ស្តី្រអាហ្វហ្កានីស្ថាន ធ្វើបាតុកម្មនៅមុខស្ថានទូតអ៊ីរ៉ង់ ដើម្បីសម្ដែងការសាមគ្គីជាមួយស្ត្រីអ៊ីរ៉ង់
នៅខាងមុខអាគារស្ថានទូតអ៊ីរ៉ង់ ក្នុងក្រុងកាប៊ូល កាលពីថ្ងៃព្រសហ្បតិ៍ទី២៩កញ្ញា មានស្ត្រីអាហ្វហ្កានីស្ថានជាង២០នាក់ បានជួបជុំគ្នាធ្វើបាតុកម្ម ដើម្បីបង្ហាញសាមគ្គីភាពជាមួយស្ត្រីអ៊ីរ៉ង់ ដែលកំពុងតែធ្វើបាតុកម្មប្រឆាំងនឹងរបបអ៊ីស្លាមផ្ដាច់ការ បំបិទសិទ្ធិស្ត្រី។ ស្ថិតក្រោមគំនៀបរបបផ្តាច់ការតាលីបង់ ស្ត្រីបាតុករនៅកាប៊ូល ចង់ឃើញស្ត្រីអាហ្វហ្កានីស្ថាន ក្រោកឈរទាមទារសិទ្ធិ ដោយយកគម្រូតាមស្ត្រីអ៊ីរ៉ង់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
យ៉ាងហោចណាស់ មានស្ត្រីអាហ្វហ្កានីស្ថាន ចំនួនជាង២០នាក់ បានមកជួបជុំគ្នា ស្រែកតវ៉ានៅខាងមុខស្ថានទូតអ៊ីរ៉ង់ ក្នុងក្រុងកាប៊ូល។ ក្បាលទទូលក្រណាត់ ស្ត្រីបាតុករអាហ្វហ្កានីស្ថាន បានស្រែកបន្លឺថា ស្ត្រី ជីវិត និងសិទ្ធិសេរីភាព ដើម្បីបង្ហាញការគាំទ្រចំពោះបាតុកម្មតវ៉ា របស់ស្ត្រីអ៊ីរ៉ង់ ដែលមានប្រមាណ២សប្តាហ៍មកនេះ។
តែបានប្រមាណតែ១៥នាទីក្រោយមក សមត្ថកិច្ចតាលីបង់ បានចុះមកចាប់បំបែកពួកគេ និងបានដោយបានយកកាំភ្លើងបាញ់រះឡើងទៅលើ ដើម្បីបំភ័យ។ យោងតាមអ្នកកាសែតបារាំង AFP ដែលស្ថិតនៅទីតាំងផ្ទាល់ បានឲ្យដឹងថា សមត្ថកិច្ចតាលីបង់ បានយកដំបងដេញវាយស្ត្រីបាតុករ ថែមទៀតផង។
គួរបញ្ជាក់ នៅអ៊ីរ៉ង់ បាតុកម្មបានផុសផុលឡើងជារៀងរាល់ល្ងាច បន្ទាប់ពីមានករណីស្លាប់ស្ត្រីអ៊ីរ៉ង់ម្នាក់ ឈ្មោះ Mahsa Amini កាលពីថ្ងៃទី១៦កញ្ញា បន្ទាប់ពីស្ត្រីរូបនេះ ត្រូវបានសមត្ថកិច្ចប្រពៃណីអ៊ីស្លាមចាប់ឃាត់ខ្លួនដោយចោទថាមិនបានស្លៀកពាក់ត្រឹមត្រូវ និងទទូលក្រណាត់គ្រប់សក់ឲ្យជិត។ យោងតាម អង្គការ Human Rights Watch បាតុកម្មខ្លាំងក្លា២សប្តាហ៍មកនេះ បានបណ្តាលឲ្យស្លាប់មនុស្សចំនួន យ៉ាងហោច៧៦នាក់ ដោយសារតែការបង្ក្រាបយ៉ាងហិង្សារបស់សមត្ថកិច្ចអ៊ីរ៉ង់។
នៅទីក្រុងកាប៊ូល ស្ត្រីបាតុករអាហ្វហ្កានីស្ថានបានថ្លែងថា ស្ត្រីអាហ្វហ្កានីស្ថាន ត្រូវតែយកគម្រូតាមស្ត្រីអ៊ីរ៉ង់ ដែលមានភាពក្លាហាន ហ៊ានធ្វើបាតុកម្មមិនខ្លាចស្លាប់ មិនខ្លាចការចាប់ខ្លួន ដើម្បីទាមទារសិទ្ធិសេរីភាព។ ប្រជាជនអាហ្វហ្កានីស្ថាន ដែលធុញទ្រាន់នឿយណាយនឹងអំពើឧក្រិដ្ឋរបស់របបផ្តាច់ការតាលីបង់ គង់តែមានថ្ងៃក្រោកបះបោរប្រឆាំងនោះទេ។ ស្ត្រីបាតុករម្នាក់ បានលើកឡើងថា ដរាបណារបបអ៊ីស្លាមផ្តាច់ការដូចនៅអ៊ីរ៉ង់ និងដូចនៅអាហ្វហ្កានីស្ថាននេះ នៅតែគ្រប់គ្រងប្រទេស គឺស្ត្រីនឹងគ្មានសិទ្ធិសេរីភាពឡើយ។
គួររំលឹកថា ក្រុមតាលីបង់បានវិលត្រលប់មកគ្រប់គ្រងអំណាចវិញ នៅអាហ្វហ្កានីស្ថាន បន្ទាប់ពីអាមេរិកបានដកទ័ពចេញ កាលពីខែសីហាឆ្នាំ២០២១។ របបអ៊ីស្លាមផ្តាច់ការនេះ បានចេញវិធានការជាច្រើន រារាំងស្ត្រីមិនឲ្យធ្វើការ មិនឲ្យមានសិទ្ធិធ្វើដំណើរ និងបានបិទសាលារៀន សម្រាប់សិស្សស្រីថែមទៀត។ រដ្ឋាភិបាលតាលីបង់ បានបង្កើតកងសមត្ថកិច្ចពិសេស ចាំតាមដាន និងដាក់ពិន័យលើស្ត្រីអាហ្វហ្កានីស្ថាន ដែលស្លៀកពាក់មិនជិតខ្លួន មិនទទូលក្រណាត់លើក្បាលឲ្យជិត ឬមិនគោរពការបែងចែកនៅលាយឡំជាមួយមនុស្សប្រុស នៅតាមទីសាធារណៈជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ