ហ្វីលីពីន អនុញ្ញាតឲ្យកងទ័ពអាមេរិក ប្រើប្រាស់មូលដ្ឋានទ័ពចំនួន៤ទីតាំងទៀត
រដ្ឋាភិបាលហ្វ៊ីលីពីន បានប្រកាសថា នឹងបើកមូលដ្ឋានទ័ពរបស់ខ្លួន ចំនួន៤ទីតាំងទៀត ឲ្យកងទ័ពអាមេរិកប្រើប្រាស់។ ក្នុងចំណោមមូលដ្ឋានទ័ពថ្មីទាំងនេះ គឺមាន១ទីតាំងស្ថិតនៅភាគខាងជើងហ្វ៊ីលីពីន កៀកនឹងកោះតៃវ៉ាន់ ហើយមានមួយទីតាំង ស្ថិតនៅក្បែរសមុទ្រចិនខាងត្បូង។ សម្ព័ន្ធភាពយោធាកាន់តែស្អិតរមួត រវាងហ្វ៊ីលីពីន និងអាមេរិកនេះ ត្រូវបានចិនរិះគន់ជាខ្លាំង ថាអាមេរិកកំពុងតែប្រើប្រាស់ដែនដីតំបន់នេះ ដើម្បីឡោមព័ទ្ធចិន។
ចុះផ្សាយនៅថ្ងៃ៖
ស្តាប់ - ០២:២០
យោងតាមលិខិតប្រកាស របស់រដ្ឋាភិបាលហ្វ៊ីលីពីន គឺលោកប្រធានាធិបតី Ferdinand Marcos Junior បានសម្រេចយល់ព្រម បើកទ្វារមូលដ្ឋានទ័ពចំនួន៣នៅភាគខាងជើងហ្វ៊ីលីពីន ដើម្បីឲ្យកងទ័ពអាមេរិកប្រើប្រាស់។ ក្នុងចំណោមទីតាំង៣នេះ គឺមានបន្ទាយទាហាន នៅខេត្ត Isabela ព្រលានយន្តហោះមួយ និងមូលដ្ឋានទ័ពជើងទឹក Santa Ana ស្ថិតនៅក្នុងខេត្ត Cagayan ដែលស្ថិតនៅចំងាយប្រមាណ ៤០០គីឡូម៉ែត្រ ពីកោះតៃវ៉ាន់។ ចំណែកមូលដ្ឋានទ័ពទី៤ ស្ថិតនៅតំបន់ប្រជុំកូនកោះ Balabac ដែលស្ថិតនៅខាងត្បូងចុងបង្អស់ នៃកោះPalawan។ តំបន់នេះ ស្ថិតនៅជាប់សមុទ្រចិនខាងត្បូង ហើយនៅកៀកបំផុត និងប្រជុំកោះ Spratleys ដែលចិនកំពុងតែសាងសង់មូលដ្ឋានទ័ព។
សូមរំលឹកថា អាមេរិក និងហ្វ៊ីលីពីន គឺជាសម្ព័ន្ធមិត្តនឹងគ្នាយូរលង់មកហើយ។ សម្ព័ន្ធភាពដែលត្រូវបានពង្រឹងខ្លាំងក្នុងវិស័យយោធា តាមរយៈសន្ធិសញ្ញាការពារជាតិ និងកិច្ចព្រមព្រៀងសហប្រតិបត្តិការកងទ័ព ចុះនៅឆ្នាំ២០១៤។ តាមរយៈការកិច្ចព្រមព្រៀងនេះ កងទ័ពអាមេរិកអាចប្រើប្រាស់មូលដ្ឋានទ័ពហ្វ៊ីលីពីន ចំនួន៥ទីតាំងរួចហើយ ដើម្បីឈរជើងនៅក្នុងតំបន់អាស៊ីប៉ាស៊ីហ្វិក។
កាលពីខែកុម្ភៈកន្លងទៅ លោក Lloyd Austin រដ្ឋមន្ត្រីក្រសួងការពារជាតិអាមេរិក បានទៅហ្វ៊ីលីពីន ដើម្បីនិយាយពីការបើកមូលដ្ឋានទ័ពហ្វ៊ីលីពីន ឲ្យកងទ័ពអាមេរិកប្រើប្រាស់បន្ថែមទៀត ដោយយោងទៅលើកាលៈទេសៈកាន់តែតានតឹងខ្លាំង ជាមួយនឹងសកម្មភាពគំរាមពីសំណាក់ចិន មកលើតំបន់សមុទ្រចិនខាងត្បូង និងកោះតៃវ៉ាន់។ ខុសពីរដ្ឋាភិបាលមុនដឹកនាំដោយលោក ឌូទែរតេ រដ្ឋាភិបាលថ្មីហ្វ៊ីលីពីន ដឹកនាំដោយលោក Ferdinand Marcos Junior បានបង្ហាញជំហរយ៉ាងច្បាស់ ក្នុងការពួតដៃគ្នាជាមួយអាមេរិក ការពារសន្តិសុខ និងទប់ទល់ចំពោះសកម្មភាពវាទទីរបស់ចិន។
គួរបញ្ជាក់ដែរថា បច្ចុប្បន្ននេះ មានទាហានអាមេរិកចំនួនប្រមាណ៥០០នាក់ កំពុងឈរជើងប្រចាំនៅហ្វ៊ីលីពីន និងទាហានជាច្រើននាក់ទៀត ដែលចល័តនៅហ្វ៊ីលីពីន ក្នុងក្របខណ្ឌសមយុទ្ធរួមគ្នា ជារៀងរាល់ឆ្នាំ។ កន្លងមក អគ្គរដ្ឋទូតចិនប្រចាំនៅម៉ានីល បានរិះគន់យ៉ាងខ្លាំងចំពោះសម្ព័ន្ធភាពយោធា រវាងអាមេរិក និងហ្វ៊ីលីពីន ដែលចិនចាត់ទុកថា ជាការរាយសំណាញ់ឡោមព័ទ្ធចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ