ប្រមុខអង្គការសហប្រជាជាតិបរិហារលើការរឹតត្បិតសិទ្ធិស្រ្តី និងក្មេងស្រីរបស់ពួកតាលីបង់នៅអាហ្វហ្កានីស្ថាន
នៅក្នុងទីក្រុងដូហា ប្រទេសកាតា កិច្ចប្រជុំស្តីពីអាហ្វហ្កានីស្ថានរៀបចំដោយអង្គការសហប្រជាជាតិរយៈពេល ២ថ្ងៃបានបិទបញ្ចប់នាថ្ងៃអង្គារ ទី២ ឧសភា។ កិច្ចប្រជុំនេះបានចូលរួមដោយ ២៥ប្រទេស និងអង្គការអន្តរជាតិ តែគ្មានរដ្ឋាភិបាលអាហ្វហ្កានីស្ថានដឹកនាំដោយពួកតាលីបង់ទេ។ កម្មវត្ថុសំខាន់នៃកិច្ចប្រជុំរយៈពេល ២ថ្ងៃ គឺស្វែងរកផ្លូវមួយដើម្បីអាចជជែក និងធ្វើការជាមួយពួកតាលីបង់ដោយប្រយោល។ គួរបញ្ចាក់ថា តាំងពីពួកតាលីបង់បានចូលកាន់អំណាចនៅអាហ្វហ្កានីស្ថានក្នុងថ្ងៃទី១៥ សីហាមក គ្មានប្រទេសណាមួយបានទទួលស្គាល់របបមួយនេះទេ។ តែដើម្បីអាចជួយប្រជាជនអាហ្វហ្កានីស្ថានក្នុងផ្លូវមនុស្សធម៌បាន សហគមន៍អន្តរជាតិបានធ្វើការជាមួយបណ្តាអង្គការក្រៅរដ្ឋាភិបាលជាតិ និងអន្តរជាតិដែលមានវត្តមាននៅអាហ្វហ្កានីស្ថាន។ ថ្លែងនៅក្នុងថ្ងៃកិច្ចប្រជុំចុងក្រោយ អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍បានប្តេជ្ញាធ្វើការដើម្បីជួយប្រជាជនអាហ្វហ្កានីស្ថានគ្រប់រូប។ តែលោកមិនភ្លេចបរិហារពីការរឹតត្បិតលើសិទ្ធិស្រ្តី និងក្មេងស្រីអាហ្វហ្កានីស្ថានរបស់ពួកតាលីបង់ទេ។
ចុះផ្សាយនៅថ្ងៃ៖
ស្តាប់ - ០១:៣៧
« កិច្ចប្រជុំរបស់យើងផ្តោតលើការបង្កើតឲ្យមានគោលការណ៍អន្តរជាតិរួមមួយដើម្បីអាចជជែក និងធ្វើការជាមួយរដ្ឋអំណាចតាលីបង់។ តែគោលការណ៍អន្តរជាតិរួមនេះមិនមែនជាការទទួលស្គាល់របបតាលីបង់ទេ។ អ្វីដែលសំខាន់ គឺយើងយល់ពីក្តីកង្វល់ និងពីដែនកំណត់របស់យើងម្នាក់ៗ។ តែយើងក៏បានយល់ស្របថា វាជាផលប្រយោជន៍របស់ទាំងអស់គ្នា ពិសេស និងមុនគេគឺប្រជាជនអាហ្វហ្កានីស្ថានដែលយើងត្រូវធ្វើការជាមួយ។
បុគ្គលិកភាគច្រើនរបស់យើងដែលបានបម្រើការឲ្យយើងក្នុងការផ្តល់ជំនួយចាំបាច់ដល់ប្រជាជនអាហ្វហ្កានីស្ថានជាជនជាតិអាហ្វហ្កានីស្ថាន។ ក្នុងចំណោមបុគ្គលិករបស់យើងជាជនជាតិអាហ្វហ្កានីស្ថានទាំងនេះ មានភាគច្រើនជាស្រ្តីភេទដែលបម្រើការក្នុងផ្លូវមនុស្សធម៌។ ដូច្នេះ ការហាមមិនឲ្យស្រ្តីអាហ្វហ្កានីស្ថានធ្វើការឲ្យអង្គការសហប្រជាជាតិ អង្គការក្រៅរដ្ឋាភិបាលជាតិ និងអន្តរជាតិជារឿងមិនអាចទទួលយកបាន និងដាក់ជីវិតពួកគេឲ្យប្រឈមនឹងគ្រោះថ្នាក់។
សូមបញ្ជាក់ឱ្យបានច្បាស់នៅទីនេះថា យើងនឹងមិនឈរឱបដៃមើលដោយស្ងៀមស្ងាត់ឡើយនូវចំពោះមុខការវាយប្រហារប្រឆាំងជាប់ជាប្រចាំ និងមិនធ្លាប់មានពីពេលមុនទៅលើសិទ្ធិស្ត្រី និងក្មេងស្រី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ