កូរ៉េខាងជើងបន្តផ្គើនសហគមន៍អន្តរជាតិដោយបាញ់មីស៊ីលបាលីស្ទិកលើកទី៤ ក្នុងពេលតែមួយសប្តាហ៍
នៅឧបទ្វីបកូរ៉េ កងទ័ពកូរ៉េខាងត្បូងបានប្រាប់ឲ្យដឹងនាថ្ងៃសៅរ៍ ទី១ តុលានេះថា កូរ៉េខាងជើងបានបាញ់មីស៊ីលបាលីស្ទិកចំនួន ២គ្រាប់ដែលជាការបាញ់លើកទី៤ ក្នុងពេលតែមួយសប្តាហ៍។ ការបាញ់ជាថ្មីនេះបានធ្វើឡើង ក្រោយពីកូរ៉េខាងត្បូង ជប៉ុន និងអាមេរិកបានធ្វើសមយុទ្ធប្រឆាំងនាវាមុជទឹករួមគ្នាក្នុងថ្ងៃសុក្រ ទី៣០ កញ្ញា។ គួរបញ្ជាក់ថា កូរ៉េខាងជើងតែងប្រឆាំងនឹងសមយុទ្ធរៀបចំដោយកូរ៉េខាងត្បូង និងអាមេរិកដោយយល់ថា សមយុទ្ធរបៀបនេះជាការរៀបចំជើងព្រួលដើម្បីវាយកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:១០
ការបាញ់មីស៊ីលបាលីស្ទិករបស់កូរ៉េខាងជើងពេលនេះត្រូវបានបញ្ជាក់ដោយកូរ៉េខាងត្បូង និងប្រទេសជប៉ុន។ មេបញ្ជាការកងទ័ពកូរ៉េខាងត្បូងបានបញ្ជាក់នៅក្នុងសេចក្តីប្រកាសព័ត៌មានថា មីស៊ីលបាលីស្ទិកទាំងពីរគ្រាប់បានហោះក្នុងចម្ងាយប្រមាណ ៣៥០គីឡូម៉ែត្រ និងក្នុងកម្ពស់ ៣០គីឡូម៉ែត្រ។ ចំណែកជប៉ុនបានបន្ថែមដោយលំអិតថា មីស៊ីលទាំងពីរគ្រាប់ហាក់បានធ្លាក់នៅក្រៅតំបន់សេដ្ឋកិច្ចពិសេសរបស់ជប៉ុន។ បើតាមអនុរដ្ឋមន្រ្តីការពារជាតិជប៉ុនលោកតូស្ហ៊ីរ៉ូ អ៊ីណូ មីស៊ីលទាំងពីរគ្រាប់ហាក់បានហោះក្នុងគន្លងផ្លូវឋេរល្អ។
តាមក្រុមអ្នកជំនាញ ការហោះក្នុងគន្លងផ្លូវឋេរនេះបញ្ជាក់ថា គ្រាប់មីស៊ីលមានសមត្ថភាពបត់បែននៅពេលហោះដែលជារឿងលំបាកខ្លាំងណាស់ក្នុងការស្ទាក់ចាប់។ ការបាញ់មីស៊ីលបាលីស្ទិករបស់កូរ៉េខាងជើងពេលនេះបានធ្វើឡើង ក្រោយពីកូរ៉េខាងត្បូង ជប៉ុន និងអាមេរិកបានធ្វើសមយុទ្ធប្រឆាំងនាវាមុជទឹករួមគ្នាក្នុងថ្ងៃសុក្រ ទី៣០ កញ្ញា។ កំណត់សម្គាល់មួយទៀត ការបាញ់មីស៊ីលបាលីស្ទិករបស់កូរ៉េខាងជើងលើកទី៤ តែក្នុងពេលមួយសប្តាហ៍បានធ្វើឡើង គឺប្រហែលដើម្បីទទួលស្វាគមន៍ដំណើរទស្សនកិច្ច និងការបញ្ចប់ទស្សនកិច្ចរបស់អនុប្រធានាធិបតីអាមេរិកលោកស្រីខាម៉ាឡា ហារីសក្នុងទឹកដីកូរ៉េខាងត្បូងនាថ្ងៃព្រហស្បតិ៍ ទី២៩ កញ្ញា។
នៅក្នុងដំណើរទស្សនកិច្ច លោកស្រីខាម៉ាឡា ហារីសបានធ្វើដំណើរទៅកាន់តំបន់គ្មានកងទ័ពដែលខ័ណ្ឌចែកកូរ៉េទាំងពីរ។ តែអ្វីដែលបានធ្វើឲ្យក្រុងព្យុងយ៉ាងក្តៅស្លឹកត្រចៀកជាងគេ គឺប្រហែលការថ្លែងរបស់លោកស្រីខាម៉ាឡា ហារីសដែលគូសបញ្ជាក់ពីការសន្យារបស់អាមេរិកឥតងាករេក្នុងការការពារកូរ៉េខាងត្បូងប្រឆាំងនឹងកូរ៉េខាងជើង។ ក្រោយការបាញ់មីស៊ីលបាលីស្ទិក អាមេរិក និងកូរ៉េខាងត្បូងបានព្រមានពីការដែលកូរ៉េខាងជើងអាចសាកល្បងនុយក្លេអ៊ែរជាថ្មីនាពេលខាងមុខ។ ការសាកល្បងដែលអាចធ្វើនៅចន្លោះសមាជគណបក្សកុម្មុយនិស្តចិនថ្ងៃទី១៦ តុលា និងការរៀបចំបោះឆ្នោតប្រធានាធិបតីអាមេរិកពាក់កណ្តាលអាណត្តិថ្ងៃទី៧ វិច្ឆិកា នេះបើតាមក្រសួងស៊ើបការណ៍សម្ងាត់កូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ