រុស្ស៊ីចោទអ៊ីស្រាអែលពីបទបង្កគ្រោះថ្នាក់ដល់យន្តហោះដឹកអ្នកដំណើរពីអ៊ីរ៉ង់ទៅស៊ីរី
នៅថ្ងៃសុក្រ ទី៧ កុម្ភៈ យន្តហោះ Airbus ធុន A៣២០ ដែលដឹកអ្នកដំណើរចំនួន ១៧២នាក់បានចុះចតជាបន្ទាន់នៅមូលដ្ឋានទ័ពអាកាសស៊ីរីខ្មីមីម ក្រោយពីបានបញ្ជៀសយ៉ាងប្រផិតប្រផើយពីការបាញ់តបរបស់កងទ័ពស៊ីរីទៅលើការវាយប្រហាររបស់ទ័ពអាកាសអ៊ីស្រាអែលនៅក្បែរទីក្រុងដាម៉ាស់ប្រទេសស៊ីរី។ ក្រសួងការពារជាតិរុស្ស៊ីបានចោទអ៊ីស្រាអែលពីបទបានបង្កគ្រោះថ្នាក់ដល់យន្តហោះដឹកអ្នកដំណើរដោយយកយន្តហោះនោះធ្វើជាខែលដើម្បីគេចពីការតប តរបស់កងទ័ពស៊ីរី។
ចុះផ្សាយនៅថ្ងៃ៖
ស្តាប់ - ០២:១៧
យន្តហោះ Airbus ធុន A៣២០ ដឹកអ្នកដំណើរចំនួន ១៧២នាក់បានហោះចេញពីទីក្រុងតេហេរ៉ង់ ប្រទេសអ៊ីរ៉ង់ទៅកាន់ទីក្រុងដាម៉ាស់ ប្រទេសស៊ីរី។ តែក្នុងពេលហោះជិតដល់គោលដៅដើម្បីចុះចត ទ័ពអាកាសអ៊ីស្រាអែលក៏បានការវាយប្រហារលើតំបន់ជុំវិញទីក្រុងដាម៉ាស់។ អ្នកគ្រប់គ្រងចរាចរណ៍យន្តហោះនៅអាកាសយានដ្ឋានក្រុងដាម៉ាស់បានបញ្ចេញប្រតិកម្មភ្លាមៗដោយស្នើឲ្យយន្តហោះនោះហោះចេញពីតំបន់ហានិភ័យ។ តែបែរជាបានវាក់នឹងផ្ទាំងស៊ីបរបស់ប្រព័ន្ធការពារផ្លូវអាកាសរបស់កងទ័ពស៊ីរីទៅវិញ។ គឺនៅពេលនោះហើយដែលយន្តហោះនោះបានសម្រេចចុះចតយ៉ាងបន្ទាន់ដោយសុវត្ថិភាពនៅលើមូលដ្ឋានយោធាស៊ីរីឈ្មោះខ្មីមីមដែលគ្រប់គ្រងដោយរុស្ស៊ី។
ក្រសួងការពារជាតិរុស្ស៊ីបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា ការដែលអ៊ីស្រាអែលយកយន្តហោះស៊ីវិលធ្វើជាខែលនៅក្នុងប្រតិបត្តិការយោធាផ្លូវអាកាសរបស់ខ្លួនដើម្បីគេចពីការវាយបកវិញរបស់កងទ័ពស៊ីរីជាជំនាញរបស់អ៊ីស្រាអែល។ បើតាមសម្តីរបស់អ្នកនាំពាក្យក្រសួងការពារជាតិរុស្ស៊ីចុះផ្សាយដោយកាសែត RIA អ៊ីស្រាអែលបានប្រើយន្តហោះចម្បាំងប្រភេទ F-១៦ ចំនួន ៤គ្រឿងទម្លាក់គ្រាប់បែកលើផ្ទាំងស៊ីបជាច្រើននៅតំបន់ជុំវិញទីក្រុងដាម៉ាស់ តែមិនបានហោះចូលក្នុងដែនអាកាសរបស់ស៊ីរីទេ។ នៅថ្ងៃព្រហស្បតិ៍ ទី៦ កុម្ភៈ ស៊ីរីបានផ្សព្វផ្សាយព័ត៌មានដែលថា ប្រព័ន្ធការពារផ្លូវអាកាសស៊ីរីចាប់បានគ្រាប់មីស៊ីលអ៊ីស្រាអែលដែលបាញ់សំដៅលើផ្ទាំងស៊ីបយោធាស៊ីរី។ តែអ៊ីស្រាអែលបានបដិសេធមិនធ្វើអត្ថាធិប្បាយលើព័ត៌មានមួយនេះទេ។
អ៊ីស្រាអែលដែលបានចាត់ទុកអ៊ីរ៉ង់ជាប្រទេសគំរាមកំហែងចំពោះខ្លួននៅក្នុងតំបន់តែងធ្វើអន្តរាគមន៍ផ្លូវយោធាក្នុងទឹកដីស៊ីរីដោយវាយប្រហារលើក្រុមប្រដាប់អាវុធគាំទ្រអ៊ីរ៉ង់ដែលគាំទ្ររបបស៊ីរីរបស់ប្រធានាធិបតីអាសាដ។ គួររម្លឹកថានៅជិតមួយខែមុន មានយន្តហោះស៊ីវិលអ៊ុយក្រែនមួយគ្រឿងត្រូវបានកងទ័ពអ៊ីរ៉ង់បាញ់ទម្លាក់ដោយភាន់ច្រឡំ បន្ទាប់ពីបានហោះចេញពីអាកាសយានដ្ឋានក្រុងតេហេរ៉ង់តែប៉ុន្មាននាទី។ ភាន់ច្រឡំ ឬចេតនា ព្រឹត្តិការណ៍កាលណោះបានផ្តាច់ជីវិតអ្នកដំណើរទាំង ១៧៦នាក់ដោយគ្មានសល់ម្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ