ប្រមុខការទូតអាមេរិកទៅវៀតណាម ក្នុងបរិបទតានតឹងខ្លាំងជាមួយចិន
ថ្ងៃសៅរ៍ ទី១៥មេសា រដ្ឋមន្ត្រីការបរទេសសហរដ្ឋអាមេរិក លោក អង់តូនី ប្ល៊ីងកិន អញ្ជើញបំពេញទស្សនកិច្ចនៅប្រទេសវៀតណាម។ ដំណើរមកកាន់ទីក្រុងហាណូយ លើកនេះ គឺជួនចំពេលដែលរដ្ឋបាលទីក្រុងវ៉ាស៊ីនតោន ជួបប្រទះភាពតានតឹងខ្លាំងជាមួយ រដ្ឋបាលក្រុងប៉េកាំង ជុំវិញសំណុំរឿងកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:០១
គោលបំណងនៃដំណើរទស្សនកិច្ចរបស់លោក អង់តូនី ប្ល៊ីងកិន នៅរដ្ឋធានីហាណូយ ត្រូវក្រសួងការបរទេសអាមេរិកបង្ហើបថា ប្រមុខការទូតនឹងលើកឡើងពីចក្ខុវិស័យរួមគ្នាក្នុងតំបន់ឥណ្ឌូប៉ាស៊ីហ្វិក ដែលចង់ឃើញតំបន់នេះ មានវិបុលភាព និងសន្តិភាព។
នេះគឺជាលើកទី១ហើយ ដែលប្រមុខការទូតសហរដ្ឋអាមេរិក បានអញ្ជើញ ដោយផ្ទាល់ ទៅវៀតណាម តាំងពីលោក អង់តូនី ប្ល៊ីងកិន ចូលកាន់តំណែង ២ ឆ្នាំមក។ ប៉ុន្តែពុំមែនជាលើកទី១ទេ សម្រាប់ថ្នាក់ដឹកនាំអាមេរិកក្នុងរដ្ឋបាលរបស់លោក ចូ បៃដិន ដ្បិតថា អនុប្រធានាធិបតីអាមេរិក អ្នកស្រី កាំមីឡា ហារីស បានអញ្ជើញទៅវៀតណាមរួចម្តងហើយ។ ហើយកាលពីសប្តាហ៍មុនទៀតសោត ប្រធានាធិបតីអាមេរិក លោក ចូ បៃដិន និងប្រធានាធិបតីវៀតណាម លោកង្វៀន ភូចុង ក៏ថែមបានជែកគ្នាតាមទូរស័ព្ទទៀតផង។
វៀតណាម ដែលជាអតីតគូសត្រូវរបស់សហរដ្ឋសហអាមេរិក ក្នុងទសវត្សរ៍១៩៧០ បរិបទសម័យសង្គ្រាមត្រជាក់។ ក្រោយមក វៀតណាម កុម្មុយនិស្តសង្គម និងសហរដ្ឋអាមេរិក ប្រជាធិបតេយ្យ ធាតុពីរខុសគ្នា តែអាចខិតទៅរកជិតគ្នាបាន ដ្បិតមានសត្រូវរួមមួយ គឺ ចិន។ ចិន ជាប់ព្រំដែនវៀតណាម នៅត្រង់ប៉ែកខាងជើង និងដែលជាដៃគូសេដ្ឋកិច្ចចម្បងមួយរបស់វៀតណាម តែរដ្ឋបាលក្រុងហាណូយ និងប៉េកាំង ឈ្លោះគ្នាក្នុងសំណុំរឿងសមុទ្រចិនខាងត្បូង។
លោក Khang Vu បេក្ខបណ្ឌិតជំនាញសន្តិសុខអន្តរជាតិ បានវិភាគប្រាប់ទីភ្នាក់ព័ត៌មានបារាំងAFP ថា សហរដ្ឋអាមេរិក ត្រូវការវៀតណាម ដើម្បីប្រឈមមុខនឹងចិន នៅក្នុងជម្លោះសមុទ្រចិនខាងត្បួង។ ប៉ុន្តែ យកល្អ វៀតណាម ត្រូវរក្សាទំនាក់ទំនងល្អជាមួយ ចិន។ ហើយរដ្ឋាភិបាលវៀតណាម ក៏បានដឹងច្បាស់ថានឹងគ្មានផ្លូវឈ្នះចិនតាមផ្លូវកម្លាំងយោធាទេ។ នេះបើតាមបេក្ខបណ្ឌិតលោក Khang Vu នៅសកលវិទ្យា Boston។
តាមគម្រោង លោក អង់តូនី ប្ល៊ីងកិន នឹងធ្វើជាអធិបតី ក្នុងពិធីសម្ពោធចាក់គ្រឹះសាងសង់ស្ថានទូតអាមេរិកថ្មី នៅរដ្ឋធានីហាណូយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ