូណាវីរុស មានប្រភពក្នុងប្រទេសចិន។
“ ខ្ញុំគិតថា បញ្ហានឹងដោះស្រាយ ក្នុងប៉ុន្មានថ្ងៃទៀត។ យើងនឹងឃើញ តើស្ថានការណ៍នឹងវិវឌ្ឍយ៉ាងណាៗ ក្នុងប៉ុន្មានថ្ងៃចំពោះមុខ” - សេចក្តីនេះ ត្រូវបានលោករដ្ឋមន្ត្រីថាមពលរុស្ស៊ី ថ្លែងទៅទីភ្នាក់ងារព័ត៌មានជាតិ ដោយមិនលំអិត តើក្នុងក្របខ័ណ្ឌណា ដែលគាត់នឹងទម្លាយឲ្យដឹងពីជំហរនេះ។
ស្របនឹងប្រព័ន្ធផ្សព្វផ្សាយ អារ៉ាប៊ី សាអ៊ូឌីត ចង់ឲ្យការកាត់បន្ថយថែមទៀតនេះ មានទំហំ ពី ៨ សែន ដល់ ១ លាន បារីលក្នុងមួយថ្ងៃ ហើយក៏ស្នើ នូវដំណោះស្រាយ សម្របសម្រួល ត្រឹម ៦ សែន បារីល ក្នុងមួយថ្ងៃ។ អង្គការ OPEP+ ដំណើរការ ឈរលើការព្រមព្រៀងគ្នា រវាងគ្រប់តែប្រទេសដែលចូលរួម។ កិច្ចប្រជុំ បាន ចប់ទៅ ដោយគ្មានលទ្ធផលទេ។
ថ្លែងថ្ងៃសុក្រនេះ លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រ៉ូវ បានលើកឡើងជាអាទិ៍៖ យើងប្រាថ្នាបន្ត ការពិគ្រោះយោបល់គ្នាតទៅទៀត ដើម្បីកំណត់វិធានការដ៏ប្រសើរ ដែលអាចទទួលយកបានដោយ គ្រប់តែ ប្រទេសនាំប្រេងចេញ គ្រាន់នឹង រៀបរយទីផ្សារ កុំបណ្តោយឲ្យមានការផ្លាស់ប្តូរយ៉ាងគំហុក សម្រាប់ ប្រទេសផលិតប្រេង និង សម្រាប់ប្រទេសដែលប្រើប្រាស់ឥន្ធនៈនេះ។
ជំងឺឆ្លង កូរ៉ូណាវីរុស បានបង្កភាពជ្រួលច្របល់ នៅតាមប្រទេសខ្លះ ដែលផលិតប្រេងឆៅ ហើយដែលអាស្រ័យជាពិសេស នឹងកំណើនសេដ្ឋកិច្ចចិន ។ ប្រទេសចិន ទិញ ដល់ទៅជាង ២ភាគ៣ នៃប្រេងឆៅពីបណ្តាប្រទេស-សមាជិក OPEP និងពីប្រទេសនានាដៃគូ OPEP បឋមមុនគេ គឺពី អារ៉ាប៊ី សាអ៊ូឌីត ដែលជាប្រទេសនាំមុខគេ ខាងផលិតប្រេង ។ ចំណែករុស្ស៊ី ដែលជាប់លេខ២ មិនសប្បាយចិត្ត នឹងបន្ថយតទៅទៀត ការផលិតប្រេង ដ្បិត ពួកក្រុមហ៊ុនប្រេង របស់ខ្លួន និង រដ្ឋាភិបាល រុស្ស៊ីផ្ទាល់ ត្រូវការ ចំណូល ឲ្យបានក្រាស់ក្រែល -នេះ បើតាមមតិ លោកស្រី Ellen Wald ប្រវត្តិរិទូខាងប្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ