រញ្ជួយដី កម្រិត៧រិចទឺរ នៅភាគខាងជើងប្រជុំកោះហ្វីលីពីន
គ្រោះរញ្ជួយដីមួយ ក្នុងកម្រិត៧រិចទឺរ បានកើតឡើងនៅភាគខាងជើងប្រជុំកោះហ្វីលីពីន កាលពីព្រឹកថ្ងៃពុធ ទី២៧កក្កដានេះ។ យោងតាមអាជ្ញាធរហ្វីលីពីន ករណីរញ្ជួយដីនេះ បានបណ្តាលឲ្យមានមនុស្សស្លាប់ចំនួន យ៉ាងហោច៣នាក់ និងរងរបួសប្រមាណជិត១០០នាក់។ កម្លាំងរញ្ជួយ បានធ្វើឲ្យកក្រើកអាគារជាច្រើន នៅក្នុងរដ្ឋធានីម៉ានីលផងដែរ ដែលស្ថិតនៅចំងាយប្រមាណ៣០០គីឡូម៉ែត្រ ភាគខាងត្បូងតំបន់កើតហេតុ។
ចុះផ្សាយនៅថ្ងៃ៖
ស្តាប់ - ០២:០៥
យោងតាមវិទ្យាស្ថានសិក្សារញ្ជួយដី របស់សហរដ្ឋអាមេរិក គ្រោះរញ្ជួយដីថ្មីនេះ បានកើតឡើងនៅវេលាម៉ោង ប្រមាណ៨និង៤៣នាទី ក្នុងខេត្តAbra ដែលជាតំបន់ភ្នំស្ថិតនៅលើកោះLuzon ភាគខាងជើងប្រជុំកោះហ្វីលីពីន។ មានកម្លាំងរញ្ជួយ ចំនួន៧រិចទឺរ រីឯជម្រៅស្ថិតនៅរាក់បង្គួរ ប្រមាណជា១០គីឡូម៉ែត្រក្នុងស្រទាប់ដី។
ជាសំណាងល្អ យោងតាមអាជ្ញាធរហ្វីលីពីន គ្រោះរញ្ជួយដីនេះមិនបានបង្កឲ្យមានមនុស្សស្លាប់ច្រើនទេ។ ក្រៅពីខេត្ត Abra ដែលមានមនុស្សរងរបួសជាង៦០នាក់ គ្រោះរញ្ជួយដីនេះ បានបង្កឲ្យខូចខាត បាក់រលំអាគារ ជាច្រើនកន្លែងនៅក្នុងខេត្ត Kalinga និងខេត្ត Benguet ។ ទីក្រុងម៉ានីល ដែលស្ថិតនៅចំងាយប្រមាណ៣០០គីឡូម៉ែត្រ ខាងត្បូងចំណុចកណ្តាលនៃការរញ្ជួយ អាគារជាច្រើនបានរង្គើរ ធ្វើប្រជាជនបានរត់ផ្អើលឈូរឆ។ អាគារបុរាណខ្លះ ក្នុងសម័យអាណានិគម ចន្លោះពីសតវត្សទី១៦ ដល់១៩ នៅក្នុងខេត្ត Ilocos ក៏បានរងការខូចខាតដែរ។
ផ្អែកតាមទីភ្នាក់ងារជាតិហ្វីលីពីនគ្រប់គ្រងគ្រោះមហន្តរាយ ការរញ្ជួយដីក៏បានបង្កឲ្យមានករណីបាក់រមៀលដី នៅតាមចំនុចខ្លះផងដែរ។ ដោយឡែកទំនប់ទឹក នៅក្បែរចំណុចរញ្ជួយកណ្តាល គឺមិនមានខូចខាតទេ។ អាជ្ញាធរហ្វីលីពីនកំពុងព្យាយាមសំអាត កកាយគំនរបាក់បែកចេញពីតាមដងផ្លូវ។
សូមបញ្ជាក់ថា ប្រជុំកោះហ្វីលីពីន ស្ថិតនៅចំពីលើបណ្តោយស្នាមប្រេះ នៃស្រទាប់ដីតំបន់ប៉ាស៊ីហ្វិក។ ករណីរញ្ជួយដី តែងតែកើតមានជាញឹកញាប់នៅក្នុងតំបន់នេះ។ កាលពីឆ្នាំ២០១៣ ករណីរញ្ជួយដី កម្រិត៧,១រិចទឺរ នៅកោះ Bohol ភាគកណ្តាលហ្វីលីពីន បានបណ្ដាលឲ្យស្លាប់មនុស្សជាង២០០នាក់ និងប្រមាណ៤សែននាក់ ត្រូវភៀសខ្លួនចោលផ្ទះសម្បែង។ ហើយនៅឆ្នាំ១៩៩០ ករណីរញ្ជួយដីមួយទៀត កម្រិត ៧,៨រិចទឺរ បានបណ្តាលឲ្យមានស្នាមប្រេះដី ប្រវែងដល់ទៅជាង១០០គីឡូម៉ែត្រ និងបានបណ្តាលឲ្យស្លាប់មនុស្ស ប្រមាណ១២០០នាក់ នៅភាគខាងជើងហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ