ប្រទេសជប៉ុន និងប្រទេសឥណ្ឌាផ្តើមសមយុទ្ធផ្លូវអាកាសរួមគ្នាលើកទី១
នៅថ្ងៃចន្ទ ទី១៦ មករានេះ ប្រទេសជប៉ុន និងប្រទេសឥណ្ឌាបានផ្តើមសមយុទ្ធផ្លូវអាកាសលើកទី១ រួមគ្នានៅក្នុងទឹកដីជប៉ុន។ សមយុទ្ធផ្លូវអាកាសដែលនឹងមានរយៈពេល ១១ថ្ងៃបានរៀបចំធ្វើនៅក្បែរទីក្រុងតូក្យូ។ កម្មវត្ថុនៃការធ្វើសមយុទ្ធនេះគឺដើម្បីពង្រឹងទំនាក់ទំនងលើវិស័យសន្តិសុខ និងវិស័យការពាររវាងប្រទេសពីរប្រឈមនឹងកំណើនឥទ្ធិពលកាន់តែខ្លាំងរបស់ប្រទេសចិននៅក្នុងតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:១៦
មូលដ្ឋានយោធាផ្លូវអាកាសជប៉ុនយ៉ាគូរី (Hyakuri) ស្ថិតប៉ែកឦសានក្រុងតូក្យូត្រូវបានជ្រើសជាទីតាំងធ្វើសមយុទ្ធរយៈពេល ១១ថ្ងៃរវាងទ័ពអាកាសជប៉ុន និងទ័ពអាកាសឥណ្ឌា។ ក្រសួងការពារជាតិជប៉ុនបានលំអិតថា សមយុទ្ធនេះចូលរួមដោយកម្លាំងស្វ័យការពារជប៉ុនដោយប្រើយន្តហោះចម្បាំងប្រភេទ F-2 និង F-15 សរុបចំនួន ៨គ្រឿង ហើយពីខាងភាគីឥណ្ឌាវិញចូលរួមដោយទ័ពអាកាសចំនួន ១៥០នាក់របស់កម្លាំង Indian Air Force។ តាមពិតទៅ ជប៉ុន និងឥណ្ឌាបានសម្រេចឲ្យមានសមយុទ្ធរបៀបនេះនៅក្នុងជំនួបថ្នាក់ប្រមុខការបរទេស និងប្រមុខការពាររៀបចំក្នុងទីក្រុងញូដែលីកាលពីខែវិច្ឆិកា ឆ្នាំ ២០១៩។
តែដោយសារវិបត្តិកូវីដ១៩ ការអនុវត្តន៍ជាក់ស្តែងត្រូវបានលើកពេលមកដល់ឆ្នាំ ២០២៣ នេះ។ គួរបញ្ជាក់ថា ជប៉ុន និងឥណ្ឌាជាប្រទេសសមាជិកក្នុងចង្កោមកិច្ចសន្ទនាចតុភាគីស្តីពីសន្តិសុខហៅកាត់ជាភាសាបារាំងក្វាដ « Quad » ជាមួយអាមេរិក និងប្រទេសអូស្រា្តលី។ កម្មវត្ថុរបស់ក្វាដ « Quad » ដែលបានផ្តួចផ្តើមដំបូងក្នុងឆ្នាំ ២០០៧ និងផ្តល់សន្ទុះថ្មីក្នុងឆ្នាំ ២០១៧ គឺដើម្បីបង្កើនតុល្យភាពកម្លាំងប្រឈមទប់នឹងកំណើនឥទ្ធិពលសេដ្ឋកិច្ច យោធា និងបច្ចេកវិទ្យារបស់ចិននៅក្នុងតំបន់អាស៊ីប៉ាស៊ីហ្វិក។ ក្រៅពីជាមួយឥណ្ឌា ជប៉ុនក៏បានរៀបចំសមយុទ្ធជាមួយសម្ព័ន្ធរបស់ខ្លួនជាច្រើននារយៈពេលប៉ុន្មានខែចុងក្រោយនេះ។
បច្ចុប្បន្ននេះ និងជាងពេលណាៗទាំងអស់ ការពារជាតិជាវិស័យអាទិភាពទី១ ដែលរដ្ឋាភិបាលក្រុងតូក្យូបានធ្វើកំណែទម្រង់ទ្រង់ទ្រាយធំ និងស៊ីជ្រៅ។ ក្នុងខែធ្នូ ឆ្នាំ ២០២២ ក្រុងតូក្យូបានអនុម័តនូវយុទ្ធសាស្រ្តសន្តិសុខជាតិថ្មីមួយដែលគ្រោងបង្កើនទ្វេដងនូវថវិកាការពារជាតិប្រចាំឆ្នាំពីពេលនេះទៅឆ្នាំ ២០២៧។ ថ្មីៗនេះនាទស្សនកិច្ចនៅក្នុង ៥ប្រទេសសមាជិក G៧ នាយករដ្ឋមន្រ្តីជប៉ុនលោកគីស្ហ៊ីដាបានចុះហត្ថលេខាលើការពង្រីកសន្ធិសញ្ញាសន្តិសុខក្នុងវិស័យអាវកាសជាមួយអាមេរិក និងព្រមព្រៀងយោធាជាមួយប្រទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ