ឥណ្ឌា៖តុលាការកាត់ទោសមេបក្សប្រឆាំងឲ្យជាប់ពន្ធនាគារចំនួន ២ឆ្នាំពីបទបរិហារកេរ្តិ៍នាយករដ្ឋមន្រ្តី
នៅក្នុងប្រទេសឥណ្ឌា តុលាការបានកាត់ទោសលោករ៉ាអ៊ូល ហ្កង់ឌីឲ្យជាប់ពន្ធនាគារចំនួន ២ឆ្នាំពីបទបរិហារកេរ្តិ៍នាយករដ្ឋមន្រ្តី។ មានអាយុ ៥២ឆ្នាំ លោករ៉ាអ៊ូល ហ្កង់ឌីជាប្រធានគណបក្សសមាជដែលជាបក្សប្រឆាំង ជាសមាជិកសភា និងជាអតីតបេក្ខជននាយករដ្ឋមន្រ្តីនាការបោះឆ្នោតសភាឆ្នាំ ២០១៩។ ក្រោយការកាត់ទោស លោករ៉ាអ៊ូល ហ្កង់ឌីបានសម្រេចប្តឹងឧទ្ធរណ៍។ តែទោះជាយ៉ាងនេះក្តី អាជីពនយោបាយរបស់លោកកំពុងប្រឈមគ្រោះថ្នាក់ ហើយគណបក្សប្រឆាំងដែលកំពុងបែកបាក់ស្រាប់នឹងចុះខ្សោយមួយកម្រិតទៀត។
ចុះផ្សាយនៅថ្ងៃ៖
ស្តាប់ - ០២:០២
« ហេតុអ្វីបានជាចោរទាំងអស់មានឈ្មោះមូឌី? » នេះជាឃ្លាដែលលោករ៉ាអ៊ូល ហ្កង់ឌីបានថ្លែងនាឱកាសឃោសនាបោះឆ្នោតសភាកាលពីឆ្នាំ ២០១៩។ នៅពេលនោះ លោករ៉ាអ៊ូល ហ្កង់ឌីបានលើកឈ្មោះបុរសអ្នកជំនួញចំនួន ២នាក់ដែលបានជាប់ចោទពីបទបង្វែរលុយដោយខុសច្បាប់ គឺលោកឡាលីត និងលោកនីរ៉ាវ មូឌី។ បន្ទាប់មកកាលណោះ លោករ៉ាអ៊ូល ហ្កង់ឌីមិនភ្លេចបញ្ចូលមនុស្សម្នាក់ទៀតឈ្មោះណារិនដ្រា មូឌីដែលជានាយករដ្ឋមន្រ្តី។ តែបញ្ហានៅត្រង់ថា ក្រៅពីអ្នកជំនួញ និងនាយករដ្ឋមន្រ្តីដែលមានត្រកូលមូឌី សមាជិកសភាតំបន់ម្នាក់ចេញពីគណបក្សរបស់នាយករដ្ឋមន្រ្តីក៏មានត្រកូលមូឌីដែរ។
គឺសមាជិកសភាតំបន់រូបនេះឯងដែលបានដាក់ពាក្យប្តឹងលោករ៉ាអ៊ូល ហ្កង់ឌីទៅកាន់តុលាការពីបទបរិហាកេរ្តិ៍។ តែបណ្តឹងរបស់រូបសមាជិកសភាតំបន់នោះជាបណ្តឹងតំណាងឲ្យសហគមន៍ត្រកូលមូឌីទាំងអស់។ ទីបំផុតក្នុងថ្ងៃព្រហស្បតិ៍ ទី២៣ មីនា តុលាការតំបន់ហ្គូយ៉ារ៉ាតរបស់នាយករដ្ឋមន្រ្តីលោកណារិនដ្រា មូឌីបានកាត់ទោសលោករ៉ាអ៊ូល ហ្កង់ឌីឲ្យជាប់ពន្ធនាគារចំនួន ២ឆ្នាំពីបទបរិហារកេរ្តិ៍។ ក្រៅពីក្តីក្តាំបរិហារកេរ្តិ៍មួយនេះ មេគណបក្សប្រឆាំង និងជាសមាជិកសភាលោករ៉ាអ៊ូល ហ្កង់ឌីកំពុងជាប់ក្នុងរឿងបទបរិហារកេរ្តិ៍ចំនួន ២ទៀត។
ទន្ទឹមគ្នានេះ លោករ៉ាអ៊ូល ហ្កង់ឌីក៏កំពុងជាប់សង្ស័យក្នុងរឿងលាងលុយកខ្វក់ដែលលោកបានបដិសេធ។ នៅក្រោយការសម្រេចរបស់តុលាការ លោករ៉ាអ៊ូល ហ្កង់ឌីបានសម្រេចប្តឹងឧទ្ធរណ៍។ គេនៅមិនទាន់ដឹងពីលទ្ធផលនៃការប្តឹងឧទ្ធរណ៍នេះនៅឡើយទេ។ អ្វីដែលគេអាចនិយាយបាន អាជីពនយោបាយរបស់លោករ៉ាអ៊ូល ហ្កង់ឌីបានទទួលការគំរាមកំហែង ព្រោះនៅឥណ្ឌា គ្រប់សមាជិកសភាដែលបានទទួលការទោសឲ្យជាប់ពន្ធនាគារចំនួន ២ឆ្នាំ ឬច្រើនជាងនេះត្រូវបានដកអភ័យឯកសិទ្ធិ និងហាមមិនឱ្យឈរឈ្មោះជាថ្មីសម្រាប់ចូលរួមការបោះឆ្នោតរយៈពេល ៦ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ