ជប៉ុន ៖ អតីតទាហានស្រីរងការបៀតបៀនផ្លូវភេទ ដាក់បណ្តឹងបន្ទោសរដ្ឋាភិបាល
រងការបៀតបៀនផ្លូវភេទពីសំណាក់មិត្តរួមការងារក្នុងជួរយោធាដូចគ្នា អតីតទាហានភេទស្រីរងគ្រោះ រីណា ហ្កោណូអ៊ី Rina Gonoi បានប្រកាសនៅថ្ងៃចន្ទទី ៣០មករា ២០២៣ ដាក់ពាក្យបណ្តឹងប្រឆាំងនឹងរដ្ឋាភិបាល ព្រមទាំងជនដៃដល់ នៅតុលាការ។ សម្រាប់នារីរងគ្រោះ រដ្ឋាភិបាលនិងជនល្មើស បានសុំទោសថើរៗ និងបន្តម៉ាក់ងាយលើនាង។
ចុះផ្សាយនៅថ្ងៃ៖
ចោទប្រកាន់រឿងបំពារបំពានផ្លូវភេទ ជាសាធារណៈ ជាករណីដ៏កម្រណាស់នៅជប៉ុន ប៉ុន្តែនាងហ្កោណូអ៊ី ដែលប្រមូលហត្ថលេខាជាង១០ម៉ឺន កាលពីខែសីហា ទាមទារសុំបើកអង្កេតឯករាជ្យជុំវិញការរំលោភបំពានលើរូបនាង មិនសុខចិត្តសំងំស្ងៀម ត្រឹមការបោះបង់អង្កេតបឋម និងការបណ្តេញទាហានភេទប្រុសជាប់ពាក់ព័ន្ធ ចេញពីតួនាទីទេ។ យល់ថាបានទទួលពាក្យសុំទោសដោយមិនស្មោះស ហើយមេធាវីរបស់ជនល្មើសនៅតែបន្តចាត់ទុកហេតុការណ៍បំពានផ្លូវភេទជារឿងសាមញ្ញ នៅពេលសម្រុះសម្រួលគ្នា ជនរងគ្រោះហ្កោណូអ៊ី បានពន្យល់ថានាងចាំបាច់ត្រូវដោះស្រាយជម្លោះនេះ ឱ្យដាច់ស្រេច តាមផ្លូវតុលាការ ដើម្បីកុំឱ្យមានរឿងអាស្រូវបំពារបំពានផ្លូវភេទលើស្ត្រីកើតឡើងទៀត។
នៅក្នុងបណ្តឹង នាងរងគ្រោះបានទាមទារសំណងសរុប៧,៥លានយ៉េន ក្នុងនោះ៥,៥លានពីជនដៃដល់ដែលធ្វើឱ្យនាងខូចអារម្មណ៍ និង២លានពីរដ្ឋាភិបាល ពីបទមិនបានរារាំងអំពើបៀតបៀនផ្លូវភេទ និងពីបទមិនបើកអង្កេតត្រឹមត្រូវ។ រាជអាជ្ញានឹងសិក្សាបណ្តឹងឡើងវិញដើម្បីឈានទៅចោទប្រកាន់បែបព្រហ្មទណ្ឌប្រឆាំងនឹងជនដៃដល់ទាំង៥ផង។ នេះបើតាមមេធាវីរបស់នាងរងគ្រោះ។
យោធាជប៉ុនបានទទួលស្គាល់កាលពីខែកញ្ញាថា នាងហ្កោណូអ៊ី បានរងការបៀតបៀន បំពារបំពានផ្លូវភេទ នៅក្នុងក្នុងពេលកំពុងហ្វឹកហាត់ ដោយក្រុមទាហានក្នុងកងពលតែមួយនៃកងកម្លាំងស្វ័យការពារជើងគោក។ សកម្មភាពតវ៉ារបស់នាងបានជំរុញឱ្យផ្ទុះករណីចោទប្រកាន់ការបៀតបៀនផ្លូវភេទជាច្រើនទៀតក្នុងរង្វង់ជួរកងទ័ពស្វ័យការពារជប៉ុន។ ជប៉ុនជាប្រទេសដែលមានវត្តមានស្ត្រីក្នុងក្រុមប្រឹក្សារដ្ឋាបាល និងជាមន្ត្រីជាន់ខ្ពស់តិចតួចខ្លាំងជាងគេណាស់ បើបៀបទៅនឹងបណ្តាប្រទេសជឿនលឿនដូចគ្នា។ ចំណែកករណីស្ត្រីរងការរំលោភបំពានផ្លូវភេទវិញ មានជនរងគ្រោះតែ៤% ប៉ុណ្ណោះបានឡើងដល់ប៉ូលិស។ នេះបើតាមទិន្នន័យរបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ