នាយករដ្ឋមន្ត្រីឥណ្ឌាសម្ពោធមន្ទីររដ្ឋសភាថ្មីដោយគ្មានបក្សប្រឆាំង
ពិធីសម្ពោធដាក់ឱ្យប្រើប្រាស់ អគាររដ្ឋសភាឥណ្ឌាថ្មី នៅថ្ងៃទី ២៨ ឧសភា ២០២៣ ប្រព្រឹត្តទៅតាមបែបសាសនានិងបុគ្គលខ្លាំងណាស់។ ដោយហេតុនេះហើយបានជាសមាជិកគណបក្សនយោបាយនៅក្នុងសភា ជិតពាក់កណ្តាល បាននាំគ្នាធ្វើពហិការមិនចូលរួមក្នុងកម្មវិធីសម្ពោធសភាថ្មីនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
មានរាង៦ជ្រុង ឬដូចចេតីយ៍ បើតាមពាក្យបង្អាប់របស់បក្សប្រឆាំង អគាររដ្ឋសភាថ្មី ដែលនឹងមកជំនួសរដ្ឋសភាចាស់ សល់ពីសម័យអាណានិគមនិយមអង់គ្លេស ចំណាស់ជាងមួយសតវត្សរ៍ ជាផ្នែកមួយនៃគម្រោងដ៏មហិមាររបស់រដ្ឋាភិបាលលោកម៉ូឌីដែលចង់ស្តារទិដ្ឋភាពរដ្ឋធានីនិងលុបបំបាត់ស្នាមអាណានិគម។ រដ្ឋសភាថ្មីមិនមែនត្រឹមតែជាសំណង់អគារទេ តែជាវិហារប្រជាធិបតេយ្យដែលឥណ្ឌាចង់ផ្សព្វផ្សាយការពារជូនពិភពលោក ក្នុងនាមជាមាតាប្រជាធិបតេយ្យ។ នេះប្រសាសន៍របស់លោកនាយករដ្ឋមន្ត្រីឥណ្ឌា ណារិនដ្រា មូឌី។
អាចទទួលសមាជិកសភានិងព្រឹទ្ធសភាបានដល់ទៅជាង១២០០នាក់ ពោលគឺធំជាងរដ្ឋសភាមុនពាក់កណ្តាល រដ្ឋសភាថ្មីទំនងជាកំពុងឆ្លើយតបទៅនឹងទស្សនៈវិស័យរបស់អាជ្ញាធរដែលចង់ដំឡើងចំនួនអាសនៈសភា ដើម្បីឱ្យស្របទៅនឹងកំណើនចំនួនប្រជាជន។
ប៉ុន្តែ តំណាងរាស្ត្រនៃ១៩គណបក្សដែលមានអាសនៈនៅក្នុងសភា បានធ្វើពហិការមិនចូលរួមក្នុងកម្មវិធីបើកសម្ពោធអគាររដ្ឋសភាថ្មីនេះទេ ព្រោះពិធីបុណ្យមានលក្ខណៈសាសនា និងបែបលើកតម្កើងបុគ្គលនាយករដ្ឋមន្ត្រី ណារិដ្រាម៉ូឌី ពេក។ បើតាមការបរិហាររបស់បក្សប្រឆាំង ប្រមុខរដ្ឋដែលជាតំណាងអំណាចអព្យាក្រិត្យរបស់ប្រទេស អវត្តមាន មិនបានទទួលការអញ្ជើញមកធ្វើអធិបតីក្នុងពិធីសម្ពោធរដ្ឋសភាទេ តែបែរជាដឹកនាំសម្ពោធដោយលោកម៉ូឌីដែលជាប្រធានគណបក្សកាន់អំណាចទៅវិញ។
កម្មវិធីសម្ពោធ បានចាប់ផ្តើមតាមគន្លងសាសនាឥណ្ឌូសុទ្ធសាធ បន្ទាប់មកទើបមានប្រមុខសាសនាផ្សេងៗទៀត សូត្រប្រសិទ្ធិពរតាមក្រោយ។ ប្រមុខសាសនាឥណ្ឌូ បានប្រគល់ដំបងជ័យ ដែលជានិម្មិត្តរូបនៃការផ្ទេរអំណាចពីព្រះមកឱ្យក្សត្រគ្រប់គ្រងប្រទេស ទៅឱ្យលោកនាយករដ្ឋមន្ត្រីម៉ូឌី។ សម្រាប់បក្សប្រឆាំង កាយវិការនេះ ជាសារថ្មីមួយបន្ថែមទៀតដែលបញ្ជាក់ថារដ្ឋាភិបាលកំពុងកែប្រែទម្រង់នយោបាយដឹកនាំប្រទេសបែបប្រជាធិបតេយ្យទៅជារបបរាជានិយមម៉ូឌី។ ពេលនេះ ដំបងជ័យត្រូវបានយកទៅបញ្ឈរនៅក្បែរអាសនៈរបស់ប្រធានសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ