ចិន៖គម្រោងជប៉ុនក្នុងការរឹតបន្តឹងការនាំចេញឧបករណ៍សឺមីកុងឌុកទ័រជាការរុញចិនឲ្យមានស្វ័យភាព
រដ្ឋមន្រ្តីការបរទេសជប៉ុនលោកយ៉ូស្ហ៊ីម៉ាសា ហាយ៉ាស្ហ៊ីបានទៅបំពេញទស្សនកិច្ចនៅក្នុងប្រទេសចិននាថ្ងៃអាទិត្យ ទី២ មេសា។ តាំងពីឆ្នាំ ២០១៩ លោកហាយ៉ាស្ហ៊ីជាប្រមុខការទូតជប៉ុនទី១ ដែលបានទៅទស្សនកិច្ចនៅក្នុងប្រទេសចិន។ មានប្រធានរឿងសំខាន់ចំនួនពីរដែលលោកហាយ៉ាស្ហ៊ី និងសមភាគីចិនលោក ជីន កងបានលើកយកទៅជជែក ទី១ ឧបករណ៍សឺមីកុងឌុកទ័រដែលជប៉ុនចង់រឹតបន្តឹងការនាំចេញ និងទី២ ករណីជនជាតិជប៉ុនម្នាក់ដែលកំពុងជាប់ឃុំនៅចិនក្រោមបទសង្ស័យចារកម្ម។
ចុះផ្សាយនៅថ្ងៃ៖
ស្តាប់ - ០២:២០
ប្រធានបទស្តីពីជប៉ុនទើបប្រកាសគម្រោងរឹតបន្តឹងការនាំចេញឧបករណ៍សឺមីកុងឌុចទ័រជាប្រធានបទក្តៅជាងគេ។ នៅក្នុងជំនួប ប្រមុខការទូតចិនលោកជីន កងបានប្រាប់សមភាគីជប៉ុនលោកយ៉ូស្ហ៊ីម៉ាសា ហាយ៉ាស្ហ៊ីថា ការដែលជប៉ុនគ្រោងបិទខ្ទប់ការនាំចេញឧបករណ៍សឺមីកុងឌុកទ័ររបស់ខ្លួននឹងជំរុញបន្ថែមនូវការប្តេជ្ញាចិត្តរបស់ចិនឲ្យមានស្វ័យភាព។ តែលោកជីន កងមិនភ្លេចវាយប្រហារជប៉ុនដោយចាត់ទុកជប៉ុនជាខ្ញុំកំដររបស់អាមេរិក។ ចំណែកលោកយ៉ូស្ហ៊ីម៉ាសា ហាយ៉ាស្ហ៊ីបានថ្លែងទៅកាន់ក្រុមអ្នកកាសែតដោយការពារវិធានការរបស់រដ្ឋាភិបាលជប៉ុន។
តាមលោកយ៉ូស្ហ៊ីម៉ាសា ហាយ៉ាស្ហ៊ី គម្រោងរឹតបន្តឹងការនាំចេញឧបករណ៍សឺមីកុងឌុចទ័ររបស់ជប៉ុនធ្វើឡើងដោយអនុលោមតាមច្បាប់អន្តរជាតិ និងធានាថា វិធានការនេះមិនបានសំដៅលើប្រទេសណាមួយទេ។ គួររម្លឹកថាក្នុងថ្ងៃសុក្រ ទី៣១ មីនា ជប៉ុនតាមរយៈរដ្ឋមន្រ្តីក្រសួងសេដ្ឋកិច្ចលោកយ៉ាស៊ូតូស្ហ៊ី នីស្ហ៊ីមូរ៉ាបានប្រកាសពីគម្រោងរឹតត្បិតការនាំចេញឧបករណ៍សឺមីកុងឌុកទ័រ។ ហេតុផលដែលលោកនីស្ហ៊ីមូរ៉ាបានលើកឡើង គឺបង្ការកុំឲ្យគេយកធាតុផ្សំអេឡិកត្រូនិកដ៏សំខាន់របស់ជប៉ុននេះទៅប្រើនៅក្នុងការផលិតគ្រឿងសព្វាវុធទំនើប។
តែទោះជាជប៉ុនមិនបាននិយាយសំដៅចំប្រទេសណាមួយក៏ដោយក៏ចិនយល់ថា ខ្លួនជាផ្ទាំងស៊ីបរបស់វិធានការជប៉ុនដូចដែលអាមេរិកបានធ្វើដូចគ្នានេះនាពេលកន្លងមក។ ជាងពេលណាៗទាំងអស់ សឺមីកុងឌុកទ័របានក្លាយជារឿងប៉ះទង្គិចគ្នាខ្លាំងរវាងចិន និងជប៉ុនដែលជាមហាអំណាចសេដ្ឋកិច្ចទី២ និងទី៣ ក្នុងលោកដែលកំពុងមានទំនាក់ទំនងលំបាកជាមួយគ្នាស្រាប់។ ក្រៅពីរឿងមួយនេះ ប្រមុខការទូតទាំងពីរក៏បានជជែកគ្នាពីករណីជនជាតិជប៉ុនម្នាក់ដែលកំពុងជាប់ឃុំនៅចិនក្រោមបទសង្ស័យចារកម្ម។
នៅក្នុងរឿងនេះ លោកយ៉ូស្ហ៊ីម៉ាសា ហាយ៉ាស្ហ៊ីបានប្រាប់អ្នកកាសែតពីការដែលជប៉ុនបានប្រឆាំងនឹងការឃុំខ្លួនជនជាតិជប៉ុនរូបនេះ និងបានអំពាវនាវឲ្យមានការដោះលែងជាបន្ទាន់។ ចំណែកលោកជីន កងបានធ្វើអត្ថាធិប្បាយដោយខ្លីថា ចិននឹងដោះស្រាយរឿងរ៉ាវមួយនេះទៅតាមច្បាប់របស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ