Steve Tsang ៖ ចិនបោះបង់គោលនយោបាយកូវីដសូន្យ គឺមិនមែនចង់ជួយប្រជាជនទេ តែគឺដើម្បីការពារអំណាច
សេដ្ឋកិច្ចចិនបានធ្លាក់ចុះគួរឲ្យបារម្ភ ដោយសារតែវិធានការបិទខ្ទប់ដ៏តឹងតែង ប្រមាណជិត៣ឆ្នាំមកនេះ។ តែយ៉ាងណា យោងតាមការវិភាគខ្លះទៀត គឺការសម្រេចដកថយ ឈប់ប្រើប្រាស់គោលនយោបាយកូវីដសូន្យ នាពេលនេះ គឺទំនងជាគណបក្សកុម្មុយនីស្តចិន ព្រួយបារម្ភពីកំហឹងតវ៉ា បាតុកម្មរបស់ប្រជាជនចិន ដែលបានផ្ទុះឡើងកាលពីចុងខែវិច្ឆិកា។ លោក Steve Tsang សាស្ត្រាចារ្យនៅសកលវិទ្យាល័យទីក្រុងឡុងដ៍ បានលើកឡើងថា របបកុម្មុយនីស្តចិន មិនបានចាត់ទុករឿងសេដ្ឋកិច្ច ឬក៏សុខភាពរបស់ប្រជាពលរដ្ឋជាធំទេ។ អ្វីដែលជាអាទិភាព គឺធ្វើយ៉ាងណាការពារអំណាចខ្លួន តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ថ្មីៗនេះ រដ្ឋាភិបាលចិន ទើបតែបានប្រកាសពីវិធានការបន្ធូរបន្ថយមួយចំនួន ទាក់ទិននឹងការបង្ការកូវីដ១៩។ គោលនយោបាយកូវីដសូន្យរបស់លោកស៊ី ជីនពីង ទំនងជាត្រូវបានបោះបង់ចោលហើយ។ អំណេះតទៅ គឺការធ្វើតេស្តទ្រង់ទ្រាយធំសឹងជារៀងរាល់ថ្ងៃ នឹងត្រូវកាត់បន្ថយ អ្នកវិជ្ជមានកូវីដដែលគ្មានអាការៈជម្ងឺ អាចសម្រាកនៅផ្ទះបាន ដោយមិនត្រូវគេចាប់បង្ខំ យកទៅឃុំនៅមណ្ឌលធ្វើចត្តាឡីស័កដូចមុន ហើយប្រជាជន ក៏អាចធ្វើដំណើរឆ្លងពីខេត្តមួយទៅខេត្តមួយ ដោយមិនចាំបាច់ធ្វើតេស្តPCR។
សម្រង់ប្រសាសន៍របស់ Steve Tseng សាស្ត្រាចារ្យនៅសកលវិទ្យាល័យទីក្រុងឡុងដ៍
“ ប្រសិនបើយើងក្រឡេកទៅមើលបទពិសោធន៍ តួលេខនៅតាមប្រទេសផ្សេងៗទៀត ដែលរងគ្រោះដោយកូវីដ គឺវាប្រាកដណាស់ ថាចិនប្រាកដជានឹងមានករណីអ្នកជំងឺឈឺធ្ងន់ ត្រូវព្យាបាលសង្គ្រោះបន្ទាន់ នៅថ្ងៃខាងមុខ ក្នុងទំហំមួយច្រើនគួរឲ្យបារម្ភ។ ករណីអ្នកជំងឺស្លាប់ក៏នឹងអាចកើនឡើង។ ទាំងនេះ គឺដោយសារតែការបន្ធូរបន្ថយវិធានការបង្ការ ដែលធ្វើឲ្យការឆ្លងរាលដាលកូវីដអូមីក្រុង កើនឡើងខ្លាំងនៅចិន។ ដូច្នេះ វាច្បាស់ណាស់ហើយ ដែលថា អាទិភាពរបស់រដ្ឋាភិបាលចិន គឺមិនមែនការពារសុខភាព សុវត្ថិភាពប្រជាពលរដ្ឋនោះទេ ដូចអ្វីដែលគេធ្លាប់បានប្រកាសនោះទេ។ តែគឺដើម្បីការពារអំណាចរបស់គេតែប៉ុណ្ណោះ។
គ្មានសញ្ញាសង្ឃឹមច្រើននោះឡើយ ស្តីពីការស្ទុះឡើងវិញផ្នែកសេដ្ឋកិច្ចរបស់ចិន។ ព្រោះថា កម្រិតចាក់វ៉ាក់សាំងនៅចិនរាល់ថ្ងៃនេះ គឺទាបខ្លាំងសម្បើមណាស់។ បន្ថែមពីនេះ មន្ទីរពេទ្យនៅចិន នឹងគ្មានសមត្ថភាពចាត់ចែងព្យាបាល សង្គ្រោះអ្នកជំងឺ ដែលនឹងកើនឡើងយ៉ាងគំហុក ភ្លាមមួយរំពេចបានទេ។
សេដ្ឋកិច្ចនឹងបន្តលំបាកទៀត ព្រោះថាមនុស្សនឹងអវត្តមានច្រើន មិនអាចទៅធ្វើការបាន ដោយសារតែវិជ្ជមានឆ្លងកូវីដ ព្រមទាំងដោយសារវិធានការបិទខ្ទប់ខ្លះៗ នៅតាមទីតាំងតំបន់មួយចំនួន។ តាមយោបល់ខ្ញុំ គឺសេដ្ឋកិច្ចចិននឹងនៅតែជួបបញ្ហាបន្តទៀត បើទោះបីជា វានឹងរងផលប៉ះពាល់ស្រាលជាងពេលមុន ដែលចិនមានវិធានការសុខាភិបាលដ៏តឹងតែងក៏ដោយ។"
សូមបញ្ជាក់ដែរថា ប៉ុន្មានថ្ងៃចុងក្រោយនេះ បន្ទាប់ពីរដ្ឋាភិបាលចិនបានប្រកាស លែងតម្រូវឲ្យមានការធ្វើចត្តាឡីស័កនៅតាមមណ្ឌលរួម ប្រជាជនចិនជាច្រើន បានសំរុកទៅទិញថ្នាំដើម្បីទុកលេបព្យាបាល ក្នុងករណីដែលខ្លួនឆ្លងមេរោគកូវីដ១៩។ ការសំរុកដណ្តើមគ្នាទិញនេះ បានធ្វើឲ្យដាច់ស្តុកនូវឱសថសំខាន់ៗមួយចំនួន ហើយទន្ទឹមគ្នានេះ ក៏មានជនឆក់ឱកាស បោកប្រាស់លក់ចែកចាយឱសថក្លែងក្លាយផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ