តៃវ៉ាន់បរិហារសមយុទ្ធថ្មីបែបវាយលុករបស់ចិន
ក្នុងរយៈពេលមិនដល់មួយខែផង ចិនបានបើកធ្វើសមយុទ្ធ ដល់ទៅពីរដងនៅជុំវិញកោះតៃវ៉ាន់។ នេះបើតាមក្រសួងការពារជាតិតៃវ៉ាន់ដែលគូសបញ្ជាក់ថា ចាប់សញ្ញាបានឃើញមានយន្តហោះចិនចំនួន៥៧គ្រឿង ផ្តុំគ្នាធ្វើសមយុទ្ធ នៅល្ងាចមិញ ព័ទ្ធជុំវិញកោះតៃវ៉ាន់ បែបវាយប្រហារតាមផ្លូវគោក និងវាយលុកសម្រុកតាមផ្លូវទឹក។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍ដ៏ខ្លី អាជ្ញាធរចិនបានប្រកាសថា លំហាត់សឹកនេះ ជាការធ្វើតេស្សាកល្បងមើលសមត្ថភាពប្រយុទ្ធរួម ប្រឆាំងនឹងសកម្មភាពបង្កហេតុរបស់មហាអំណាចខាងក្រៅ និងរបស់កងកម្លាំងចង់ផ្តាច់ទឹកដីស្និទ្ធនឹងក្រុមអ្នកឯករាជ្យនិយមតៃវ៉ាន់។
ប៉ុន្តែនេះជាពាក្យចោទប្រកាន់ដែលគ្មានមូលដ្ឋាន ! ជាមួយនឹងសេចក្តីប្រកាសថ្កោលទោសយ៉ាងខ្លាំងសមយុទ្ធរបស់ចិន លោកស្រីប្រធានាធិបតីតៃវ៉ាន់ បានអះអាងថា សន្តិសភាពនិងស្ថិរភាពនៅច្រកសមុទ្ទតៃវ៉ាន់ និងតំបន់ ជាទំនួលខុសត្រូវរួមរវាងតៃវ៉ាន់ និងចិន។ តៃវ៉ាន់ មានជំហរច្បាស់លាស់បំផុត គឺមិនបង្កហេតុ មិននាំរឿង មិននាំភាពក្តៅក្រហាយ មិនបង្កើនជម្លោះនិងវិបត្តិ ប៉ុន្តែតៃវ៉ាន់នឹងការពារបូរណភាពដែនដីនិងសន្តិសុខ។ នេះបើតាមសេចក្តីថ្លែងការណ៍របស់ប្រធានាធិបតីតៃវ៉ាន់។
នៅមុននេះបន្តិច ក្រសួងការពារជាតិតៃវ៉ាន់ បានលើកឡើងថា មានយន្តហោះចិនចំនួន៥៧គ្រឿង និងនាវាចំនួនបួនគ្រឿង បានធ្វើប្រតិបត្តិការ ហាត់សមនៅជុំវិញកោះតៃវ៉ាន់ រយៈពេលប្រមាណ២៤ម៉ោងចុងក្រោយមកនេះ។ ក្នុងចំណោមយន្តហោះទាំងនោះ ២៨គ្រឿងទំនងជាបានហោះរំលោភចូលក្នុងតំបន់ការពារដែនអាកាសរបស់តៃវ៉ាន់ផង។
សូមរំលឹកថា កាលពីចុងខែធ្នូ មានយន្តហោះចិនចំនួន៤៣គ្រឿងបានហោះឆ្លងខ្សែព្រំដែនពុះចែកច្រកសមុទ្ទតៃវ៉ាន់ ពីចិនដីគោក និងកោះតៃវ៉ាន់។ ជាការរំលោភហួសប្រមាណពុំធ្លាប់មាន ក្នុងបរិបទនៃការបង្កើនសម្ពាធយោធាកាន់តែខ្លាំងឡើងៗរបស់ប៉េកាំង នារយៈពេលបីឆ្នាំមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ