ភេរវកម្មនៅមុខស្ថានទូតរុស្ស៊ីក្នុងក្រុងកាប៊ូល ស្លាប់មន្ត្រីទូតរុស្ស៊ី២នាក់
កាលពីព្រឹកថ្ងៃចន្ទ ទី៥កញ្ញា មានហេតុការណ៍ភេរវកម្មអត្តឃាតមួយ បានកើតឡើងនៅកណ្តាលទីក្រុងកាប៊ូល ខាងមុខអាគារស្ថានទូតរុស្ស៊ីប្រចាំអាហ្វហ្កានីស្ថាន។ យ៉ាងហោចណាស់ មានស្លាប់មន្ត្រីបុគ្គលិកការទូតរុស្ស៊ី ចំនួន២នាក់ ជនស៊ីវីលអាហ្វហ្កានីស្ថានចំនួន៤នាក់ ព្រមទាំងមានអ្នករបួសច្រើននាក់ទៀត។ នេះគឺជាលើកទី១ហើយ បន្ទាប់ពីក្រុមតាលីបង់ បានក្តោបក្តាប់អំណាចនៅអាហ្វហ្កានីស្ថាន ដែលស្ថានទូតបរទេស បានរងនូវការវាយប្រហារភេរវកម្មបែបនេះ។
ចុះផ្សាយនៅថ្ងៃ៖
ស្តាប់ - ០២:២៧
យោងតាមលិខិតប្រកាសរបស់ក្រសួងការបរទេសរុស្ស៊ី ម៉ោងប្រមាណជា ១០ និង៥០នាទី ព្រឹកថ្ងៃចន្ទ ទី៥កញ្ញា ជនម្នាក់បានបំផ្ទុះគ្រាប់បែកអត្តឃាត នៅក្បែរកៀកបំផុតនឹងអាគារស្ថានទូតរុស្ស៊ី ប្រចាំទីក្រុងកាប៊ូល។ ហេតុការណ៍នេះ បានបណ្តាលឲ្យស្លាប់ បុគ្គលិកបេសកកម្មការទូតរបស់រុស្ស៊ី ចំនួន២នាក់។
ក្រសួងមហាផ្ទៃតាលីបង់វិញ បានលើកឡើងតាមបណ្តាញTwitter ថាក្រៅពីមន្ត្រីទូតរុស្ស៊ី២នាក់ ភេរវកម្មនេះបានផ្តាច់ជីវិតជនស៊ីវីលអាហ្វហ្កានីស្ថាន ចំនួន៤នាក់ផងដែរ និងមានអ្នករបួសច្រើននាក់ទៀត។ ប្រភពដដែលនេះ អះអាងថា សមត្ថកិច្ចសន្តិសុខអាហ្វហ្កានីស្ថាន ដែលយាមនៅក្បែរស្ថានទូតរុស្ស៊ី បានបាញ់សម្លាប់ភេរវជន មុននឹងជននោះ ឈានចូលទៅដល់ទីតាំង ដែលជាកម្មវត្ថុនៃការវាយប្រហារ។ តែមុននឹងស្លាប់ ភេរវជនបានទាញបំផ្ទុះគ្រាប់បែកអត្តឃាត។
គួរបញ្ជាក់ថា គិតមកត្រឹមពេលនេះ មិនទាន់មានក្រុមភេរវកម្មណាមួយ ចេញមុខអះអាងថាជាស្នាដៃក្រុមខ្លួនទេ។ លោក ឌីមីទ្រ ប៉េឆកូវ អ្នកនាំពាក្យវិមានក្រឹមឡាំង បានលើកឡើងថា វាជារឿងមិនអាចទទួលយកបានទេ ដែលអាជ្ញាធរអាហ្វហ្កានីស្ថាន បណ្តោយឲ្យមានភេរវកម្ម វាយប្រហារស្ថានទូតរុស្ស៊ីបែបនេះ។ លោក ស៊ែរហ្កី ឡាវរ៉ូវ រដ្ឋមន្ត្រីការបរទេសរុស្ស៊ីវិញ បានអះអាងថា ត្រូវតែវែកមុខរកអ្នកទទួលខុសត្រូវ ឲ្យបានឆាប់ជាទីបំផុត។ ក្រសួងការបរទេសតាលីបង់ បានអះអាងថា នឹងមិនអនុញ្ញាតឲ្យសត្រូវណាមួយ មកធ្វើឲ្យខូចដល់ទំនាក់ទំនងការទូត រវាងរុស្ស៊ីនិងអាហ្វហ្កានីស្ថាន បានជាដាច់ខាត។
សូមរំលឹកថា រុស្ស៊ីគឺជាមហាអំណាចដ៏កម្រមួយ ដែលបានបន្តដាក់ទូតនៅអាហ្វហ្កានីស្ថាន បើទោះបីជាមិនបានប្រកាសទទួលស្គាល់រដ្ឋាភិបាលតាលីបង់ ជាផ្លូវការក៏ដោយ។ ប្រមាណ១ឆ្នាំមកនេះ ករណីភេរវកម្មនៅតែបន្តកើតមានជារឿយៗ ក្រោយការឡើងកាន់អំណាចរបស់ក្រុមតាលីបង់។ តែនេះជាលើកទី១ហើយ ដែលភេរវកម្មបានកើតឡើង នៅស្ថានទូតបរទេសកណ្តាលក្រុងកាប៊ូល។ ដូចសព្វមួយដង ក្រុមតាលីបង់ បានធានាអះអាងថា មិនធ្ងន់ធ្ងរ ហើយគ្មានអ្វីគួរឲ្យបារម្ភទេ។
ឆ្លើយប្រាប់អ្នកយកព័ត៌មានបារាំង AFP លោក Hekmatullah Hekmatt អ្នកវិភាគផ្នែកសន្តិសុខនៅអាហ្វហ្កានីស្ថាន បានលើកឡើងថា ករណីភេរវកម្មវាយប្រហារស្ថានទូតបរទេស កណ្តាលក្រុងបែបនេះ វាបង្ហាញឲ្យឃើញពីកម្សោយនៃបណ្តាញចារកិច្ចរបស់តាលីបង់។ សូម្បីតែសន្តិសុខស្ថានទូតបរទេស រដ្ឋាភិបាលរបស់ក្រុមតាលីបង់ មិនអាចការពារបានផង ចុះទម្រាំតែសុវត្ថិភាពអាយុជីវិតប្រជាពលរដ្ឋអាហ្វហ្កានីស្ថានទូទៅ? យ៉ាងណាមិញ ក្រោយករណីភេរវកម្មនេះ បេសកកម្មអង្គការសហប្រជាជាតិប្រចាំអាហ្វហ្កានីស្ថាន បានលើកឡើងថា វាដល់ពេលហើយដែលអាជ្ញាធរតាលីបង់ ត្រូវតែចាត់វិធានការឲ្យម៉ឺងម៉ាត់ និងមានប្រសិទ្ធិភាព ដើម្បីការពារសន្តិសុខមន្ត្រីការទូតបរទេស ព្រមទាំងប្រជាពលរដ្ឋអាហ្វហ្កានីស្ថានទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ