រញ្ជួយដីនៅនេប៉ាល់ ស្លាប់និងរបួសច្រើនរយនាក់
ករណីរញ្ជួយដីថ្មីមួយទៀត បានកើតឡើង នៅភាគខាងលិចប្រទេសនេប៉ាល់ ចំងាយប្រមាណ៥០០ គីឡូម៉ែត្រ ពីរដ្ឋធានីកាតម៉ាន់ឌូ កាលពីយប់ថ្ងៃសុក្រ ទី៣វិច្ឆិកា។ យោងតាមតួលេខបណ្តោះអាសន្ន នៅព្រឹកថ្ងៃទីសៅរ៍ ចំនួនមនុស្សស្លាប់ មានប្រមាណជាង១៣០នាក់ និងរបួសជាច្រើនរយនាក់ទៀត។
ចុះផ្សាយនៅថ្ងៃ៖
ស្តាប់ - ០៣:០៤
ផ្អែកតាមមជ្ឈមណ្ឌលជាតិធរណីសាស្ត្រនេប៉ាល់ គឺករណីរញ្ជួយដី មានកម្លាំង ៦,៤កម្រិតរិឆទ័រ បានកើតឡើងនៅតំបន់ Jajarkot ដែលជាតំបន់ភ្នំខ្ពស់ៗ មានប្រជាជនរស់នៅប្រមាណ ១៩ម៉ឺននាក់។ ទីក្រុងញូដេលី រដ្ឋធានីឥណ្ឌា ដែលស្ថិតនៅចំងាយ៦០០គីឡូម៉ែត្រ កម្លាំងរញ្ជួយបានរំញោចដល់នោះ ដោយបានធ្វើឲ្យមនុស្សម្នាផ្អើលផងដែរ។ ដោយឡែក ផ្អែកតាមមជ្ឈមណ្ឌលជំនាញធរណីសាស្ត្រអាល្លឺម៉ង់ និងអាមេរិកវិញ ករណីរញ្ជួយដីនេះ គឺមានកម្លាំងប្រមាណ ៥,៧នៃកម្រិតរិឆទ័រ។ នៅទ
យោងតាមអាជ្ញាធរនេប៉ាល់ នៅព្រឹកថ្ងៃសៅរ៍ ចំនួនមនុស្សស្លាប់មានប្រមាណ៩២នាក់ នៅតំបន់ Jajarkot និងនៅតំបន់Rukum គេបានរកឃើញសាកសពចំនួនប្រមាណ៤០នាក់។ យ៉ាងណាក៏ដោយ មន្ត្រីមូលដ្ឋាននេប៉ាល់ មានការព្រួយបារម្ភខ្លាំងណាស់ ថាចំនួនមនុស្សស្លាប់ និងរបួសអាចនឹងកើនឡើងថែមទៀត ខណៈចំនួនមនុស្សបាត់ខ្លួន មានច្រើនខ្លាំងណាស់។ សំណង់ផ្ទះសំបែងប្រជាជន ភាគច្រើនសង់ពីឈើ និងដីឥដ្ឋ គឺពុំរឹងមាំទប់ទល់នឹងករណីរញ្ជួយដីឡើង ហើយជាងនេះទៀត ការរញ្ជួយបានកើតឡើងនៅវេលាយប់ ជាពេលដែលមនុស្សម្នាក់កំពុងស្ថិតនៅក្នុងផ្ទះ។
ការសង្គ្រោះបានជួបនូវឧបសគ្គជាច្រើន ដោយសារតែតំបន់រញ្ជួយដី គឺជាតំបន់ភ្នំខ្ពស់ជ្រលងជ្រៅ គ្មានផ្លូវថ្នល់ទៅដល់។ ការរញ្ជួយបានធ្វើឲ្យបាក់រមៀលដី កាត់ផ្តាច់ផ្លូវថ្នល់មួយចំនួន។ ព្រឹកថ្ងៃសៅរ៍ ឧទ្ថម្ភាគចក្រជាច្រើនគ្រឿង បានចាប់ផ្តើមដឹកជញ្ជូនមនុស្សរបួស មកកាន់មន្ទីរពេទ្យ ស្របពេលដែលលោកនាយករដ្ឋមន្ត្រីនេប៉ាល់ បានធ្វើដំណើរទៅដល់តំបន់រងគ្រោះ។ ខុទ្ទកាល័យនាយករដ្ឋមន្ត្រីនេប៉ាល់ បានអំពាវនាវ ទៅកាន់គ្រប់គណបក្សនយោបាយ អង្គការ ស្ថាប័ន និងមនុស្សទូទៅ ឲ្យបរិច្ចាកជំនួយមនុស្សធម៌ចាំបាច់ មានដូចជា ស្បៀងអាហារ ទឹក សំលៀកបំពាក់ ជម្រកបណ្តោះអាសន្ន និងសម្ភារៈផ្សេងៗទៀត។
សូមបញ្ជាក់ថា នេប៉ាល់ដែលស្ថិតនៅតំបន់ប្រជុំភ្នំហិមាល័យ តែងតែបានរងគ្រោះដោយមហន្តរាយរញ្ជួយដីជាញឹកញាប់ ដោយសារតំបន់នេះ ស្ថិតនៅចំចំណុចប្រសព្វទល់គ្នា រវាងផ្ទាំងទ្វីប នៃឧបទ្វីបឥណ្ឌា និងផ្ទាំងទ្វីបអឺរ៉ាស៊ី។ ករណីរញ្ជួយដី កាលពីឆ្នាំ២០១៥ មានកម្រិត ៧,៨រិឆទ័រ គឺជាករណីធ្ងន់ធ្ងរបំផុតសម្រាប់នេប៉ាល់ ដែលកាលនោះ មានស្លាប់មនុស្សប្រមាណ៩០០០នាក់ បាក់បែកផ្ទះសំបែង៥សែនខ្នង និងសាលារៀន៨០០០ខ្នង។ ជាងនេះទៀត សំណង់អគារបុរាណសម្បត្តិបេតិកភណ្ឌយូសេស្កូ ជាច្រើនរយទីតាំងបានរងនូវការខូចខាតយ៉ាងដំណំ ធ្វើឲ្យវិស័យទេចរណ៍នេប៉ាល់ កាន់តែជួបការលំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ