ជប៉ុន៖ឃាតកម្មសម្លាប់លោកអាបេកាលពី ១ឆ្នាំមុនបានរំលេចពីទំនាក់ទំនងជិតស្និទរវាងគណបក្សកាន់អំណាច និងនិកាយមូន
ថ្ងៃទី៨ កក្កដានេះជាខួបគម្រប់ ១ឆ្នាំនៃឃាតកម្មសម្លាប់អតីតនាយករដ្ឋមន្រ្តីជប៉ុនលោកស្ហ៊ីនហ្សូ អាបេកាលពីថ្ងៃទី៨ កក្កដា ឆ្នាំ ២០២២។ លោកអាបេត្រូវបានជនដៃដល់បាញ់សម្លាប់នៅពេលដែលលោកកំពុងឈរថ្លែងសុន្ទរកថានាពេលឃោសនាបោះឆ្នោតជ្រើសរើសសមាជិកព្រឹទ្ធសភា។ ឃាតករដែលមានឈ្មោះតេស៊ូយ៉ា យ៉ាម៉ាហ្កាមី (Tetsuya Yamagami) បានឆ្លើយសារភាពថា រូបគេសម្លាប់លោកអាបេដើម្បីចង់សឹងសឹកទល់នឹងអង្គការនិកាយមូនដែលបានបំផ្លាញគ្រួសាររបស់រូបគេ។ យោងតាមការស៊ើបអង្កេត គណបក្សប្រជាធិបតេយ្យសេរីមានទំនាក់ទំនងជិតស្និទ្ធជាមួយនិកាយមូនដែលជាអង្គការសាសនាដ៏មានឥទ្ធិពល។ គួរបញ្ជាក់ថា គណបក្សប្រជាធិបតេយ្យសេរីជាគណបក្សរបស់លោកអាបេ និងក៏ជាគណបក្សរបស់នាយករដ្ឋមន្រ្តីបច្ចុប្បន្នលោកហ្វូមីអូ គីស៊ីដា។ អ្នកជំនាញលោកអារណូ គ្រីវ៉ូបានយល់ឃើញថា ការរកឃើញពីទំនាក់ទំនងជិតស្និទ្ធរវាងនិកាយមូន និងគណបក្សប្រជាធិបតេយ្យសេរីបានធ្វើឲ្យខូចមុខមាត់នៃក្រុមអ្នកកាន់អំណាច តែមិនរហូតដល់បង្កគ្រោះថ្នាក់ឡើយ។
ចុះផ្សាយនៅថ្ងៃ៖
ស្តាប់ - ០១:៣៤
« សម្រាប់គណបក្សប្រជាធិបតេយ្យសេរី វាពិតជារឿងបន្ទាន់ណាស់ក្នុងការព្យាយាមបង្ហាញឲ្យឃើញថា គណបក្សបានកាត់ផ្តាច់គ្រប់ទំនាក់ទំនងទាំងអស់ជាមួយអង្គការនិកាយមូន។ ចំណោតនៅត្រង់ថា នៅក្នុងការស៊ើបអង្កេតផ្ទៃក្នុងមួយដែលគណបក្សប្រជាធិបតេយ្យសេរីបានបើកធ្វើបង្ហាញថា មានសមាជិកសភាចំនួនពាក់កណ្តាលរបស់គណបក្សមានចំណងទាក់ទងជាមួយអង្គការនិកាយមូន។
នៅក្នុងន័យនេះ គណបក្សប្រជាធិបតេយ្យសេរីបានស្នើឲ្យសមាជិកសភាទាំងនោះផ្តាច់ការទាក់ទងជាមួយអង្គការនិកាយមូន។ តែគឺសមាជិកសភាខ្លួនឯងដែលមានទំនួលខុសត្រូវក្នុងការកាត់ចំណងទាក់ទងជាមួយអង្គការនិកាយមូន។ សម្រាប់គណបក្សប្រឆាំង ការទុករឿងនេះឲ្យសមាជិកសភាជាអ្នកសម្រេចចិត្តដោយខ្លួនឯងនៅមិនទាន់គ្រប់គ្រាន់ទេ។ ចំណែកមតិសាធារណៈបានទាមទារឲ្យធ្វើអ្វីមួយ ពិសេសឲ្យរដ្ឋាភិបាលចុះជួយជនរងគ្រោះពីការអូសទាញរបស់អង្គការនិកាយមូន។
ពិតណាស់សម្រាប់នាយករដ្ឋមន្រ្តីបច្ចុប្បន្នលោកហ្វូមីអូ គីស៊ីដា រឿងរ៉ាវមួយនេះអាចប៉ះពាល់ដល់ប្រជាប្រិយភាពរបស់គាត់។ បើគិតពីសំឡេងឆ្នោត ខ្ញុំមិនគិតថា គណបក្សប្រជាធិបតេយ្យសេរីនឹងទទួលផលវិបាកខ្លាំងពីព្រឹត្តិការណ៍មួយនេះ។ តែលោកគីស៊ីដានៅតែដើរតួនាទីយ៉ាងសំខាន់ យ៉ាងហោចណាស់នៅផ្ទៃក្នុងគណបក្សប្រជាធិបតេយ្យសេរី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ