ចិនអះអាងពីការរួមសហប្រតិបត្តិការជាមួយរុស្ស៊ីដើម្បីកសាងសណ្តាប់ធ្នាប់ពិភពលោកមួយត្រឹមត្រូវជាងសព្វថ្ងៃ
នៅក្នុងប្រទេសចិន អ្នកទទួលខុសត្រូវជាន់ខ្ពស់នៃក្រសួងការបរទេសបានបញ្ជាក់នាថ្ងៃអង្គារ ទី១៣ កញ្ញាថា ចិនកំពុងធ្វើការជាមួយរុស្ស៊ីដើម្បីកសាងសណ្តាប់ធ្នាប់ពិភពលោកមួយឲ្យមានភាពត្រឹមត្រូវជាងសព្វថ្ងៃ។ ការបញ្ជាក់របស់អ្នកទទួលខុសត្រូវជាន់ខ្ពស់ចិនរូបនេះបានធ្វើឡើង ចំពេលដែលប្រធានាធិបតីចិនលោកស៊ី ជីនពីន និងសមភាគីរុស្ស៊ីលោកពូទីនគ្រោងជួបគ្នាក្នុងសប្តាហ៍នេះនៅក្នុងក្របខណ្ឌនៃកិច្ចប្រជុំកំពូលរបស់អង្គការនៃកិច្ចសហប្រតិបត្តិក្រុងសៀងហៃរៀបចំនៅក្នុងប្រទេសអូបេគីស្ថាន។
ចុះផ្សាយនៅថ្ងៃ៖
ស្តាប់ - ០២:១៧
នៅក្នុងសម័យសង្រ្គាមត្រជាក់ ចិន និងរុស្ស៊ីបានស្គាល់ទំនាក់ទំនងច្របូកច្របល់ខ្លាំង។ តែក្នុងរយៈពេលប៉ុន្មានទសវត្សរ៍ចុងក្រោយនេះ ប្រទេសទាំងពីរបានរំកិលរកគ្នាកាន់តែជិតឡើងៗជាងពេលណាទាំងអស់ ពិសេសដើម្បីប្រឈមទប់នឹងឥទ្ធិពលរបស់សហរដ្ឋអាមេរិក។ « ក្រោមការដឹកនាំប្រកបដោយយុទ្ធសាស្រ្តរបស់ប្រធានាធិបតីចិនលោកស៊ី ជីនពីង និងប្រធានាធិបតីរុស្ស៊ីលោកវ្ល៉ាឌីមៀរ ពូទីន ទំនាក់ទំនងរបស់យើងតែងចម្រើនទៅមុខ និងដើរលើផ្លូវត្រូវ » នេះជាការថ្លែងរបស់លោកយ៉ាង ជឺឈីនៅក្នុងសេចក្តីប្រកាសព័ត៌មានមួយរបស់ក្រសួងការបរទេសចិន។
ជាឥស្សរជនការទូតជាន់ខ្ពស់ជួរមុខនៅក្នុងក្រសួងការបរទេសដែលមានឥទ្ធិពលខ្លាំងជាងរដ្ឋមន្រ្តីការបរទេស លោកយ៉ាង ជឺឈីបានថ្លែងយ៉ាងដូចនេះនៅក្នុងជំនួបជាមួយឯកអគ្គរដ្ឋទូតរុស្ស៊ីនៅចិនលោក Andreï Denissov ដែលទើបបញ្ចប់បេសកកម្មរបស់ខ្លួន។ លោកយ៉ាង ជឺឈីបានគូសបញ្ជាក់ប្រាប់លោក Andreï Denissov ថា ចិនត្រៀមខ្លួនធ្វើការជាមួយរុស្ស៊ីជាអចិន្ត្រៃយ៍ដើម្បីបន្តអនុវត្តនូវស្មារតីនៃកិច្ចសហប្រតិបត្តិការជាយុទ្ធសាស្រ្តកម្រិតខ្ពស់រវាងប្រទេសទាំងពីរ ការពារផលប្រយោជន៍រួម និងជំរុញលើការអភិវឌ្ឍន៍សណ្តាប់ធ្នាប់អន្តរជាតិឲ្យមានភាពត្រឹមត្រូវ និងសមហេតុសមផលជាងសព្វថ្ងៃ។
គួរបញ្ជាក់ថា រុស្ស៊ីដែលកំពុងទទួលទណ្ឌកម្មបស្ចិមលោក និងកំពុងស្ថិតឯកោផ្លូវទូតដោយសារការចូលឈ្លានពានអ៊ុយក្រែនកំពុងព្យាយាមពង្រឹងទំនាក់ទំនងជាមួយក្រុមប្រទេសអាស៊ី ពិសេសចិន។ ចិនដែលមិនត្រឹមមិនបានថ្កោលទោសលើការឈ្លានពានរបស់រុស្ស៊ីលើអ៊ុយក្រែនទេ តែថែមទាំងបានបរិហារលើទណ្ឌកម្មបស្ចិមលោកប្រឆាំងរុស្ស៊ី និងការលក់អាវុធទៅឲ្យអ៊ុយក្រែន។ កាលពីសប្តាហ៍កន្លងទៅ ប្រធានរដ្ឋសភាចិនលោកលី ហ្សាងឈូដែលជាឥស្សរជនលំដាប់ទី៣ នៃរបបកុម្មុយនិស្តបានទៅបំពេញទស្សនកិច្ចនៅរុស្ស៊ី។ នាឱកាសនោះ លោកលី ហ្សាងឈូបានកោតសរសើរពីកម្រិតនៃការជឿទុកចិត្ត និងកិច្ចសហប្រតិបត្តិការមិនធ្លាប់មានពីមុនរវាងក្រុងប៉េកាំង និងក្រុងមូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ