កូរ៉េខាងជើង៖ កិច្ចព្រមព្រៀងនុយក្លេអ៊ែរអាមេរិក-កូរ៉េខាងត្បូង ធ្វើឱ្យកាន់តែមានគ្រោះថ្នាក់ធំ
នៅថ្ងៃសៅរ៍ ទី២៩មេសា ថ្នាក់ដឹកនាំរដ្ឋបាលទីក្រុងព្យុងយ៉ាង បានវាយប្រហារពាក្យសម្តីថា កិច្ចព្រមព្រៀងនុយក្លេអ៊ែរ រវាងរដ្ឋបាលទីក្រុងវ៉ាស៊ីនតោននិងសេអ៊ូល ដែលចុះហត្ថលេខាពីពេលថ្មីៗនេះ គឺនឹងជំរុញធ្វើឱ្យ«កាន់តែមានគ្រោះថ្នាក់ខ្លាំង»។ នេះជាការប្រកាសរបស់ប្អូនស្រីនៃប្រមុខដឹកនាំផ្តាច់ការកូរ៉េខាងជើង ដែលបានវាយបកទៅនឹងដំណើរទស្សនកិច្ចរបស់ប្រធានាធិបតីកូរ៉េខាងត្បូង ទៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:១៣
កិច្ចព្រមព្រៀង រវាង ប្រធានាធិបតីកូរ៉េខាងត្បូង និងសហររដ្ឋអាមេរិក គឺត្រូវ ថ្នាក់ដឹកនាំកូរ៉េខាងជើង មើលឃើញថា ជាទង្វើដែលនាំឱ្យផ្ទុះ«គ្រោះថ្នាក់ធំ» ប៉ះពាល់ដល់សន្តិភាពនិងសន្តិសុខនៅក្នុងតំបន់អាស៊ី ក៏ដូចជាក្នុងពិភពលោក។ ចំពោះកូរ៉េងខាងជើង ទង្វើរបស់សេអ៊ូល និងវ៉ាស៊ីនតោន គឺមិនគួរឲ្យស្វាគមន៍ទាល់តែសោះ។ សកម្មភាពប្រឆាំងរបស់ប្រទេសទាំង២នេះ គឺមានចេតនាវិទ្ធង្សនាចង់លុបបំបាត់របបដឹកនាំក្រុងព្យុយ៉ាង ដូច្នេះហើយ ព្យុយ៉ាង គ្មានជម្រើសអ្វី ក្រៅតែពី ខំប្រឹងសម្រិតសម្រាំងគម្រោងសព្វាវុធនុយក្លេអ៊ែររបស់ខ្លួនឲ្យកាន់តែប្រសើរឡើងតែប៉ុណ្ណោះ។ ទាំងនេះជាប្រសាសន៍របស់អ្នកស្រី គីម យូជុង ប្អូនស្រីបង្កើតរបស់ ប្រធានាធិបតីកូរ៉េខាងជើង ដែលត្រូវសារព័ត៌មានរដ្ឋ KCNA ផ្សព្វផ្សាយ។
ប្រតិកម្មរិះគន់ពីសំណាក់ថ្នាក់ដឹកនាំរបបក្រុងព្យ៉ុងយាង គឺក្រោយពី អាមេរិកនិងកូរ៉េខាងត្បូង បានចុះកិច្ចព្រមព្រៀង នៅថ្ងៃពុធ ស្តីពី ការពង្រឹងកិច្ចសហប្រតិបត្តិយោធាឲ្យកាន់តែខ្លាំង ហើយនិងអនុញ្ញាតឲ្យ នាវាចម្បាំងមុជទឹកអាមេរិកបំពាក់ដោយអាវុធបរមាណូ ចុះចតនៅកូរ៉េខាងត្បូង។ ចំណុចនេះ សម្រាប់កូរ៉េខាងខាងជើង គឺជាគំរាមកំហែងសុវត្ថិភាពដ៏ខ្លាំង ដែលបណ្តាលឲ្យ អ្នកស្រី គីម យូជុង ខឹងខ្ញាល់ និងថែមទាំងហ៊ានប្រមាថតែម្តង ដល់ បុគ្គលផ្ទាល់ថ្នាក់ដឹកនាំអាមេរិកនិងកូរ៉េខាងត្បូង។ ចំពោះលោកប្រធានាធិបតីអាមេរិក ចូ បៃដិន ដែលមានអាយុ៨០ឆ្នាំ គឺត្រូវ អ្នកស្រី គីម យូជុង ចាត់ទុកថា ជា «តាចាស់ គ្មានអនាគត» ហើយនិងចំអកទៀតថា «លោកចាស់ខ្លាំងពេក មិនអាចនឹងនៅបញ្ចប់អាណត្តិដឹកនាំ២ឆ្នាំទៀតទេ»។ ចំណែកបុគ្គលលោកប្រធានាធិបតីកូរ៉េខាងត្បូង យូន ស៊ុកយោល ក៏ត្រូវអ្នកស្រី គីម យូជុង មើលងាយថាជា«មនុស្សល្ងង់ភ្លីភ្លើ»។
សម្តីប្រមាថកាតទានទាំងអស់នេះ ត្រូវភាគីកូរ៉េខាងត្បូង តាមរយៈ ក្រសួងទទួលបន្ទុកសម្របសម្រួលទំនាក់ទំនងកូរ៉េទាំងពីរ លើកឡើងថាជា «ភាសាមិនសមរម្យ មិនពីរោះពីសា» ហើយនិងបង្ហាញពី «ភាពទន់ខ្សោយរបស់កូរ៉េខាងជើង»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ