វៀតណាម៖ស្លាប់រាប់សិបនាក់នៅក្នុងគ្រោះថ្នាក់ភ្លើងឆេះអគារស្នាក់នៅមួយក្នុងក្រុងហាណូយ
នៅក្នុងប្រទេសវៀតណាម អគារស្នាក់នៅមួយកម្ពស់ ១០ជាន់ក្នុងក្រុងហាណូយបានរងការឆាបឆេះយ៉ាងសន្ធោសន្ធៅនាយប់ថ្ងៃអង្គារឆ្លងចូលថ្ងៃពុធ ទី១៣ កញ្ញា។ ឧប្បត្តិហេតុមួយនេះបានបណ្តាលឲ្យមានមនុស្សស្លាប់រាប់សិបនាក់ ក្នុងនោះមានកូនក្មេងយ៉ាងតិច ៣នាក់។ គួររម្លឹកថា វៀតណាមបានស្គាល់គ្រោះអគ្គីភ័យសម្លាប់មនុស្សយ៉ាងច្រើននារយៈពេលប៉ុន្មានឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៣១
ភ្លើងឆេះអគារស្នាក់នៅក្នុងក្រុងហាណូយបានបង្កឲ្យមានការភ្ញាក់ផ្អើលយ៉ាងខ្លាំង ព្រោះវាបានកើតឡើងនៅជិតអាធ្រាត្រយប់ថ្ងៃអង្គារឆ្លងចូលថ្ងៃពុធ ទី១៣ កញ្ញាដែលជាមានមនុស្សភាគច្រើនកំពុងគេងលង់លក់។ តាមតុល្យការដំបូងផ្តល់ដោយរដ្ឋអំណាច មានមនុស្សស្លាប់រាប់សិបនាក់ ក្នុងនោះមានកូនក្មេងយ៉ាងតិច ៣នាក់ និងមានរបួសធ្ងន់ ស្រាលប្រមាណជា ៥៤នាក់ត្រូវបានគេដឹកទៅកាន់មន្ទីរពេទ្យ។ « ជាគ្រោះអគ្គីភ័យមួយធ្ងន់ធ្ងរណាស់ » នេះជាការបញ្ជាក់របស់ទីភ្នាក់ងារវៀតណាមមួយឈ្មោះ Vietnam News Agency ដោយបន្ថែមថា ក្រុមអ្នកសង្រ្គោះបានជួយរំដោះមនុស្សចេញពីអគារស្នាក់នៅកំពុងឆាបឆេះចំនួន ៧០នាក់។ ទោះបីជាភ្លើងត្រូវបានពន្លត់ទាំងស្រុងក៏ដោយក៏ក្រុមអ្នកសង្រ្គោះបានបន្តប្រតិបត្តិការស្រាវជ្រាវជួយសង្រ្គោះរហូតដល់ព្រឹកថ្ងៃពុធ ទី១៣ កញ្ញា។
នៅក្នុងរូបភាពវីដេអូដែលផ្សព្វផ្សាយដោយទូរទស្សន៍ក្នុងស្រុក គេបានឃើញពីទំហំអណ្តាតភ្លើងឆាបឆេះយ៉ាងសន្ធោសន្ធៅដែលរាលដាលឆ្លងពីជាន់មួយទៅជាន់មួយនៅលើអគារកម្ពស់ ១០ជាន់ស្ថិតក្បែរច្រកចង្អៀតតូចមួយ។ ទីតាំងនេះបានធ្វើឲ្យក្រុមអ្នកជួយសង្រ្គោះពិបាកចូលទៅពន្លត់ភ្លើង។ តាមរដ្ឋអំណាច មានមនុស្សប្រមាណជា ១៥០នាក់បានស្នាក់នៅក្នុងអគារនោះ។ អ្វីជាការកត់សម្គាល់ រានហាលរបស់ផ្ទះនីមួយៗក្នុងអគារមានបិទបាំងដោយសំណាញ់ដែកដែលបានធ្វើឲ្យម្ចាស់ជាប់កុនខ្លួនឯងមិនអាចចេញរួច ហើយក្រុមអ្នកសង្រ្គោះក៏មិនអាចចូលទៅជួយបាន។ រហូតមកដល់ពេលនេះ គេនៅមិនទាន់ដឹងពីមូលហេតុនៃការឆាបឆេះអគារស្នាក់នៅនោះនៅឡើយទេ។
នាយករដ្ឋមន្រ្តីលោកហ្វាម មិញជិញបានបញ្ជាឲ្យបើកការស៊ើបអង្កេត។ ដើម្បីតាមសាក្សីខ្លះដែលបានឃើញឧប្បត្តិហេតុផ្ទាល់ភ្នែក អណ្តាតភ្លើងមានប្រភពចេញពីជាន់ចំណតរថយន្តមុននឹងបន្តឆាបឆេះឆ្លងដល់ជាន់ផ្សេងៗទៀត។ ចំណែកសាក្សីម្នាក់ឈ្មោះហឿងបានរៀបរាប់ពីការឃើញក្មេងប្រុសម្នាក់លោតចេញតាមបង្អូចដើម្បីគេចពីអណ្តាតភ្លើងដោយមិនថាតើក្មេងនោះមានស្ថានភាពយ៉ាងម៉េចទេ។ គ្រោះអគ្គីភ័យនេះជាគ្រោះអគ្គីភ័យមួយដ៏សាហាវដែលបានសម្លាប់មនុស្សច្រើនជាងគេនៅវៀតណាមនារយៈពេលប៉ុន្មានឆ្នាំចុងក្រោយនេះ។ កាលពីមួយឆ្នាំមុន ភ្លើងឆាបឆេះនៅក្នុងការ៉ាអូខេមួយក្បែរក្រុងហូជីមិញបានសម្លាប់មនុស្សចំនួន ៣២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ