រុស្ស៊ី៖ការផ្គត់ផ្គង់ថាមពលរបស់រុស្ស៊ីទៅឲ្យចិននឹងកើនចំនួន ៤០% ក្នុងឆ្នាំ ២០២៣ ធៀបនឹងឆ្នាំ ២០២២
នៅថ្ងៃអង្គារ ទី២៣ ឧសភា ឧបនាយករដ្ឋមន្រ្តីរុស្ស៊ីលោកមីខាអ៊ីល មីឈូស្ទីនបានចូលរួមនៅក្នុងវេទិកាសេដ្ឋកិច្ចចិន រុស្ស៊ីរៀបចំក្នុងក្រុងសៀងហៃ ប្រទេសចិន។ ក្រៅពីវត្តមានរបស់លោកមីខាអ៊ីល វេទិកាសេដ្ឋកិច្ចមួយនេះក៏មានការចូលរួមពីក្រុមអ្នកជំនួញរុស្ស៊ីគ្រាក់ៗដែលបានជាប់ទណ្ឌកម្មបស្ចិមលោក រួមទាំងឧបនាយករដ្ឋមន្រ្តីរុស្ស៊ីម្នាក់ទៀតទទួលបន្ទុកផ្នែកថាមពលលោកអាឡិចសង់ ណូវ៉ាក់។ តាមលោកអាឡិចសង់ ណូវ៉ាក់ ការផ្គត់ផ្គង់ថាមពលរបស់រុស្ស៊ីទៅឲ្យចិននឹងកើនចំនួន ៤០% ក្នុងឆ្នាំ ២០២៣ ធៀបនឹងឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:១៧
លោកអាឡិចសង់ ណូវ៉ាក់បានថ្លែងយ៉ាងដូចនេះនៅក្នុងជំនួបជាមួយក្រុមសហគ្រិនរុស្ស៊ីនៅក្នុងទីក្រុងសៀហៃ។ អ្វីដែលលោកអាឡិចសង់ ណូវ៉ាក់បានលើកឡើងអាចជារឿងមិនភ្ញាក់ផ្អើល ព្រោះតាំងពីជាប់ទណ្ឌកម្មបស្ចិមលោកក្នុងរឿងសង្រ្គាមអ៊ុយក្រែនមក រុស្ស៊ីហាក់មិនសូវមានផ្លូវច្រើនដើម្បីនាំចេញប្រេង និងឧស្ម័នរបស់ខ្លួនទេ។ ក្នុងនាមជាសម្ព័ន្ធនមិត្តចាក់ទឹកមិនលេចរបស់រុស្ស៊ី ចិនបានក្លាយជាអតិថិជនទី១ ដែលបានទិញថាមពលរុស្ស៊ីច្រើនជាងគេក្នុងឆ្នាំ ២០២២។ ដៃគូយុទ្ធសាស្រ្តក្នុងវិស័យថាមពលនេះបានកើនរឹតតែខ្លាំងនារយៈពេលចុងក្រោយ។
តាមឧបនាយករដ្ឋមន្រ្តីរុស្ស៊ីទទួលបន្ទុកផ្នែកថាមពលលោកអាឡិចសង់ ណូវ៉ាក់ ការនាំប្រេង និងឧស្ម័នរុស្ស៊ីទៅកាន់ចិននឹងកើនចំនួន ៤០% ក្នុងឆ្នាំ ២០២៣ ធៀបនឹងឆ្នាំ ២០២២។ គួររម្លឹកថា នៅក្នុងជំនួបកំពូលកាលពីខែមីនាក្នុងក្រុងមូស្គូ ប្រធានាធិបតីចិនលោកស៊ី ជីនពីន និងសមភាគីរុស្ស៊ីលោកពូទីនបានអួតអាងពីទំនាក់ទំនងពិសេសរួមគ្នាប្រឈមនឹងបស្ចិមលោក។ នាឱកាសនោះ មេដឹកនាំទាំងពីរចង់សាងសង់បំពង់បង្ហូរឧស្ម័នស៊ីបេរីទី២ ដែលតភ្ជាប់រវាងតំបន់ស៊ីបេរី និងខេត្តស៊ីនជាំងរបស់ចិន។ តាមរយៈអនាគតបំពង់បង្ហូរឧស្ម័នមួយនេះ រុស្ស៊ីអាចបង្កើនការនាំឧស្ម័នទៅកាន់ចិន។
តាមពិត រុស្ស៊ីធ្លាប់បានបញ្ជូនទៅឲ្យចិននូវប្រេង និងឧស្ម័នតាមរយៈបំពង់បង្ហូរឧស្ម័នស៊ីបេរីទី១។ សម្រាប់ចិន ថាមពលទាំងនេះជារឿងចាំបាច់មិនអាចខ្វះបានដើម្បីចិញ្ចឹមបំប៉នកំណើនសេដ្ឋកិច្ចរបស់ខ្លួន។ ដោយឡែក ឧបនាយករដ្ឋមន្រ្តីរុស្ស៊ីទទួលបន្ទុកផ្នែកថាមពលលោកអាឡិចសង់ ណូវ៉ាក់បានបន្ថែមថា រុស្ស៊ីកំពុងចរចាជាមួយដៃគូដើម្បីទិញគ្រឿងផ្សំឧបករណ៍បច្ចេកវិទ្យាដែលរុស្ស៊ីកំពុងជួបបញ្ហា។ គួរបញ្ជាក់ថា តាំងពីជាប់ទណ្ឌកម្មបស្ចិមលោកក្នុងសង្រ្គាមអ៊ុយក្រែន រុស្ស៊ីបានប្រឈមនឹងការខ្វះគ្រឿងផ្សំឧបករណ៍បច្ចេកវិទ្យា ដូចយ៉ាងសឺមីកុងឌុចទ័រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ