ពលរដ្ឋចិនប្រមាណ ២៥០ លាននាក់ ឆ្លងជំងឺកូវីដ ក្នុងរយៈពេល២០ថ្ងៃ
សប្តាហ៍នេះ នៅប្រទេសចិន គឺ ក្នុងមួយថ្ងៃ ពលរដ្ឋជាមធ្យម ៣៧ លាននាក់ បានឆ្លងជំងឺកូវីដ១៩។ នេះបើតាមការព្យាករមួយរបស់អាជ្ញាធរសុខភាពចិន។ ជាសរុបមធ្យម ១៨% នៃប្រជាពលរដ្ឋចិន បានឆ្លងកូវីដ ចាប់ពីដើមខែធ្នូមក។ ជំងឺកូវីដនៅចិន កាន់តែឆ្លងកើនឡើងលឿងខ្លាំង នៅពេលដែលរដ្ឋាភិបាលឈប់អនុវត្តនយោបាយកូវីដសូន្យ។ នយោបាយកូវីដសូន្យ ដែលត្រូវពលរដ្ឋចិនខ្លួនឯង ទាមទារឲ្យលុបចោល។
ចុះផ្សាយនៅថ្ងៃ៖
ស្តាប់ - ០២:០៨
នៅស្រុកចិន ចំនួនអ្នករងគ្រោះស្លាប់ និងចំនួនអ្នកធ្លាក់ខ្លួនឈឺឆ្លងកូវីដ គឺ ស្ថិតិនៅលើក្រដាសនិងនៅលើមាត់មន្ត្រីបក្ស មិនដូចគ្នាទេនឹងការពិតជាស្តែង។ ការពិតជាក់ស្តែង គឺសេវាសង្គ្រោះបន្ទាន់របស់មន្ទីរពេទ្យចិន ពេញណែន ខណៈពេលដែល ស្ថិតិតុល្យការ ផ្លូវការ គឺហាក់ដូចជាគ្មានអ្វីច្រើនធ្ងន់ធ្ងរសោះ។ នេះតាមការសង្កេតដោយផ្ទាល់របស់អ្នកឆ្លើយឆ្លងព័ត៌មានវិទ្យុបារាំងអន្តរជាតិប្រចាំរដ្ឋធានីប៉េកាំង។
ទិន្នន័យរបស់ទីភ្នាក់ងារព័ត៌មាន Bloomberg បញ្ជាក់ថា ប្រជាជនចិន ២៤៨ លាននាក់បានឆ្លងជំងឺផ្លូវដង្ហើមធ្ងន់ធ្ងរ ក្នុងរយៈពេល២០ថ្ងៃ ក្នុងខែធ្នូ ដែលគិតជាមធ្យម ១២ លាន ៤ សែននាក់ ឆ្លងកូវីដក្នុងមួយថ្ងៃៗ។ នៅថ្ងៃសុក្រ សារព័ត៌មានផ្លូវការចិន បានបញ្ជាក់ក្នុងអត្ថបទមួយ ថា នៅក្រុងឃីងដាវ ( Quingdao) នៅជាប់កំពង់ផែ ដែលមានពលរដ្ឋ១០លាននាក់ គឺ ក្នុងមួយថ្ងៃៗ គ្រាន់តែក្នុងក្រុងនេះ អ្នកឆ្លងជំងឺ មានចន្លោះពី ៥០ម៉ឺននាក់ ទៅ ៥៣ម៉ឺននាក់ ។ ក៏ប៉ុន្តែ អត្ថបទនេះ ត្រូវរដ្ឋអំណាចចិន ដកចេញ លុបចោល ព្រោះគេមិនអាចរកឃើញអត្ថបទនោះ ទេ នៅថ្ងៃសៅរ៍។ រដ្ឋអំណាចចិន ក៏បានប្រកាសកែព័ត៌មានវិញ ថា ទូទាំងខេត្តស៊ានតុង ទាំងមូល មានឆ្លងកូវីដ តែត្រឹម ២៤ ករណីប៉ុណ្ណោះ។
នៅថ្ងៃសៅរ៍ រដ្ឋអំណាចចិន ពុំបានកត់ត្រានិងបញ្ជាក់ពីចំនួនអ្នកស្លាប់ព្រោះតែជំងឺកូវីដសោះឡើយ ខណៈដែល រូបភាព និងដំណឹងផ្សាយពីមរណភាព នៅលើបណ្តាញសង្គម Weibo ឲ្យតែមានផុសផ្សាយ គឺត្រូវរដ្ឋអំណាចលុបចេញ ភ្លាមៗ។
ដើម្បីជៀសវាងឆ្លងកូវីដ អាជ្ញាធរក្រុងសៀងហៃ បានជូនយោបល់ថា កុំចេញពីផ្ទះ ប្រសិនបើមិនចាំបាច់។ ក៏ប៉ុន្តែ អាជ្ញាធរក្រុង ហុងកុង វិញ បានប្រកាសត្រៀមបើកព្រំដែនវិញ នៅខែមករា បន្ទាប់ពីបិទក្រុង ៣ ឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ