សហរដ្ឋអាមេរិកនិងហ្វីលីពីនធ្វើមហាសមយុទ្ធបាញ់គ្រាប់ពិត ក្នុងសមុទ្ទចិនខាងត្បូង
ក្នុងខណៈដែលអាមេរិកនិងសម្ព័ន្ធមិត្តនៅអាស៊ីអាគ្នេយ៍កំពុងស្វែងរកវិធីទប់ឥទ្ធិពលចិន នៅថ្ងៃអង្គារទី ១១មេសានេះ ហ្វីលីពីននិងសហរដ្ឋអាមេរិកបានចាប់ផ្តើមធ្វើមហាសមយុទ្ធដ៏សំខាន់ មិនធ្លាប់មានក្នុងប្រវត្តិសមយុទ្ធប្រចាំឆ្នាំរបស់សម្ព័ន្ធមិត្តយោធាទាំងពីរ។ ជាលំហាត់សមដ៏ធំ ទាំងបរិមាណទាំងគុណភាព។
ចុះផ្សាយនៅថ្ងៃ៖
ស្តាប់ - ០២:០៨
ជាសរុបមានទាហានចូលរួមធ្វើលំហាត់សមប្រមាណជាង១៨០០០នាក់ (១២២០០ខាងអាមេរិក និង៥៤០០ខាងហ្វីលីពីន ព្រមទាំង១០០នាក់ជាទាហានអូស្ត្រាលី) ពោលគឺច្រើនជាងឆ្នាំមុនពីរដង។ ហើយជាលើកទីមួយនៃប្រវត្តិសមយុទ្ធរបស់សម្ព័ន្ធមិត្តទាំងពីរ លំហាត់សឹករយៈពេលពីរសប្តាហ៍នេះ មានបាញ់គ្រាប់ពិត ទៅក្នុងសមុទ្ទចិនខាងត្បូង ដែលប៉េកាំងទាមទារគ្រប់គ្រងស្ទើរផ្តាច់មុខម្នាក់ឯង និងមានការប្រើមីស៊ីលPatriot ដែលជាប្រព័ន្ធខែលមីស៊ីលការពារដែនអាកាសដ៏ល្អជាងគេនៅលើពិភពលោក។
ចាប់ផ្តើមតែមួយថ្ងៃក្រោយពីចិនបានបិទបញ្ចប់ប្រតិបត្តិការយោធាបីថ្ងៃដែលជាសមយុទ្ធបែបវាយឡោមព័ទ្ធតៃវ៉ាន់ សមយុទ្ធបាលីកាតាន ដែលមានន័យ “ទន្ទឹមគ្នា” គ្រោងមាន ហាត់ ចុះចតឧទ្ធម្ភាគចក្រយោធា នៅលើខាងជើងបំផុតនៃកោះហ្វីលីពីន ចម្ងាយតែប្រមាណ៣០០គីឡូម៉ែត្រពីកោះតៃវ៉ាន់ ដែលចិនតែងចាត់ទុកដែនដីមួយចំណែករបស់ខ្លួន។ នាវាចម្បាំង នាវាផ្ទុកយន្តហោះចិន ជាច្រើនគ្រឿងដែលមកធ្វើសមយុទ្ធនោះ នៅមិនទាន់ចាកចេញឆ្ងាយពីតំបន់ជុំវិញកោះតៃវ៉ាន់ផង នៅថ្ងៃអង្គារនេះ។ នេះបើតាមប្រភពមកពីតៃប៉ិ។
សមយុទ្ធប្រចាំឆ្នាំនេះ មានកម្មវត្ថុហាត់ប្រើតាកទិក ប្រើបច្ចេកវិទ្យា និងដំណើរបែបបទនៃប្រតិបត្តិការយោធាមួយធំ ព្រមទាំងបង្កើនសមត្ថភាព សហការគ្នា ឱ្យបានកាន់តែប្រសើរឡើងដើម្បីដោះស្រាយបញ្ហាប្រឈមនានាលើពិភពលោក។ នេះបើតាមការគូសបញ្ជាក់របស់នាយឧត្តមសេនីយ៍កងទ័ពជើងទឹកអាមេរិកនិងអ្នកនាំពាក្យយោធាហ្វីលីពីន នៅក្នុងកម្មវិធីសម្ពោធបើកសមយុទ្ធ។ នេះក៏ជាសមយុទ្ធលើកទីមួយ សម្រាប់ហ្វីលីពីន របស់លោកប្រធានាធិបតី ហ្វែរឌីណង់ មាកូស ជូញ៉ដែរ។ លោក មាកូស ជូញ៉ ចង់កែខៃទំនាក់ទំនងជាមួយអាមេរិកដែលអាក់អន់ខ្លាំងក្រោមការដឹកនាំរបស់លោក ឌុយទែរតេ។ កាលពីដើមខែមេសា រដ្ឋាភិបាលហ្វីលីពីន បានព្រមព្រៀង ប្រគល់ឱ្យអាមេរិកប្រើប្រាស់មូលដ្ឋានទ័ពចំនួនបួនបន្ថែមទៀត ក្នុងនោះ មានមួយស្ថិតនៅជិតកោះតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ