ពួកតាលីបង់ បាញ់គ្រាប់ពិតឡើងលើ បំបែកក្រុមនារីបាតុករ
ថ្ងៃសៅរ៍ ទី១៣សីហា នៅក្រុងកាប៊ូល នារីអាហ្វហ្កានីស្ថានជាច្រើននាក់ ធ្វើបាតុកម្មទាមទារទទួលបានសិទ្ធិធ្វើការងារ និងសិទ្ធទទួលការសិក្សារៀនសូត្រ។ ការទាមទារសិទ្ធទាំងនេះ គឺជិតដល់ពេលគម្រប់ខួប១ឆ្នាំនៃការឡើងក្តាប់អំណាចរបស់ពួកតាលីបង់ ដែលកាន់សាសនាអ៊ីស្លាមដ៏តឹងតែង។ ពួកអាជ្ញាធរកម្លាំងតាលីបង់ បានបាញ់គ្រាប់កាំភ្លើងពិតជាច្រើនគ្រាប់ឡើងទៅលើ ដើម្បីបំភ័យនិងបំបែកក្រុមអ្នកតវ៉ា។
ចុះផ្សាយនៅថ្ងៃ៖
ស្តាប់ - ០៣:០៣
«ចំណីអាហារ ការសិក្សារៀនសូត្រ ការងារ និងសេរីភាព » ជាពាក្យមួយមាត់ៗ តែមាំ ដែលនារីប្រមាណ៤០នាក់ បានស្រែកទាមទារ នៅកណ្តាលទីក្រុងកាប៊ូល ពីថ្ងៃសៅរ៍។ នៅមុខក្រសួងអប់រំអាហ្វហ្កានីស្ថាន ជាទីដែល ក្រុមបាតុករស្រែកបន្ទរទៀតថា «យុត្តិធម៌! យុត្តិធម៌! យើងទ្រាំអត់ធ្មត់លែងបានហើយចំពោះអវិជ្ជា»។ មិនតែប៉ុណ្ណោះ មានបដាមួយដែលគេអាចអានថា «ថ្ងៃទី១៥សីហា ជាថ្ងៃដ៏ខ្មៅងងឹត»។
ការធ្វើបាតុកម្មនេះ គឺឋិតក្នុងបរិបទពាក់កណ្តាលខែសីហា ខួប១ឆ្នាំដែលជាពេលវេលាឡើងកាន់អំណាចដោយកម្លាំងចុងកាណុច ជាថ្មីម្តងទៀត ពីសំណាក់ពួកខ្មាន់កាំភ្លើងតាលីបង់។
ដើម្បីបំបែកនិងសម្លុតក្រុមស្រីៗអ្នកតវ៉ា ពួកកម្លាំងទាហានតាលីបង់ បានប្រើហិង្សាបំបែកបាតុករ ហែកបដាទាមទារកម្ទេចចោល ហើយពួកកម្លាំងឈ្លបសម្ងាត់តាលីបង់ ក៏បានបាញ់គ្រាប់កាំភ្លើងពិតឡើងលើ រយៈពេលប្រហែល៥នាទី។ ក្រុមនារីអ្នកតវ៉ា មួយចំនួន ត្រូវពួកកម្លាំងតាលីបង់ វាយនឹងគល់ស្វាយកាំភ្លើងវែង ហើយពួកគេក៏បានដកហូតទូរសព្ទដៃរបស់ពួកនាងៗអ្នកតវ៉ាទៅទៀត។ មិនតែប៉ុណ្ណោះ សូម្បីតែ ក្រុមអ្នកកាសែតដែលតាមដានយកព័ត៌មានបាតុកម្ម ក៏ត្រូវពួកយោធាតាលីបង់ វាយយ៉ាងដំណំដែរ។
បើទោះជាយ៉ាងនេះក្តី ស្រីម្នាក់ជាអ្នកតវ៉ា ប្រាប់អ្នកកាសែតទីភ្នាក់បារាំងអាអែហ្វប៉េ ថាខ្លួននឹងនៅតែបន្តបាតុកម្មតទៅទៀត ដើម្បីទាមទារសិទ្ធិរបស់ខ្លួន។
ជាការកត់សម្គាល់របស់ក្រុមអង្គការសង្គមស៊ីវិល តាំងពីពួកតាលីបង់ឡើងកាន់អំណាច នៅខែសីហាឆ្នាំមុនមក គឺរបបពួកតាលីបង់ដែលកាន់សាសនាអ៊ីស្លាមយ៉ាងជ្រុលនិយមតឹងតែង បានរឹតបន្តឹង បំបិទសិទ្ធិស្ត្រី យ៉ាងអាក្រក់ខ្លាំងដែលគេមិនធ្លាប់ពើបប្រទះសោះ នារយៈពេល២០ឆ្នាំចុងក្រោយ នៅអាហ្វហ្កានីស្ថាន។ ពួកតាលីបង់បំបិទសិទ្ធិសេរីភាព និងបង្ខំឲ្យស្ត្រីគោរពដើរតាមគោលគំនិតនិយមនៃសាសនាអ៊ីស្លាម តាមបែបផែនរបស់ពួកគេ។ នៅខែមេសាកន្លងទៅ រដ្ឋាភិបាលតាលីបង់ ក៏បានចេញក្រឹត្យច្បាប់ដ៏តឹងតែង ចាប់បង្ខំដាក់កាតព្វកិច្ចតម្រូវឲ្យ នារីភេទ ប្រើក្រណាត់បិទមុខបិទសក់ជិតនៅទីសាធារណៈ
ជាក់ស្តែង ពួកតាលីបង់ មិនអនុញ្ញាតឲ្យនារីបម្រើការងារក្នុងវិស័យសាធារណៈ រឹតត្បិតសិទ្ធិធ្វើដំណើរដើរហើរ ហើយនិងហាមក្មេងស្រីៗ មិនឲ្យទទួលបានសិក្សាវែងឆ្ងាយ ដល់អនុវិទ្យាល័យនិងវិទ្យាល័យទេ។ ក្នុងសេចក្តីថ្លែងការណ៍មួយ នៅថ្ងៃព្រហស្បតិ៍ អង្គការសិទ្ធមនុស្ស Human Rights Watch បានស្នើអំពាវនាវឲ្យពួកតាលីបង់ពិចារណាឡើងវិញជាថ្មី ដកបំរាមដ៏ឃោរឃៅ ដែលហាមឃាត់កូនស្រីមិនឲ្យរៀនវែងឆ្ងាយ នោះចេញចោលទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ