ប្រមុខការទូតអាមេរិកទៅនៅហ្វីលីពីនដើម្បីពង្រឹងចំណងទូតនិងយោធា
រដ្ឋមន្រ្តីក្រសួងការបរទេស លោក អង់តូនី ប្ល៊ីងកិន បានអញ្ជើញទៅដល់ប្រទេសហ្វីលីពី កាលពីល្ងាចថ្ងៃសុក្រ បន្ទាប់ពីចាកចេញពី កម្ពុជា ជាទីដែលរៀបចំកិច្ចប្រជុំថ្នាក់រដ្ឋមន្ត្រីការបរទេសអាស៊ាន។ នៅទីក្រុងម៉ានីល ប្រមុខការទូតអាមេរិក បានលើកឡើងជាថ្មី ប្រាប់សមភាគីរបស់ខ្លួន ពីកិច្ចសហការយោធា រវាងប្រទេសទាំងពីរ។ ការលើកឡើងនេះ ពុំមែនជារឿងចៃដន្យនោះទេ។ មិនចៃដន្យ ពីព្រោះតែ ហ្វីលីពីន នៅមិនឆ្ងាយប៉ុន្មានពីសមយុទ្ធរបស់ចិន ធ្វើឡើងនៅក្បែរ កោះតៃវ៉ាន់។ សូមជ្រាបថា ហ្វីលីពីន ជាប្រទេសក្នុងភាគីជម្លោះមួយ នៃបញ្ហាសមុទ្រចិនខាងត្បូង ហើយក្នុងបរិបទសមយុទ្ធយោធាចិន នៅក្បែរតៃវ៉ាន់ ហើយតៃវ៉ាន់ ដែលនៅចម្ងាយតែ ៤០០គីឡូម៉ែត្រ ភាគខាងជើងហ្វីលីពីន គឺចាំបាច់ណាស់ដែល ហ្វីលីពីន និងអាមេរិក ត្រូវរត់រកពិគ្រោះគ្នា។
ចុះផ្សាយនៅថ្ងៃ៖
ស្តាប់ - ០២:៣៣
នៅរដ្ឋធានីម៉ានីល រដ្ឋមន្រ្តីក្រសួងការបរទេសសហរដ្ឋអាមេរិក ជួបសំណេះសំណាលគ្នាដោយផ្ទាល់ ជាមួយនឹង លោកប្រធានាធិបតីថ្មីរបស់ហ្វីលីពីន ហើយនិងជួបជជែកជាមួយនឹងប្រមុខការទូតហ្វីលីពីនតាមរយៈវីដេអូ ព្រោះរដ្ឋមន្ត្រីការបរទេសហ្វីលីពីន ឆ្លងជំងឺកូវីដ មិនអាចមកជួបប្រមុខការទូតអាមេរិកដោយផ្ទាល់បានទេ។
កិច្ចពិភាក្សាគ្នារវាងថ្នាក់ដឹកនាំប្រទេសជាតិទាំងពីរ គឺផ្តោតជាសំខាន់ទៅលើកិច្ចសហប្រតិបត្តិការទ្វេភាគី ពិសេសពាក់ព័ន្ធ នឹងវិស័យថាមពល ពាណិជ្ជកម្ម និងការវិនិយោគ ហើយរឹងរឹតតែសំខាន់គឺជុំវិញផ្នែកសហប្រតិបត្តិការយោធា។
ត្រង់ចំណុចដ៏សំខាន់ចុងក្រោយនេះ លោក អង់តូនី ប្ល៊ីងកិន បានគូសបង្ហាញសមភាគីហ្វីលីពីន ពីការប្តេជ្ញាចិត្តមិនផ្លាស់ប្តូរ របស់សហរដ្ឋអាមេរិក ចំពោះកិច្ចព្រមព្រៀងរវាងរដ្ឋបាលក្រុងម៉ាលីននិងវ៉ាស៊ីនតោន ស្តីពីការការពារជាតិរួម ដែលចុះហត្ថលេខាឆ្នាំ១៩៥១ នៅពេលសង្គ្រាមកូរ៉េ កំពុងឆាបឆេះ។
គួររំឮកជូនថា សហរដ្ឋអាមេរិក ភ្ជាប់ ហ្វីលីពីន ក្នុងវិស័យយោធា គឺតាមរយៈកតិកាសញ្ញាមួយស្តីពីសន្តិសុខ ដែលអាចបើកផ្លូវអនុញ្ញាតឲ្យ កងទ័ពសហរដ្ឋអាមេរិក ដាក់ពង្រាយយោធាលើទឹកដីហ្វីលីពីន ហើយនិងអាចរក្សាទុកសម្ភារៈសឹកសង្គ្រាមលើដែនដីអតីតអាណានិគមមួយនេះផង។
៥-៦ឆ្នាំកន្លងទៅ ក្នុងអាណត្តិរបស់អតីតប្រធានាធិបតី រ៉ូឌ្រីហ្គោ ឌុយទែរតេ (Rodrigo Duterte) គឺទំនាក់ទំនងប្រទេសទាំងពីរមិនសូវចុះសម្រុះសម្រួលរលូនប៉ុន្មានទេ។ ក៏ប៉ុន្តែ សម្រាប់អាណត្តិដឹកនាំថ្មី របស់ លោក ហ្វ៊ែរឌីណង់ ម៉ាកូស ជូញ៉រ (Ferdinand Marcos Jr) ដែលឡើងកាន់អំណាចបានជាងមួយខែមកនេះ គឺគេមើលឃើញថាចំណងទូតបានប្រសើរឡើងវិញច្រើន។
ជាក់ស្តែងទៅ សហរដ្ឋអាមេរិក និងហ្វីលីពីន មានទំនាក់ទំនងម្តងក្តៅម្តងត្រជាក់ ស្មុគស្មាញ និងជាប់ជំពាក់យូរខ្លាំង ពិសេសក្នុងរជ្ជកាលដឹកនាំរបស់ លោក ហ្វ៊ែរឌីណង់ ម៉ាកូស ឪពុក នាសម័យសង្គ្រាមត្រជាក់។ លោក ហ្វ៊ែរឌីណង់ ម៉ាកូស ក្រោយពីត្រូវចលនាប្រជាជនបណ្តេញចេញពីអំណាច គឺលោកបានរត់ភៀសខ្លួនទៅនៅ ហាវៃ សហរដ្ឋអាមេរិក នៅឆ្នាំ១៩៨៦។
ពេលនេះ រជ្ជកាលគ្រួសារម៉ាកូលដឹកនាំជាតិជាថ្មី ជាឱកាសប្រសើរឲ្យ ប្រមុខការទូតសហរដ្ឋអាមេរិក លោក អង់តូនី ប្ល៊ីងកិន អាចលើកឡើងពីសម្ធ័ន្ធភាពដ៏រឹងមាំរវាងរដ្ឋទាំងពីរ ដោយលោកគិតថា សម្ធ័ន្ធភាពនេះនឹងរឹងរឹតកាន់តែមាំថែមទៀត។ ក្នុងជំនួបនេះ លោកប្រធានាធិបតីថ្មីរបស់ហ្វីលីពីន ហ្វ៊ែរឌីណង់ ម៉ាកូស ជូញ៉រ បានអបអរសាទរចំពោះទំនាក់ទំនងយ៉ាងពិសេសនៃប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ