ជប៉ុន៖ វិធានការចង់ឲ្យប្រជាជនយកកូន ដើម្បីទទួលបានការបន្ធូរបន្ថយបំណុលនិស្សិត កំពុងរងការរិះគន់
បញ្ហាអត្រាកំណើតទារកនៅក្នុងប្រទេសជប៉ុន ដែលទាបបំផុតនោះ គឺជាក្តីបារម្ភដ៏ធំ ខណៈប្រជាជនជប៉ុនវ័យចំណាស់ មានចំនួនកាន់តែច្រើន។ រដ្ឋាភិបាលជប៉ុន កំពុងតែពិចារណា លើវិធានការមួយចំនួន ដើម្បីផ្តល់សន្ទុះ ធ្វើយ៉ាងណាឲ្យប្រជាជនជប៉ុន មានកូនឲ្យបានច្រើន។ ក្នុងចំណោមវិធានការទាំងនេះ គឺមានគំនិតមួយ ដែលរដ្ឋនឹងសន្យាបន្ធូរបន្ថយប្រាក់បំណុលនិស្សិតខ្លះ ប្រសិនបើពួកគេសម្រេចយកកូន។ តែយ៉ាងណាគម្រោងវិធានការនេះ កំពុងតែធ្វើឲ្យលោកនាយករដ្ឋមន្ត្រីជប៉ុន រងការរិះគន់ជាខ្លាំង។
ចុះផ្សាយនៅថ្ងៃ៖
ស្តាប់ - ០២:១៩
រដ្ឋាភិបាលជប៉ុន ដឹកនាំដោយលោក ហ្វូមីអូ គីស៊ីដា បានសន្យាថានៅចុងខែមីនានេះ នឹងបង្ហាញជាសាធារណៈ នូវផែនការយុទ្ធសាស្ត្រ ដើម្បីផ្តល់សន្ទុះដល់កំណើតទារក។ បច្ចុប្បន្នសំណើទាំងនេះ កំពុងតែត្រូវបានយកទៅជជែកយ៉ាងក្តៅគគុក នៅក្នុងសភាជប៉ុន។ មានចំណុចមួយ ដែលគណបក្សកាន់អំណាច បានរងនូវការរិះគន់ខ្លាំងបំផុតនោះ គឺការសន្យាថានឹងកាត់បន្ថយបំណុលនិស្សិត ប្រសិនបើពួកគេសម្រេចថាយកកូន។
នៅចំពោះមុខលោកនាយករដ្ឋមន្ត្រីជប៉ុន ក្នុងអង្គប្រជុំព្រឹទ្ធសភាជប៉ុន លោកស្រី Noriko Ishigaki សមាជិកព្រឹទ្ធសភាម្នាក់ បានលើកឡើងថា ការដាក់កំហិតឲ្យប្រជាជនមានកូន ដើម្បីចង់ឲ្យគេបន្ធូរបន្ថយបំណុលនោះ វាមិនមែនជាវិធានការដែលល្អ ដើម្បីជួយដល់អត្រាកំណើតទារកនោះទេ។
នៅតាមបណ្តាញសង្គមវិញ សំណេររិះគន់ មានកាន់តែខ្លាំង ដោយខ្លះអះអាងថា វិធានការរបស់រដ្ឋាភិបាលនេះ គឺវាមិនខុសពី ឲ្យប្រជាជនយកខ្លួនប្រាណទៅប្តូរនឹងប្រាក់នោះទេ។ អ្នកខ្លះទៀត បានលើកឡើងថា គណបក្សកាន់អំណាច ដែលជាបក្សស្តាំអភិរក្សនិយម កំពុងតែចាត់ទុក ជីវិតមនុស្សដូចទៅនឹងសត្វចិញ្ចឹមនៅតាមកសិដ្ឋាន។
យ៉ាងណាក៏ដោយ ឆ្លើយតបទៅពាក្យរិះគន់ លោក Masahiko Shibayama សមាជិកសភាដែលជាសមាជិកក្រុមពិចារណាសំណុំរឿងនេះ បានអះអាងប្រាប់បណ្តាញព័ត៌មានជប៉ុនថា វិធានការរបស់រដ្ឋ គឺចង់ជួយផ្នែកថវិកាដល់ប្រជាជន និងគ្រួសារជប៉ុនដែលមានកូន តែមិនមិនជាការដាក់ពិន័យទៅលើអ្នកដែលមិនចង់បានកូននោះទេ។ លោកអះអាងទៀតថា រដ្ឋាភិបាលកំពុងពិចារណា ឈានទៅជួយដល់ក្រុមគ្រួសារជប៉ុន នៅក្នុងការចំណាយលើការសិក្សាអប់រំរបស់កុមារ។
សូមបញ្ជាក់ថា កាលពីខែមករា លោកនាយករដ្ឋមន្ត្រីជប៉ុនបានថ្លែងថា ជប៉ុនកំពុងតែស្ថិតនៅក្នុងស្ថានភាពទ័លច្រកខ្លាំងណាស់ ដែលសង្គមអាចនឹងមិនមានសមត្ថភាពដំណើរការតទៅមុខទៀតបាន ដោយសារតែអត្រាកំណើតទារកមានទាបខ្លាំងបំផុត។ ក្នុងចំណោមប្រជាជនជប៉ុនចំនួន១២៥លាននាក់ ប្រមាណជិត៣០% គឺជាមនុស្សចាស់អាយុលើស៦៥ឆ្នាំ។ ឆ្នាំ២០២២ អត្រាកំណើតទារកបានធ្លាក់ទាបបំផុត មានតែ៨សែនទារកតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ