ចិន និងរុស្ស៊ីពង្រឹងសម្ព័ន្ធមិត្តដោយត្រៀមធ្វើសមយុទ្ធរវាងកងទ័ពទាំងពីរនៅក្នុងសមុទ្រជប៉ុន
នៅក្នុងប្រទេសចិន រដ្ឋមន្រ្តីការពារជាតិលោកលី ស្ហាំងហ្វូបានប្រកាសនាថ្ងៃអាទិត្យ ទី១៦ កក្កដាថា ចិន និងរុស្ស៊ីនឹងរៀបចំធ្វើសមយុទ្ធរួមគ្នានៅក្នុងសមុទ្រជប៉ុន។ គម្រោងរៀបចំសមយុទ្ធនេះធ្វើឡើងនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន និងក្នុងពេលដែលរុស្ស៊ីកំពុងមានភាពតានតឹងជាមួយបណ្តាប្រទេសលោកខាងលិច ពិសេសជាមួយអាមេរិកដោយសារតែសង្រ្គាមអ៊ុយក្រែន។ សូមរម្លឹកថា រុស្ស៊ី និងចិនធ្លាប់បានធ្វើសមយុទ្ធរួមគ្នាច្រើនដងរវាងកងទ័ពទាំងពីរនារយៈពេលប៉ុន្មានខែចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:១៣
តាំងពីរុស្ស៊ីចូលឈ្លានអ៊ុយក្រែនមក ប្រទេសជិតខាងទាំងពីរចិន រុស្ស៊ីដែលជាសម្ព័ន្ធមិត្តចាក់ទឹកមិនលិចបានរំកិលជិតគ្នាកាន់តែខ្លាំងជាងពេលណាៗទាំងអស់។ ក្រុងប៉េកាំង និងក្រុងមូស្គូបានចែករំលែកនូវឆន្ទៈរួមក្នុងការត ទល់នឹងបស្ចិមលោក និយាយជារួម និងអាមេរិក និយាយដោយឡែក។ ដើម្បីជាភស្តុតាងបង្ហាញពីការពង្រឹងសម្ព័ន្ធមិត្តរវាងគ្នាឲ្យរឹតតែស្និទ្ធស្នាល ចិន និងរុស្ស៊ីបានរៀបចំសមយុទ្ធច្រើនដងរវាងកងទ័ពទាំងពីរនារយៈពេលប៉ុន្មានខែចុងក្រោយនេះ។ សមយុទ្ធនាពេលខាងមុខនឹងរៀបចំធ្វើនៅក្នុងសមុទ្រជប៉ុនដោយមានការចូលរួមពីនាវាចម្បាំងចិនចំនួន ៥គ្រឿងនេះបើយោងតាមសេចក្តីប្រកាសព័ត៌មានរបស់ក្រសួងការពារជាតិចិនចេញផ្សាយក្នុងថ្ងៃអាទិត្យ ទី១៦ កក្កដា។
ក្រៅពីនាវាចម្បាំង សមយុទ្ធរវាងកងទ័ពចិន និងរុស្ស៊ីនៅសមុទ្រជប៉ុនក៏នឹងមានការចូលរួមពីកងទ័ពអាកាសដែរ។ តែនៅក្នុងសេចក្តីប្រកាសព័ត៌មានដដែល ក្រសួងការពារជាតិចិនមិនបានបញ្ជាក់ពីកាលវិភាគនៃប្រតិបត្តិការសមយុទ្ធនោះទេ។ អ្វីដែលក្រសួងការពារជាតិចិនបានប្រាប់ នាវាចម្បាំងចិនបានចាកចេញពីកំពង់ផែ Quingdao ទៅរួមជាមួយនាវាចម្បាំងរុស្ស៊ីនៅក្នុងតំបន់ដែលបានកំណត់ទុកមុននៅសមុទ្រជប៉ុន។ ចំណែកកម្មវត្ថុនៃសមយុទ្ធត្រូវបានក្រសួងការពារជាតិចិនអះអាងថា ដើម្បីរក្សាសន្តិសុខផ្លូវសមុទ្រយុទ្ធសាស្រ្ត។ គួរបញ្ជាក់ថា នៅក្នុងខែមិថុនាកន្លងទៅ រុស្ស៊ី និងចិនបានធ្វើការល្បាតដែនអាកាសរួមគ្នាពីលើសមុទ្រជប៉ុន និងសមុទ្រចិនខាងកើត។
ការល្បាតកាលណោះបានធ្វើឲ្យកូរ៉េខាងត្បូងចាត់វិធានការបង្ការដោយបានដាក់ពង្រាយយន្តហោះចម្បាំងរបស់ខ្លួន។ ជាសរុប ចិន និងរុស្ស៊ីបានធ្វើការល្បាតរបៀបនេះចំនួន ៦ដងមកហើយនៅក្នុងតំបន់គិតតាំងពីឆ្នាំ ២០១៩។ នៅក្នុងកិច្ចសន្ទនាជាមួយមន្រ្តីយោធាជាន់ខ្ពស់រុស្ស៊ីក្នុងក្រុងប៉េកាំងនាដើមខែកក្កដា រដ្ឋមន្រ្តីការពារជាតិចិនលោកលី ស្ហាំងហ្វូបានយល់ឃើញថា ចិន និងរុស្ស៊ីអាចរួមចំណែកជាវិជ្ជមានក្នុងការរក្សាសន្តិភាព និងស្ថិរភាពនៅក្នុងពិភពលោក និងនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ