អូស្រ្តាលី៖រដ្ឋាភិបាលបារម្ភខ្លាំងពីការបែកធ្លាយទិន្នន័យរបស់ក្រុមហ៊ុនទូរគមនាគមន៍ Optus

នៅក្នុងប្រទេសអូស្រា្តលី រដ្ឋាភិបាលបានថ្លែងក្នុងថ្ងៃអង្គារ ទី២៧ កញ្ញាពីការបារម្ភជាពន់ពេកចំពោះការបែកធ្លាយទិន្នន័យផ្ទាល់ខ្លួនរបស់អតិថិជននៃក្រុមហ៊ុនទូរគមនាគមន៍ដ៏ធំលំដាប់ទី២ ឈ្មោះ Optus កាលពីសប្តាហ៍កន្លងទៅ។ ការបែកធ្លាយទិន្នន័យផ្ទាល់ខ្លួននេះមានជាប់ពាក់ព័ន្ធនឹងអតិជនជិត ១០លាននាក់របស់ក្រុមហ៊ុន Optus។ ក្រៅពីទិន្នន័យផ្ទាល់ខ្លួនរបស់អតិថិជនក្រុមហ៊ុន Optus ក៏មានទិន្នន័យផ្ទាល់ខ្លួនរបស់សេវាសុខភាព Medicare ដែរ។

ចុះផ្សាយនៅថ្ងៃ៖ 27/09/2022 - 13:45

១២ នាទី

នាយករដ្ឋមន្រ្តីអូស្រា្តលី លោកអង់តូនី អាល់បានីស៊ី AP - Mark Baker

ដោយ៖ គួច គន្ធារ៉ា

ផ្សាយពាណិជ្ជកម្ម

ព័ត៌មានស្តីពីការបែកធ្លាយទិន្នន័យផ្ទាល់ខ្លួនរបស់អតិថិជននៃក្រុមហ៊ុនទូរគមានគមន៍ Optus មានជាប់ពាក់ព័ន្ធនឹងមនុស្សរហូតដល់ទៅ ៩លាន ៨សែននាក់ ពោលស្មើនឹងជាង ១ភាគ៣ នៃប្រជាជនអូស្ត្រាលីសរុប។ រដ្ឋមន្រ្តីក្រសួងមហាផ្ទៃលោកស្រី Clare O’Neil បានថ្លែងនាព្រឹកថ្ងៃអង្គារ ទី២៧ កញ្ញាថា លោកស្រីព្រួយបារម្ភជាពន់ពេកចំពោះការបែកធ្លាយព័ត៌មានផ្ទាល់ខ្លួនដែលកើតចេញពីការវាយប្រហារតាមអ៊ីនធ័រនែតលើក្រុមហ៊ុន Optus រួមទាំងទិន្នន័យរបស់សេវាសុខភាព Medicare។ តាមលោកស្រី Clare O’Neil ទិន្នន័យទាំងនេះកំពុងត្រូវបានចាយចែកដោយទទេ និងដោយមានការដោះដូរជាមួយលុយកាក់។

គួរបញ្ជាក់ថាកាលពីថ្ងៃចន្ទកន្លងទៅ មានជនអនាមិកម្នាក់ដែលតាំងខ្លួនជាអ្នកនៅពីក្រោយការលួចទិន្នន័យបានទម្លាយទិន្នន័យផ្ទាល់ខ្លួនរបស់មនុស្សជាង ១០ ០០០នាក់។ នៅក្នុងសាររបស់ខ្លួន ជនអនាមិករូបនេះបានស្នើឲ្យក្រុមហ៊ុន Optus បង់លុយចំនួន ១លានដុល្លារឲ្យរូបគេ។ បើមិនដូច្នោះទេ រូបគេនឹងទម្លាយទិន្នន័យកាន់តែច្រើនថែមទៀត។ តែទីបំផុតនាព្រឹកថ្ងៃអង្គារ ជនអនាមិករូបនេះដដែលបានដកថយមួយជំហានវិញដោយបញ្ជាក់នៅក្នុងសាររបស់ខ្លួនថា រូបគេនឹងមិនលក់ទិន្នន័យទៅឲ្យអ្នកណាទេ និងថា ទិន្នន័យដែលលួចចម្លងពីក្រុមហ៊ុន Optus ត្រូវបានលុបចោលហើយ។

យោងតាមក្រុមហ៊ុន Optus ដែលមានមូលដ្ឋាននៅក្នុងប្រទេសសិង្ហបុរី ទិន្នន័យផ្ទាល់ខ្លួនទាំងនេះមានឈ្មោះ ថ្ងៃខែឆ្នាំកំណើត លេខទូរស័ព្ទ អ៊ីមែល លេខលិខិតឆ្លងដែន និងលេខប័ណ្ណបើកបររបស់អតិថិជន។ ដោយឡែក អ្នកនាំពាក្យក្រុមហ៊ុន Optus បានប្រាប់ AFP ក្នុងថ្ងៃអង្គារ ទី២៧ កញ្ញាថា ប៉ូលិសសហព័ន្ធអូស្រា្តលីកំពុងស៊ើបអង្កេតលើការវាយប្រហារតាមអ៊ីនធ័រនែតលើក្រុមហ៊ុន Optus។ ចំណែករដ្ឋមន្រ្តីក្រសួងមហាផ្ទៃលោកស្រី Clare O’Neil បានស្តីបន្ទោសក្រុមហ៊ុន Optus ពីបទមិនបានការពារត្រឹមត្រូវនូវទិន្នន័យរបស់អតិថិជន។ តែលោកស្រី Clare O’Neil ក៏បានទទួលស្គាល់ថា អូស្រ្តាលីមានភាពយឺតយ៉ាវជិត ១០ឆ្នាំក្នុងរឿងការពារជីវិតឯកជន និងមានភាពយឺតយ៉ាវចំនួន ៥ឆ្នាំក្នុងរឿងសន្តិសុខអ៊ីនធ័រនែត៕