តុលាការរបបយោធាភូមា កាត់ទោសលោកស្រី អ៊ុង សានស៊ូជី ឲ្យជាប់ពន្ធនាគារ៦ឆ្នាំពីបទពុករលួយ
ថ្ងៃចន្ទនេះ តុលាការរបបយោធា របស់ភូមាបានកាត់ទោសឲ្យលោកស្រីអ៊ុងសាន ស៊ូជី ជាប់គុក រយៈពេល ៦ឆ្នាំពីបទប្រព្រឹត្តិអំពើពុករលួយ ធ្វើអោយទោសសរុបរបស់មេដឹកនាំម្នាក់នេះឡើងរហូតដល់ទៅ ១៧ ឆ្នាំ។ លោកស្រី អ៊ុងសាន ស៊ូជី ដែលមានអាយុ ៧៧ ឆ្នាំ ត្រូវបានគេឃុំខ្លួន បន្ទាប់ពីមានរដ្ឋប្រហារកាលពីថ្ងៃទី ១ ខែកុម្ភៈ ឆ្នាំមុននេះ ដែលបានផ្តួលរំលំ រដ្ឋាភិបាលរបស់លោកស្រី បញ្ចប់របបលទ្ធិប្រជាធិបតេយ្យដ៏ខ្លីរបស់ប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
របបយោធានេះបានដណ្តើមអំណាច ដោយធ្វើការចោទប្រកាន់ទៅលើរដ្ឋាភិបាលរបស់លោកស្រីអ៊ុងសាន ស៊ូជី ថាបានក្លែងបន្លំលទ្ធផលការបោះឆ្នោតកាលពីឆ្នាំ២០២០ ដើម្បីទម្លាក់គណបក្សយោធា ទោះអ្នកសង្កេតការណ៍អន្តរជាតិបានបញ្ជាក់ថា ការបោះឆ្នោតនេះប្រកបទៅសេរីភាព និងយុត្តិធម៌ក៏ដោយ។
ចាប់តាំងពីពេលនោះមក លោកស្រី បានរងការចោទប្រកាន់ជាបន្តបន្ទាប់ ដែលរួមមាន ការបំពានការងារសម្ងាត់ផ្លូវការរបស់រដ្ឋ អំពើពុករលួយ និងការក្លែងបន្លំសន្លឹកឆ្នោត ដែលអាចធ្វើលោកស្រីប្រឈមមុខនឹងការជាប់ពន្ធនាគារជាច្រើនឆ្នាំ។
ប្រភពដែលបានស្នើសុំមិនបញ្ចេញឈ្មោះបាននិយាយថា លោកស្រី អ៊ុង សានស៊ូជី ត្រូវបានកាត់ទោសកាលពីថ្ងៃចន្ទនេះឱ្យជាប់ពន្ធនាគាររយៈពេលប្រាំមួយឆ្នាំ ក្រោមបទចោទប្រកាន់ ប្រឆាំងអំពើពុករលួយចំនួនបួន ហើយក៏បានបន្ថែមទៀតថា លោកស្រីមើលទៅនៅមានសុខភាពល្អនៅឡើយទេ តែគាត់មិនបានធ្វើសេចក្តីថ្លែងការណ៍ឆ្លើយតបអ្វីឡើយ បន្ទាប់ពីការប្រកាសទោសចុងក្រោយនេះ។
សូមបញ្ជាក់ថាអ្នកនាំពាក្យរបបយោធាក្នុងពេលនេះ មិនព្រមទទួលយកការទាក់ទងដើម្បីធ្វើសេចក្តីថ្លែងការណ៍នោះទេ ហើយអ្នកកាសែតក៏ត្រូវបានហាមឃាត់មិនឲ្យចូលយកព័ត៌មានក្នុងតុលាការផងដែរ។
មុនពេលចេញសាលក្រមថ្មីនេះផងដែរ ម្ចាស់ពានរង្វាន់ណូបែលសន្តិភាពម្នាក់នេះ ត្រូវបានតុលាការកាត់ទោសឱ្យជាប់ពន្ធធនាគារ១១ឆ្នាំរួចមកហើយ ពីបទពុករលួយ ញុះញង់ប្រឆាំងនឹងយោធា បំពានច្បាប់ Covid-19 និងបទបំពានច្បាប់ទូរគមនាគមន៍។
ឆ្លើយតបនឹងការកាត់ក្តីនេះដែរ អាមេរិក បានអំពាវនាវឲ្យមានការដោះលែងលោកស្រី និងមន្ត្រីរបបប្រជាធិបតេយ្យផ្សេងទៀតជាបន្ទាន់ដោយហៅការកាត់ទោសនេះថាជា ការប្រមាថដល់ភាពយុត្តិធម៌ និងនីតិរដ្ឋទាំងស្រុង។
អស់រយៈពេលជាង ៣០ ឆ្នាំមកហើយ ដែលលោកស្រី អ៊ុង សានស៊ូជី បានធើ្វជាមុខមាត់នៃក្តីសង្ឃឹមលទ្ធិប្រជាធិបតេយ្យរបស់ប្រទេសភូមា ប៉ុន្តែការកាត់ទោសថ្មីនេះ មានន័យថា លោកស្រី នឹងខកខាន មិនបានចូលរួមការបោះឆ្នោត ដែលគ្រោងនឹងកើតឡើងនៅឆ្នាំក្រោយនេះទេ។
កាលពីខែមិថុនានេះ លោកស្រី ត្រូវបានគេផ្ទេរចេញ ពីផ្ទះរបស់លោកស្រី ទៅឃុំខ្លួននៅ ពន្ធនាគារមួយក្នុងរដ្ឋធានី Naypyidaw ហើយទំនាក់ទំនងរបស់លោកស្រីទាំងអស់ត្រូវបានផ្តាច់ លើកលែងតែការជួបជាមួយមេធាវីតែប៉ុណ្ណោះ។
ក្រុមសម្ព័ន្ធនយោបាយរបស់លោកស្រីជាច្រើននាក់ ក៏ត្រូវបានគេចាប់ឃុំខ្លួនផងដែរ ក្នុងនោះមានរដ្ឋមន្ត្រីជាន់ខ្ពស់ម្នាក់ត្រូវបានកាត់ទោសឱ្យជាប់ពន្ធនាគាររហូតដល់ ៧៥ ឆ្នាំ ហើយកាលពីខែមុននេះដែរ អតីតសមាជិកសភា មកពីគណបក្ស សម្ព័ន្ធជាតិដើម្បីប្រជាធិបតេយ្យរបស់លោកស្រី ត្រូវបានរបបយោធានេះ ប្រហារជីវិត ពីបទល្មើស ក្រោមច្បាប់ប្រឆាំងអំពើភេរវកម្ម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ