តើទំនាក់ទំនងរវាងជប៉ុន និងកូរ៉េខាងត្បូងក្នុងជំនាន់លោកគីស៊ីដា និងលោកយូននឹងអាចមានភាពប្រសើរឡើងដែរ ឬទេ?
នាយករដ្ឋមន្រ្តីជប៉ុនលោកហ្វូមីអូ គីស៊ីដាកំពុងបន្តទស្សនកិច្ចមួយជុំទ្វីបអាហ្រ្វិក។ តែក្នុងពេលដែលលោកគីស៊ីដាកំពុងស្ថិតនៅទ្វីបអាហ្រ្វិក រដ្ឋាភិបាលជប៉ុន និងរដ្ឋាភិបាលកូរ៉េខាងត្បូងបានបញ្ជាក់ក្នុងថ្ងៃអង្គារ ទី២ ឧសភានេះថា លោកគីស៊ីដានឹងទៅបំពេញទស្សនកិច្ចនៅកូរ៉េខាងត្បូងរយៈពេល ២ថ្ងៃដោយចាប់ផ្តើមពីថ្ងៃអាទិត្យ ទី៧ ឧសភាចុងសប្តាហ៍នេះ។ គម្រោងទស្សនកិច្ចរបស់លោកគីស៊ីដានៅកូរ៉េខាងត្បូងធ្វើឡើងចំពេលដែលទំនាក់ទំនងរវាងក្រុងតូក្យូ និងក្រុងសេអ៊ូលកំពុងស្គាល់ភាពចម្រូងចម្រាសខ្លាំងដោយរឿងរ៉ាវប្រវត្តិសាស្រ្ត។
ចុះផ្សាយនៅថ្ងៃ៖
ស្តាប់ - ០១:៥៨
បើអ្វីៗនឹងប្រព្រឹត្តិទៅដូចដែលបានគ្រោងទុកមែន លោកគីស៊ីដាជានាយករដ្ឋមន្រ្តីជប៉ុនទី១ ដែលនឹងដាក់ជើងជាន់ដីកូរ៉េខាងត្បូងគិតតាំងពីឆ្នាំ ២០១៨។ តែគេមិនត្រូវភ្លេចនិយាយទេថា គម្រោងទស្សនកិច្ចនេះជាលទ្ធផលបានមកពីជំនួបរវាងលោកគីស៊ីដា និងប្រធានាធិបតីលោកយូន ស៊ុកយោលក្នុងទីក្រុងតូក្យូកាលពីពាក់កណ្តាលខែមីនាកន្លងទៅថ្មីៗនេះ។ នាឱកាសជំនួបពេលនោះ លោកគីស៊ីដា និងលោកយូនបានសម្រេចលើកចេញវិញនូវវិធានការរឹតបន្តឹងពាណិជ្ជកម្មរវាងប្រទេសទាំងពីរ។
តាមពិត ព័ត៌មានស្តីពីគម្រោងទស្សនកិច្ចរបស់លោកគីស៊ីដានៅកូរ៉េខាងត្បូងត្រូវបានលោកគីស៊ីដាប្រកាសប្រាប់ក្រុមអ្នកកាសែតក្នុងថ្ងៃអង្គារ ទី២ ឧសភានាដំណើរទស្សនកិច្ចនៅប្រទេសហ្កាណា។ បន្តិចក្រោយមក រដ្ឋាភិបាលជប៉ុន និងកូរ៉េខាងត្បូងក៏បានបញ្ជាក់ជាផ្លូវការលើព័ត៌មានមួយនេះ។ លោកគីស៊ីដាបានថ្លែងថា ទស្សនកិច្ចរបស់លោកនៅកូរ៉េខាងត្បូងជាឱកាសដ៏ល្អសម្រាប់ការផ្លាស់ប្តូរទស្សនៈត្រង់ទៅ ត្រង់មកដើម្បីពន្លឿនទំនាក់ទំនងរវាងជប៉ុន និងកូរ៉េខាងត្បូង រួមទាំងការវិវត្តន៍យ៉ាងឆាប់រហ័សនូវស្ថានការណ៍អន្តរជាតិ។
អ្វីដែលលោកគីស៊ីដាសង្ឃឹមពីទស្សនកិច្ចនៅកូរ៉េខាងត្បូងនាពេលខាងមុខ គឺការផ្តល់សន្ទុះថ្មីដល់នាវាការទូតរវាងប្រទេសទាំងពីរ។ គួរបញ្ជាក់ថាក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងជប៉ុន និងកូរ៉េខាងត្បូងត្រូវបានបំពុលដោយរឿងរ៉ាវប្រវត្តិសាស្រ្តសល់ពីសម័យអាណានិគមជប៉ុនលើឧបទ្វីបកូរ៉េចន្លោះឆ្នាំ ១៩១០ ១៩៤៥ ពិសេសទាក់ទងនឹងទាហានជប៉ុនបង្ខំស្រ្តីកូរ៉េឲ្យបម្រើផ្លូវភេទក្នុងសម័យសង្រ្គាមលោកលើកទី២ និងការបង្ខំពលករកូរ៉េឲ្យធ្វើការបម្រើក្រុមហ៊ុនជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ