អាមេរិក និងជប៉ុនពង្រឹងសម្ព័ន្ធយោធាដើម្បីទប់នឹងការគំរាមកំហែងរបស់ចិន កូរ៉េខាងជើង និងរុស្ស៊ី
រដ្ឋមន្រ្តីការពារជាតិអាមេរិកលោកឡយដ៍ អូស្ទីនបានបំពេញទស្សនកិច្ចនៅក្នុងប្រទេសជប៉ុននាថ្ងៃព្រហស្បតិ៍ ទី១ មិថុនានេះ។ គឺជាទស្សនកិច្ចរយៈពេលខ្លី មុននឹងលោកឡយដ៍ អូស្ទីនបន្តដំណើរទៅកាន់ប្រទេសសិង្ហបុរីដើម្បីចូលរួមនៅក្នុងកិច្ចប្រជុំកំពូលស្តីពីសន្តិសុខនាថ្ងៃខាងមុខ។ លោកឡយដ៍ អូស្ទីនបានថ្លែងក្នុងទីក្រុងតូក្យូថា អាមេរិក និងជប៉ុនកំពុងធ្វើការរួមគ្នាដើម្បីធ្វើទំនើបកម្មលើសម្ព័ន្ធភាពយោធារវាងគ្នា។ ដោយឡែក លោកឡយដ៍ អូស្ទីនសម្តែងការសោកស្តាយដែលរដ្ឋមន្រ្តីការពារជាតិចិនបានបដិសេធមិនជួបលោកនាឱកាសកិច្ចប្រជុំកំពូលស្តីពីសន្តិសុខនៅសិង្ហបុរី។
ចុះផ្សាយនៅថ្ងៃ៖
ស្តាប់ - ០២:១៩
វត្តមានរយៈពេលខ្លីនៅក្នុងទឹកដីជប៉ុន រដ្ឋមន្រ្តីការពារជាតិអាមេរិកលោកឡយដ៍ អូស្ទីនបានជួបសន្ទនាជាមួយសមភាគីជប៉ុនលោកយ៉ាស៊ូកាហ្ស៊ូ ហាម៉ាដានៅក្នុងទីក្រុងតូក្យូ។ លោកអូស្ទីនបានរម្លឹកនៅក្នុងកិច្ចសន្ទនានោះថា អាមេរិក និងជប៉ុនបានប្រឈមនឹងបញ្ហាប្រឈមរួមទាក់ទងនឹងអាកប្បកិរិយាបង្ខិតបង្ខំរបស់ចិន ការបង្កហេតុដ៏គ្រោះថ្នាក់របស់កូរ៉េខាងជើង និងសង្រ្គាមដ៏ឃោរឃៅរបស់រុស្ស៊ីនៅអ៊ុយក្រែន។ ប្រមុខការពារជាតិអាមេរិករូបនេះដដែលបានបន្ថែមថា អាមេរិក និងជប៉ុនបានរួបរួមគ្នាដោយផលប្រយោជន៍ និងតម្លៃរួម។ នៅក្នុងន័យនេះ លោកអូស្ទីនបានលើកឡើងពីវិធានការសំខាន់ដើម្បីពង្រឹង និងធ្វើទំនើបកម្មលើសម្ព័ន្ធយោធារវាងអាមេរិក និងជប៉ុន។
បន្ទាប់មក លោកអូស្ទីនមិនភ្លេចសរសើរពីការសម្រេចចិត្តរបស់រដ្ឋាភិបាលជប៉ុនក្នុងការបំពាក់នូវសមត្ថភាពវាយប្រហារតប ត និងធ្វើឲ្យប្រសើរលើការដោះដូរព័ត៌មានជាមួយអាមេរិក។ ក្រៅពីជប៉ុន ប្រមុខការពារជាតិអាមេរិកក៏បានលើកឡើងពីកិច្ចសហប្រតិបត្តិការត្រីភាគីដែលអាមេរិកមានជាមួយអូស្ត្រាលី និងកូរ៉េខាងត្បូងដែរ។ បន្ទាប់ពីជប៉ុន លោកអូស្ទីនបន្តដំណើរទៅកាន់ប្រទេសសិង្ហបុរីដើម្បីចូលរួមនៅក្នុងកិច្ចប្រជុំកំពូលស្តីពីសន្តិសុខនាថ្ងៃខាងមុខក្នុងសប្តាហ៍នេះ។ នាឱកាសនោះ ភាគីអាមេរិកបានស្នើឲ្យមានជំនួបរវាងរដ្ឋមន្រ្តីការពារជាតិអាមេរិក និងចិន។ តែចិនបានបដិសេធលើសំណើរបស់អាមេរិក។
« ខ្ញុំគិតថាវាជារឿងសោកស្តាយ » នេះជាការថ្លែងរបស់រដ្ឋមន្រ្តីការពារជាតិអាមេរិកលោកអូស្តីននៅមុខក្រុមអ្នកកាសែតក្នុងទីក្រុងតូក្យូ។ « អស់លោកធ្លាប់បានឮខ្ញុំនិយាយច្រើនដងពីសារៈសំខាន់សម្រាប់ប្រទេសដែលមានសមត្ថភាពខ្លាំងដើម្បីអាចនិយាយគ្នាបានក្នុងការដោះស្រាយវិបត្តិដោយធ្វើយ៉ាងណាកុំឲ្យស្ថានការណ៍រីករាលដាល និងធ្ងន់ធ្ងរមិនអាចគ្រប់គ្រងបាន »នេះជាការបន្ថែមរបស់លោកអូស្ទីន។ យ៉ាងណាក៏ដោយ លោកអូស្ទីនមិនភ្លេចបញ្ជាក់ពីការស្វាគមន៍ចំពោះគ្រប់ឱកាសដើម្បីមានកិច្ចសន្ទនាជាមួយថ្នាក់ដឹកនាំចិន និងយល់ថា ក្រសួងការពារជាតិអាមេរិក និងចិនគួរតែនិយាយគ្នាឲ្យបានទៀងទាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ