ប្រមុខសាសនាអ៊ីស្លាមតាលីបង់បានជំរុញឲ្យបស្ចិមលោកឈប់លូកដៃកកូរកកាយលើកិច្ចការផ្ទៃក្នុងអាហ្វហ្កានីស្ថាន
នៅក្នុងប្រទេសអាហ្វហ្កានីស្ថាន ក្រុមប្រឹក្សាសាសនាអ៊ីស្លាមបានបិទបញ្ចប់សម័យប្រជុំរយៈពេល ៣ថ្ងៃក្នុងថ្ងៃសៅរ៍ ទី២ កក្កដានៅទីក្រុងកាប៊ុល។ ថ្លែងនៅចំពោះមុខអ្នកចូលរួមប្រមាណជា ៣ ០០០នាក់ ប្រមុខសាសនាអ៊ីស្លាមតាលីបង់លោកហ៊ីបាទូឡា អាឃុនហ្សាដាបានវាយប្រហារចាស់ដៃលើការរិះគន់របស់បស្ចិមលោកចំពោះរបបតាលីបង់។ លោកហ៊ីបាទូឡា អាឃុនហ្សាដាបានជំរុញឲ្យបស្ចិមលោកឈប់ឈឺឆ្អាលលើកិច្ចការផ្ទៃក្នុងរបស់អាហ្វហ្កានីស្ថាន។ គួរបញ្ជាក់ថា តាំងពីជាង ១៥ឆ្នាំដែលប្រមុខសាសនាអ៊ីស្លាមតាលីបង់រូបនេះមិនបានបង្ហាញមុខជាសាធារណៈ។
ចុះផ្សាយនៅថ្ងៃ៖
ស្តាប់ - ០២:១២
« យើងនឹងមិនទទួលយកមេរៀនណាមួយជាដាច់ខាត។ ពួកគេបានប្រាប់យើងឲ្យធ្វើយ៉ាងនេះ ធ្វើយ៉ាងនោះ។ តែហេតុអ្វីបានជាពួកគេលូកដៃចូលកកូរកកាយកិច្ចការផ្ទៃក្នុងរបស់យើង។ យើងនឹងលត់ជង្គង់តែនៅមុខព្រះជាម្ចាស់ទេ » នេះជាការថ្លែងរបស់ប្រមុខសាសនាអ៊ីស្លាមតាលីបង់លោកហ៊ីបាទូឡា អាឃុនហ្សាដា។ ពាក្យ « ពួកគេ » គឺលោកហ៊ីបាទូឡា អាឃុនហ្សាដាចង់សំដៅលើក្រុមបស្ចិមប្រទេស។ ទន្ទឹមគ្នានេះ លោកហ៊ីបាទូឡា អាឃុនហ្សាដាមិនភ្លេចលើកឡើងពីអំពើពុករលួយ អាត្មានិយម ការសង្កត់សង្កិន ជាតិនិយម និងបក្ខពួកនិយមដែលប្រព្រឹត្តិដោយរដ្ឋាភិបាលអាហ្វហ្កានីស្ថានមុនៗតាំងពី ២០ឆ្នាំកន្លងទៅ។
ដើម្បីបោសសំអាតរឿងអតីតកាល ប្រមុខសាសនាអ៊ីស្លាមតាលីបង់រូបនេះបានសំឡឹងឃើញផ្លូវតែមួយគត់ គឺការអនុវត្តន៍ច្បាប់អ៊ីស្លាមឡាឆារីយ៉ា (La charia)។ តាមលោកហ៊ីបាទូឡា អាឃុនហ្សាដា ឡាឆារីយ៉ានាំមកនូវសន្តិសុខ និងសេរីភាព រួមទាំងអ្វីៗគ្រប់យ៉ាងដែលអាហ្វហ្កានីស្ថានត្រូវការ។ អ្វីជាការកត់សម្គាល់ នៅក្នុងសុន្ទរកថារយៈពេលប្រមាណ ១ម៉ោង លោកហ៊ីបាទូឡា អាឃុនហ្សាដាមិនបាននិយាយពីសិទ្ធិស្រ្តីនៅអាហ្វហ្កានីស្ថានសូម្បីតែមួយម៉ាត់។ ផ្ទុយទៅវិញ លោកបានព្រមានបស្ចិមលោកពីការមិនអាចមានការផ្សះផ្សារវាងអ៊ីស្លាម និងអ្នកមិនស្មោះត្រង់ទេ។
« រឿងនេះមិនធ្លាប់មាននៅក្នុងអតីតកាល ហើយក៏នឹងគ្មាននៅពេលនេះដែរ » នេះជាការបញ្ជាក់របស់លោកហ៊ីបាទូឡា អាឃុនហ្សាដា។ គួរបញ្ជាក់ថា នៅមួយថ្ងៃមុនការថ្លែងរបស់ប្រមុខសាសនាអ៊ីស្លាមតាលីបង់រូបនេះ ឧត្តមស្នងការសិទ្ធិមនុស្សអន្តរជាតិលោកស្រីមីស្ហែល បាស្ហឺឡេបានជំរុញឲ្យពួកតាលីបង់យកគំរូតាមប្រទេសសាសនាអ៊ីស្លាមផ្សេងដែលលើកកម្ពស់សិទ្ធិស្រ្តី។ ការជំរុញរបស់លោកស្រីមីស្ហែល បាស្ហឺឡេបានធ្វើឡើង ក្រោយពីពួកតាលីបង់បានសម្រេចត្រឡប់ទៅបិទទ្វារវិទ្យាល័យ និងអនុវិទ្យាល័យសម្រាប់កូនសិស្សស្រីកាលពីដំណាច់ខែមីនា បន្ទាប់ពីបើកទ្វារឡើងវិញបានតែប៉ុន្មានម៉ោងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ