ហ្វីលីពីន៖ អតីតប្រធានាធិបតី ហ្វីដែល រ៉ាម៉ូស ទទួលមរណភាពក្នុងវ័យ៩៤ឆ្នាំ
ថ្ងៃទី៣១កក្កដា អតីតប្រធានាធិបតី ហ្វីដែល រ៉ាម៉ូស (Fidel Ramos) បានទទួលអនិច្ចកម្មក្នុងជន្មាយុ៩៤ឆ្នាំ។ កាន់អំណាចពីឆ្នាំ១៩៩២ ដល់១៩៩៨ លោក ហ្វីដែល រ៉ាម៉ូស បានត្រូវប្រជាពលរដ្ឋនិងថ្នាក់ដឹកនាំហ្វីលីពីន គោរពសរសើរ និងចាត់ទុកជារដ្ឋបុរសមួយរូប ដែលបានជួយជ្រោមជ្រែងប្រទេសឲ្យជួបកំណើនសេដ្ឋកិច្ចនិងសន្តិភាព។
ចុះផ្សាយនៅថ្ងៃ៖
ស្តាប់ - ០២:២១
វិមានប្រធានាធិបតីហ្វីលីពីន សម្តែងក្តីសោកស្តាយខ្លាំងចំពោះមរណភាពលោក ហ្វីដែល រ៉ាម៉ូស និងបានសង្កត់ធ្ងន់ថា អតីតប្រធានាធិបតីរូបនេះ បានចូលរួមចំណែកក្នុងការផ្លាស់ប្តូរប្រទេសជាតិយ៉ាងសម្បើម។ ចំណែក ប្រតិភូហ្វីលីពីនប្រចាំសហភាពអឺរ៉ុប បានសម្តែងមរណទុក្ខ និងបានគូសបង្ហាញថា លោក ហ្វីដែល រ៉ាម៉ូស ជាអតីតប្រធានាធិបតីដែលលះបង់ដើម្បីជាតិ និងជាសសរស្តមមួយនៃប្រជាធិបតេយ្យហ្វីលីពីន។
ប្រសូត្រក្នុងវង្សត្រូកូលអ្នកការទូត លោក ហ្វីដែល រ៉ាម៉ូស បានទទួលការសិក្សារៀនសូត្រចប់ផ្នែកកងទ័ព នៅសាលាយោធាដ៏ល្បីល្បាញ West Point របស់សហរដ្ឋអាមេរិក។
ក្នុងអាណត្តិដឹកនាំជាតិ លោក ហ្វីដែល រ៉ាម៉ូស ត្រូវគេទទួលស្គាល់យ៉ាងល្បីថា ជាថ្នាក់ដឹកនាំមួយរូប ដែលហ្មត់ចត់និងស្វិតស្វាញធ្វើការ។ ជំនាន់នោះ លោកបានជួយដោះស្រាយវិបត្តិថាមពលរបស់ហ្វីលីពីន ដោះស្រាយបញ្ហាប្រព័ន្ធទូរគមនាគមន៍ និងបញ្ហាអាកាសចរណ៍ ហើយព្រមទាំងជ្រោមជ្រែងវិស័យសេដ្ឋកិច្ចជាតិ ឲ្យជួបកំណើនមួយយ៉ាងគួរឲ្យកត់សម្គាល់។ ក៏ប៉ុន្តែ អ្វីដែលគេគ្រប់គ្នារិះគន់នោះ គឺលោក ហ្វីដែល រ៉ាម៉ូស ដឹកនាំតឹងតែងជ្រុលចំពោះគោលនយោបាយប្រជាសាសន៍ ដែលលោកចង់ទប់ទល់រាំងស្ទះអត្រាកំណើនប្រជាជនឆាប់រហ័សពេក។
នៅឆ្នាំ២០១៦ លោក ហ្វីដែល រ៉ាម៉ូស ជាអ្នកនយោបាយចាស់វស្សាមុនដំបូងគេ ដែលគាំទ្របេក្ខភាព លោក ឌុយទែរតេ ឲ្យធ្វើជាប្រធានាធិបតី។ ក្រោយឈ្នះឆ្នោត, លោក ឌុយទែរតេ បានតែងតាំងលោក ហ្វីដែល រ៉ាម៉ូស ជាបេសកជនពិសេសរបស់ប្រធានាធិបតី ដើម្បីទៅក្រុងប៉េកាំង សម្របសម្រួលវិវាទជាមួយមហាយក្សចិន ក្នុងសំណុំរឿងសមុទ្រចិនខាងត្បូង។ ទោះជាយ៉ាងនេះក្តី លោក ហ្វីដែល រ៉ាម៉ូស នៅទីបំផុត បានសម្តែងមតិជំទាស់នឹងនយោបាយប្រឆាំងគ្រឿងញឿន ហើយនិងសន្ទរកថាប្រឆាំងសហរដ្ឋអាមេរិក ពីសំណាក់លោក ឌុយទែរតេ។
ចំណុចមួយក្នុងប្រវត្តិសាស្ត្រហ្វីលីពីនដែលមិនគួរភ្លេច គឺលោក ហ្វីដែល រ៉ាម៉ូស ក្នុងឋានៈជាថ្នាក់ដឹកនាំនិងជាមន្ត្រីជាន់ខ្ពស់គ្រប់គ្រងខាងនគរបាលនិងយោធា លោកបានចូលផ្តួលរំលំអំណាចអតីតប្រធានាធិបតីផ្តាច់ការ Ferdinand Marcos និងដែលបណ្តាលឲ្យមានមនុស្សស្លាប់ជាច្រើននាក់។ ត្រង់នេះ លោក ហ្វីដែល រ៉ាម៉ូស ធ្លាប់បានទទួលស្គាល់ សុំទោស និងសម្តែងក្តីសោកស្តាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ