រដ្ឋបាលខេត្តកំពង់ចាម៖ ករណីវាយបុរសតាំងខ្លួនជាអ្នកកាសែតនៅកន្លែងទុកឈើអាជីវកម្មជាទំនាស់បុគ្គល
លោក អ៊ឹម ហាច ដែលអះអាងថាជាអ្នកកាសែតត្រូវបានមនុស្ស៤នាក់វាយធ្វើទារុណកម្មចងដៃចងជើងនៅកន្លែងទុកឈើលក់គ្រឿងសង្ហារឹមមួយកន្លែងនៅក្នុងខេត្តកំពង់ចាមនៅថ្ងៃទី២ធ្នូម្សិលមិញនេះ។ ករណីនេះ ត្រូវបានអាជ្ញាធរខេត្តកំពង់ចាមនៅថ្ងៃទី៤ធ្នូនេះថា ជាទំនាស់បុគ្គល ហើយអាជ្ញាធរក៏បានសម្របសម្រួលដកពាក្យបណ្តឹងរួចហើយដែរ។ រូបភាពវីដេអូរបស់ជនរងគ្រោះក្នុងស្ថានភាពបែបនោះ ត្រូវបានបង្ហោះចែកចាយយ៉ាងព្រោងព្រាត នៅក្នុងបណ្តាញសង្គម។ អ្នកធ្វើការលើកកម្ពស់សិទ្ធិក្នុងវិស័យសារព័ត៌មាន និងការផ្សព្វផ្សាយនៅកម្ពុជាលើកឡើងថាយល់ថាអាជ្ញាធរគួរធ្វើការស្រាវជ្រាវបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៤១
លោក អ៊ឹម ហាច ដែលអះអាងថាជាអ្នកកាសែតរបស់ភ្នាក់ងារសារព័ត៌មាន «សានព្រហ្ម» ត្រូវបានមនុស្ស៤នាក់ព្រួតវាយធ្វើទារុណកម្មចងដៃចងជើង ក្នុងស្ថានភាពគ្មានអាវ ខ្លួនប្រឡាក់ដី នៅកន្លែងទុកឈើលក់គ្រឿងសង្ហារឹមមួយកន្លែងយីហោ លី សេងហុង នៅស្រុកជើងព្រៃ ក្នុងខេត្តកំពង់ចាម។ រូបភាពវីដេអូរបស់ជនរងគ្រោះក្នុងស្ថានភាពបែបនោះ ត្រូវបានបង្ហោះចែកចាយយ៉ាងព្រោងព្រាត នៅក្នុងបណ្តាញសង្គម។
លោក អ៊ឹម ហាច បានចោទថា ករណីនេះកើតមានដោយសារការគុំគួននឹងលោកដែលបានថតវីដេអូឈើដែលសង្ស័យថាជាឈើខុសច្បាប់នៅថ្ងៃទី២ធ្នូ លុះដល់ពេលយប់ លោកត្រូវបានគេលបផ្តួលម៉ូតូ និងចាប់ខ្លួនយកទៅវាយធ្វើបាបនៅកន្លែងកើតហេតុ។ ប៉ុន្តែតាមការបំភ្លឺរបស់ជនបង្កទាំង៤នាក់វិញ លោក អ៊ឹម ហាច បានចូលផ្ទះពួកគេដោយគ្មានការអនុញ្ញាតនៅពេលយប់អាត្រាធ ហើយបានថតកន្លែងទុកឈើនៅទីនោះ។
នៅក្នុងសេចក្តីប្រកាសរបស់រដ្ឋបាលខេត្តកំពង់ចាមនៅថ្ងៃនេះ បានបញ្ជាក់ថាហេតុការណ៍ខាងលើនេះ គឺជារឿងទំនាស់បុគ្គល ពុំមានពាក់ព័ន្ធថាសមត្ថកិច្ចនគរបាលទៅចាប់ចង លោក អ៊ឹម ហាច ទេ។ ហើយ លោក អ៊ឹម ហាច ដែលអះអាងថាជាអ្នកកាសែត ពុំមានការចុះបញ្ជីជាភ្នាក់ងារសារព័ត៌មានផ្លូវការនៅស្ថាប័នសារព័ត៌មានណាមួយឡើយ។ លោក អ៊ឹម ហាច ធ្លាប់ជាអ្នកកាសែតនៅអង្គភាព «ស៊ីអិនអិម» ប៉ុន្តែលោកត្រូវបានបញ្ឈប់ពីការងារនៅមួយខែមុនកើតហេតុម្ល៉េះ។
រដ្ឋបាលខេត្តកំពង់ចាមក៏មានបញ្ជាក់ថា ករណីឈើដែលជាកម្មវត្ថុផ្សព្វផ្សាយព័ត៌មានរបស់លោក អ៊ឹម ហាច ជាឈើដែលបានទិញពីដេប៉ូស្របច្បាប់អនុញ្ញាតរបស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម ក្នុងគោលបំណងសាងសង់លំនៅឋាន ដោយមានបញ្ជាក់ពីអាជ្ញាធរមូលដ្ឋាន។
ក្នុងសេចក្តីប្រកាសដដែល លោក អ៊ឹម សាច បានសារភាពថា ខ្លួនពិតជាបានចូលទៅបរិវេណគេហដ្ឋានភាគីពលរដ្ឋខាងលើ ដោយគ្មានការអនុញ្ញាតពិតប្រាកដមែន។ ចំណែក ភាគីជនបង្កហឹង្សារទាំង៤នាក់វិញ ក៏សារភាពថា ពួកគេបានព្យាយាមប្រតាយប្រតប់ ដើម្បីចាប់ជនសង្ស័យ ហើយនាំខ្លួនប្រគល់ឱ្យសមត្ថកិច្ចពិតមែន។ ហើយភាគីទាំងពីរ បានស្នើសុំដកពាក្យបណ្តឹងបញ្ចប់រឿង។
តែយ៉ាងណា លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា យល់ថា ករណីចាប់មនុស្សចងដៃចងជើងខាងលើ ជាករណីហិង្សានិងឃោរឃៅធ្ងន់ធ្ងរ ដែលទាមទារឱ្យអាជ្ញាធរធ្វើការស៊ើបអង្កេតនិងស្រាវជ្រាវឱ្យបានម៉ត់ចត់ ដើម្បីបញ្ចប់និទណ្ឌភាពនិងក៏ដើម្បីកសាងទំនុកចិត្តពីពលរដ្ឋផងដែរ។ តាមលោក ណុប វី ការរងគ្រោះក្នុងរូបភាពធ្វើទារុណកម្ម បើអ្នកបទល្មើសបែរជារួចខ្លួន មិនត្រូវបានស៊ើបអង្កេត វាបង្ហាញថាសង្គមខ្មែរនៅតែមានអំពើអយុត្តិធម៌និងភាពប្រេះឆា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ