ព្រឹត្តិការណ៍ប្រជ្រៀតជាន់គ្នា៖មេប៉ូលិសជាតិកូរ៉េខាងត្បូងទទួលស្គាល់ថា មិនបានចាត់វិធានការគ្រប់គ្រាន់
នៅកូរ៉េខាងត្បូង ពីរថ្ងៃក្រោយព្រឹត្តិការណ៍ប្រជ្រៀតចូលជាន់គ្នា ដែលបានសម្លាប់មនុស្សយ៉ាងហោច ១៥៦នាក់ រដ្ឋមន្រ្តីក្រសួងមហាផ្ទៃបានចេញមុខសុំទោស។ ចំណែក មេប៉ូលិសជាតិកូរ៉េខាងត្បូងទទួលស្គាល់ថា មិនបានចាត់វិធានការគ្រប់គ្រាន់ នៅក្រោយទទួលបានព័ត៌មាន ស្តីពីគ្រោះថ្នាក់នៃការជួបជុំណែនណាន់តាន់តាប់របស់ហ្វូងមនុស្ស កាលពីយប់ថ្ងៃសៅរ៍។
ចុះផ្សាយនៅថ្ងៃ៖
ស្តាប់ - ០២:៣១
រងការរិះគន់ថា មិនបានគ្រប់គ្រងត្រួតពិនិត្យហ្វូងមនុស្ស រហូតបណ្តាលឲ្យកើតមានសោកនាដកម្ម ប្រជ្រៀតជាន់គ្នា ដែលបានសម្លាប់មនុស្សយ៉ាងតិច ១៥៦នាក់ កាលពីថ្ងៃសៅរ៍ មេប៉ូលិសជាតិកូរ៉េខាងត្បូង លោកយុន ហ៊ីគឿន បានចេញមុខមកបកស្រាយ នៅក្នុងសន្និសីទកាសែត នៅថ្ងៃអង្គារទី ១វិច្ឆិកា។
តាមមេប៉ូលិសជាតិ កូរ៉េខាងត្បូង នៅមុនហេតុការណ៍ប្រជ្រៀតជាន់គ្នា ប៉ូលិសបានទទួលព័ត៌មានជាច្រើនស្តីពីការប្រមូលផ្តុំហ្វូងមនុស្សដ៏ធំសំខាន់មួយ នៅសង្កាត់អ៊ីតៃវ៉ុន ដែលអាចបង្កឲ្យកើតមានគ្រោះថ្នាក់បន្ទាន់។ ប៉ុន្តែ នៅពេលនោះ ប៉ូលិសបានចាត់វិធានការមិនគ្រប់គ្រាន់។
ជាទូទៅ កូរ៉េខាងត្បូង ពូកែខាងគ្រប់គ្រង រក្សាសណ្តាប់ធ្នាប់ សន្តិសុខ ដោយបានពង្រាយកម្លាំងប៉ូលិសច្រើនក្រាស់ក្រែល សម្រាប់ការជួបជុំ បាតុកម្មនានា នៅក្នុងប្រទេស។ ឧទាហរណ៍ជាក់ស្តែង នៅថ្ងៃកើតហេតុ ប៉ូលិស ៦៥០០ នាក់ត្រូវបានពង្រាយ សម្រាប់បាតុកម្ម នៅទីក្រុងសេអ៊ូល ដែលមានមនុស្សចូលរួម ប្រមាណ ២៥ ០០០នាក់។ ប៉ុន្តែ សម្រាប់ការប្រមូលផ្តុំមនុស្ស សម្រាប់ពិធីបុណ្យខ្មោច ហាឡូវីន នៅសង្កាត់អ៊ីតៃវ៉ុនវិញ ប៉ូលិសទទួលស្គាល់ថា បានពង្រាយកម្លាំងតែ ១៣៧នាក់ប៉ុណ្ណោះ ក្នុងខណៈពេលដែល មនុស្សប្រមាណ ១សែននាក់ ដើររុញប្រជ្រៀតគ្នា ណែនណាន់តាន់តាប់ នៅសង្កាត់រាត្រី អ៊ីតៃវ៉ុន។
តាមការចុះផ្សាយរបស់កាសែតកូរ៉េខាងត្បូង ផ្ទុយពីបាតុកម្មនយោបាយ ឬសហជីព ដែលមានអ្នករៀបចំ និងជូនដំណឹងជាមុនទៅអាជ្ញាធរ ការជួបជុំសប្បាយរបស់ក្រុមយុវវ័យរាប់ម៉ឺននាក់ នៅសង្កាត់អ៊ីតៃវ៉ុន កាលពីថ្ងៃសៅរ៍ ធ្វើឡើង ដោយគ្មានអ្នករៀបចំពិតប្រាកដ ពោល គឺគ្រាន់តែជាការផ្អើលជ្រួលតាមគ្នា ប៉ុន្តែ មិនមែនជាកម្មវិធីមហោស្រព កម្មវិធីបុណ្យផ្លូវការ ដែលទាមទារឲ្យអាជ្ញាធរត្រូវតែចាត់វិធានការ ពង្រាយរក្សាសន្តិសុខ។
នៅក្រោយសោកនាដកម្មប្រជ្រៀតជាន់គ្នា នៅទីក្រុងសេអ៊ូល ប្រធានាធិបតី កូរ៉េខាងត្បូង លោកយុន សុខយោល បានបញ្ជា នៅថ្ងៃអង្គារឲ្យគេពង្រឹងប្រព័ន្ធគ្រប់គ្រងហ្វូងមនុស្ស បើទោះបីជាមាន ឬមិនមានអ្នករៀបចំកម្មវិធីផ្លូវការក្តី។ សម្រាប់លោក សន្តិសុខ សុវត្ថិភាពរបស់មនុស្សសំខាន់ណាស់។
នៅយប់ថ្ងៃបុណ្យហាឡូវីន ដែលរៀបចំឡើងនៅក្រោយ សម័យកូវីដ ហ្វូងមនុស្សរាប់ម៉ឺននាក់ ដែលភាគច្រើនជាយុវជន បានទៅពពាក់ពពូន កកកុញគ្នា ណែនណាន់តាន់តាប់ នៅគ្រប់ផ្លូវតូចៗ ចង្អៀត ក្នុងសង្កាត់រាត្រី អ៊ីតៃវ៉ុន។ សាក្សីជាច្រើននិយាយថា ដោយសារតែគ្មានការរៀបចំ ត្រួតពិនិត្យរបស់អាជ្ញាធរប៉ូលិស ក្រុមមនុស្សដែលភ័យជ្រួលច្របល់ ស្លន់ស្លោ បានបាត់បង់ម្ចាស់ការ និងគិតតែពីរុញច្រានប្រជ្រៀតគ្នា កៀបធ្វើឲ្យ អ្នកដែលនៅជាប់គាំងកណ្តាល ថប់ដង្ហើមស្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ