អង្គការក្រៅរដ្ឋាភិបាលអះអាងថា កាតាបានបណ្ដេញពលករបរទេសច្រើននាក់ ដែលធ្វើបាតុកម្មទាមទារប្រាក់ខែ
អាជ្ញាធរប្រទេសកាតា បានបណ្ដេញពលករបរទេសជាច្រើននាក់ ឲ្យត្រលប់ទៅប្រទេសដើមវិញ បន្ទាប់ពីពួកគេ បានធ្វើបាតុកម្មនៅទីក្រុងដូហា ទាមទារឲ្យក្រុមហ៊ុនបើកប្រាក់ខែដែលជំពាក់។ នេះបើផ្អែកតាមការឲ្យដឹង ពីអង្គការក្រៅរដ្ឋាភិបាលមួយ ដែលមានទីតាំងនៅទីក្រុងឡុងដ៍។ គួរបញ្ជាក់ថា មានពលករបរទេសជាច្រើន ដែលភាគច្រើនមកពីបណ្តាប្រទេសអាស៊ី បានទៅធ្វើការតាមការដ្ឋានសំណង់នៅក្នុងប្រទេសកាតា។ គម្រោងសំណង់របស់កាតា ដែលមួយផ្នែកធំ ដើម្បីរៀបចំធ្វើជាម្ចាស់ផ្ទះ នៃការប្រកួតបាល់ទាត់ពិភពលោក នៅខែវិច្ឆិកាខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
កាលពីថ្ងៃទី១៤សីហា យ៉ាងហោចណាស់ មានពលករបរទេសចំនួនប្រមាណ៦០នាក់ បានធ្វើបាតុកម្ម បិទផ្លូវនៅក្រុងដូហា ខាងមុខក្រុមហ៊ុន Al Bandary។ យោងតាមអង្គការ Equidem ដែលធ្វើសកម្មភាពការពារសិទ្ធិការងាររបស់ពលករចំណាកស្រុក បានឲ្យដឹងថា ក្នុងចំណោមពលករដែលធ្វើបាតុកម្មនៅដូហា មានអ្នកខ្លះត្រូវបានក្រុមហ៊ុនជំពាក់ប្រាក់ខែដល់ទៅ៧ខែ។
លោក Mustafa Qadri នាយកប្រតិបត្តិអង្គការ Equidem បានលើកឡើងថា លោកបានទាក់ទងជាមួយពលករដែលធ្វើបាតុកម្ម ហើយមានម្នាក់ ដែលត្រូវបានអាជ្ញាធរកាតាបណ្តេញចេញ បានត្រលប់ទៅដល់ប្រទេសណេប៉ាល់វិញ។ លោកបានអះអាងថា ក្រៅពីនេះ មានពលករច្រើននាក់ផ្សេងទៀត ខ្លះមកពីណេប៉ាល់ ឥណ្ឌា បង់ក្លាដែស អេហ្ស៊ីប និងហ្វីលីពីនជាដើម ក៏ត្រូវបានអាជ្ញាធរប្រទេសកាតាបណ្ដេញចេញពីស្រុកដែរ បន្ទាប់ពីពួកគេបានធ្វើបាតុកម្មទាមទារប្រាក់ខែ។
ដោយឡែក កាលពីថ្ងៃអាទិត្យទី២១សីហា តំណាងរដ្ឋាភិបាលកាតា បានអះអាងថា ពលករដែលបានធ្វើបាតុកម្ម គឺបានបង្កការប៉ះពាល់ដល់សណ្តាប់ធ្នាប់សាធារណៈ។ ដោយមិនបញ្ជាក់ឲ្យច្បាស់ អំពីចំនួនពលករដែលពាក់ព័ន្ធ មន្ត្រីរដ្ឋាភិបាលកាតា បានត្រឹមបញ្ជាក់ថា ពលករខ្លះត្រូវបានចាប់ឃុំខ្លួន ហើយអាចប្រឈមនឹងការបណ្ដេញចេញពីប្រទេស។
ចំណែករដ្ឋមន្ត្រីក្រសួងការងារកាតាវិញ បានអះអាងថា ក្រសួងបានបង់ប្រាក់ខែទៅឲ្យពលករ បុគ្គលិករបស់ក្រុមហ៊ុន Al Bandary រួចរាល់អស់ហើយ។ លោកម្នាក់នេះ ក៏បានអះអាងបន្ថែមថា ក្រសួងការងារកាតា កំពុងតែចាត់វិធានការ ទៅលើក្រុមហ៊ុននេះ ពាក់ព័ន្ធនឹងការមិនបើកប្រាក់ខែឲ្យបុគ្គលិក។
គួរបញ្ជាក់ថា ជាមួយនឹងការរៀបចំធ្វើជាម្ចាស់ផ្ទះ ការប្រកួតកីឡាបាល់ទាត់ពិភពលោក ដែលនឹងចាប់ផ្តើមនៅថ្ងៃទី២០វិច្ឆិកាខាងមុខ កាតាបានសាងសង់សំណង់ហេដ្ឋារចនាសម្ព័ន្ធជាច្រើន។ ក៏ប៉ុន្តែ កន្លងមកអង្គការសិទ្ធិមនុស្សជាច្រើន តែងតែបានរិះគន់រដ្ឋាភិបាលកាតា ថាមានច្បាប់ធូរលុង បើកដៃឲ្យក្រុមហ៊ុនឯកជន ជិះជាន់សិទ្ធិរបស់ពលករ ដែលភាគច្រើន សុទ្ធតែជាពលករចំណាកស្រុក មកពីប្រទេសក្រីក្រនៅអាស៊ី។ អង្គការសិទ្ធិមនុស្សខ្លះ បានថែមទាំងអំពាវនាវឲ្យ FIFA ត្រូវតែបង់ថ្លៃសំណងជំងឺចិត្ត ទៅឲ្យពលករបរទេស ដែលត្រូវគេជិះជាន់ធ្វើបាបនៅកាតា។
ប្រឈមនឹងការរិះគន់នេះ រដ្ឋាភិបាលកាតា បានធានាអះអាងថា ខ្លួនបានធ្វើកំណែទម្រងច្បាប់ច្រើនណាស់ តួយ៉ាង ដូចជាការកំណត់ប្រាក់ខែអប្បរមា ព្រមទាំងបានរារាំងក្រុមហ៊ុននយោជក មិនឲ្យមានសិទ្ធិហាមឃាត់ពលករបរទេស ដែលចង់ត្រលប់ទៅស្រុកកំណើត ឬក៏ចង់ដូរការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ