រដ្ឋមន្ត្រីការបរទេសថៃទៅអេហ្ស៊ីបនិងកាតា រកវិធីរំដោះចំណាប់ខ្មាំងថៃ ដែលនៅក្នុងដៃក្រុមហាម៉ាស
លោក Panpri Phahitthanukon រដ្ឋមន្ត្រីក្រសួងការបរទេសថៃ បានធ្វើដំណើរទៅដល់តំបន់ដើមបូព៌ា នៅថ្ងៃអង្គារទី៣១តុលា ដើម្បីរកវិធីរំដោះចំណាប់ខ្មាំងជនជាតិថៃទាំង២២នាក់ ដែលកំពុងស្ថិតនៅក្នុងដៃរបស់ក្រុមហាម៉ាស។ តាមការគ្រោងទុក លោករដ្ឋមន្ត្រីការបរទេសថៃ នឹងត្រូវជួបជាមួយរដ្ឋមន្ត្រីការបរទេស និងនាយករដ្ឋមន្ត្រីកាតា នៅថ្ងៃអង្គារ មុននឹងធ្វើដំណើរទៅជួបរដ្ឋមន្ត្រីការបរទេសអេហ្ស៊ីប នៅថ្ងៃពុធ
ចុះផ្សាយនៅថ្ងៃ៖
ស្តាប់ - ០៣:២០
ផ្អែកតាមតួលេខរបស់អាជ្ញាធរថៃ គឺមានជនជាតិថៃ ធ្វើការនៅអ៊ីស្រាអែល ចំនួនប្រមាណ៣០០០០នាក់ ដែលភាគច្រើនគឺជាពលករធ្វើការនៅតាមចំការដំណាំ។ នៅថ្ងៃដែលក្រុមហាម៉ាស បានសំរុកចូលមកសម្លាប់មនុស្សនៅក្នុងទឹកដីអ៊ីស្រាអែល ថ្ងៃទី៧តុលា មានជនជាតិថៃចំនួន៣២នាក់ ដែលត្រូវបានក្រុមភេរវកម្មនេះសម្លាប់ និងមានរបួស១៩នាក់។ ហើយក្នុងចំណោមចំណាប់ខ្មាំងទាំងអស់ ជាង២៣០នាក់ ដែលក្រុមហាម៉ាស បានចាប់យកទៅ គឺមានជនជាតិថៃចំនួន២២នាក់។
ថ្លែងកាលពីថ្ងៃចន្ទ មុនពេលចេញដំណើរទៅប្រទេសឡាវ លោកនាយករដ្ឋមន្ត្រីថៃ សេដ្ឋា ថៈវីស៊ីន បានអះអាងថា ថៃគឺជាប្រទេសរងគ្រោះមួយដ៏ធំ នៅក្នុងសង្រ្គាមដែលបានផ្ទុះឡើង រវាងក្រុមហាម៉ាសប៉ាឡេស្ទីន និងអ៊ីស្រាអែល ព្រោះមានជនជាតិថៃច្រើននាក់ ដែលបានស្លាប់ របួស និងត្រូវចាប់ចំណាប់ខ្មាំង។ ជាមួយគ្នាដែរ លោកបានគូសបញ្ជាក់ប្រាប់អ្នកកាសែតថា រដ្ឋាភិបាលលោកកំពុងតែប្រឹងប្រែង ធ្វើការឲ្យអស់ពីសមត្ថភាព ដើម្បីរំដោះចំណាប់ខ្មាំងជនជាតិថៃមកវិញ ដោយសុវត្ថិភាព។
គួរបញ្ជាក់ថាយោងតាមភាគីអ៊ីស្រាអែល គឺមានចំណាប់ខ្មាំងទាំងអស់ ២៣៨នាក់ ដែលកំពុងស្ថិតក្នុងដៃរបស់ក្រុមភេរវកម្មហាម៉ាស។ ចំណាប់ខ្មាំងស្ត្រី៤នាក់ ត្រូវបានក្រុមហាម៉ាសដោះលែងកាលពីសប្តាហ៍មុន។ អាជ្ញាធរកាតា ត្រូវបានគេផ្តោតក្តីសង្ឃឹមជាខ្លាំង នៅក្នុងការចរចាដោះលែងចំណាប់ខ្មាំង ព្រោះថាកាតាមានទំនាក់ទំនងយ៉ាងស្អិតរមួត ជាមួយក្រុមហាម៉ាស។ យ៉ាងណាមិញ មេដឹកនាំក្រុមហាម៉ាសជាច្រើននាក់ កំពុងរស់នៅលើទឹកដីកាតា។
តែយ៉ាងណាក៏ដោយ ក្រុមគ្រួសារចំណាប់ខ្មាំង កំពុងតែព្រួយបារម្ភជាខ្លាំង អំពីសុវត្ថិភាពអាយុជីវិតរបស់ចំណាប់ខ្មាំង ដោយសារតែកងទ័ពអ៊ីស្រាអែល បានបើកប្រតិបត្តិការវាយសំរុកចូលក្នុងតំបន់ហ្កាហ្សា អមដោយការបាញ់ទំលាក់គ្រាប់យ៉ាងដំណំថែមទៀត។ នៅទីក្រុង Tel Aviv ប្រជាជនអ៊ីស្រាអែល បានជួបជុំគ្នាធ្វើបាតុកម្ម ទាមទារឲ្យរដ្ឋាភិបាលលោកនេតាន់យ៉ាហ៊ូ ត្រូវតែផ្តោតអាទិភាព ទៅលើការចរចាដោះលែងចំណាប់ខ្មាំង ជាជាងការប្រយុទ្ធតាមសម្លាប់ក្រុមហាម៉ាស។
ផ្អែកតាមព័ត៌មានផ្តល់ឲ្យដោយកងទ័ពអ៊ីស្រាអែល នៅព្រឹកថ្ងៃអង្គារទី៣១តុលា កងទ័ពអ៊ីស្រាអែលបានរំដោះបានចំណាប់ខ្មាំងម្នាក់ ភេទស្រី ជាទាហានអ៊ីស្រាអែល។ ដោយឡែក កាលពីយប់ថ្ងៃចន្ទ ក្រសួងការបរទេសអ៊ីស្រាអែល បានចេញលិខិតប្រកាសមួយ បញ្ជាក់ថាចំណាប់ខ្មាំងភេទស្រី អាយុ២៣ឆ្នាំម្នាក់ ឈ្មោះ Shani Louk ជាជនជាតិអាល្លឺម៉ង់ដើមកំណើតអ៊ីស្រាអែល ត្រូវបានក្រុមហាម៉ាសសម្លាប់ដោយកាត់ក្បាល។ ផ្អែកតាមម្តាយរបស់ជនរងគ្រោះ ដែលបានប្រាប់បណ្តាញព័ត៌មានអាល្លឺម៉ង់ RTL គឺកងទ័ពអ៊ីស្រាអែល បានយកបំណែកឆ្អឹងលលាដ៍ក្បាលរបស់ជនរងគ្រោះ មកពិនិត្យADN ទើបដឹងពីអត្តសញ្ញាណច្បាស់ថាពិតជាកូនស្រីខ្លួន ដែលត្រូវបានក្រុមហាម៉ាសចាប់យកទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ