ឥណ្ឌាប្រឈមនឹងអំពើហិង្សាសាសនា រវាងសហគមន៍សាសនាហិណ្ឌូ និងអ៊ីស្លាម ដោយសារតែសម្តីរបស់អ្នកនាំពាក្យបក្សកាន់អំណាច
នៅទីក្រុងឧដៃពួរ ភាគខាងលិចប្រទេសឥណ្ឌា សមត្ថកិច្ចបានចេញបំរាមគោលចរ ហាមចេញដើរ បន្ទាប់ពីមានការភ័យខ្លាចផ្ទុះអំពើហិង្សា រវាងសហគមអ្នកកាន់សាសនាហិណ្ឌូ និងអ្នកកាន់សាសនាអ៊ីស្លាម។ រឿងរ៉ាវដែលបានផ្តើមចេញពី អំពើឃាតកម្មមួយផ្សាយផ្ទាល់តាមបណ្តាញសង្គម ដែលបុរសអ្នកកាន់សាសនាហិណ្ឌម្នាក់ ត្រូវអ្នកកាន់សាសនាអ៊ីស្លាម២នាក់សម្លាប់។ ជនរងគ្រោះ ត្រូវបានពួកឃាតករ ចោទថាបានគាំទ្រសម្តីរបស់អ្នកនាំពាក្យគណបក្សជាតិនិយមហិណ្ឌូ ដែលបាននិយាយប្រមាថព្រះអាឡា។
ចុះផ្សាយនៅថ្ងៃ៖
ស្តាប់ - ០២:២០
រូបភាពផ្សាយផ្ទាល់តាមអ៊ីនធ័រនែត បានរីកសាយភាយយ៉ាងឆាប់រហ័ស។ ឃាតករ២នាក់ បានចូលទៅសម្លាប់បុរសម្នាក់ជាជាងកាត់ដេរ ឈ្មោះ Kanhaiya Lal នៅក្នុងក្រុង Udaipur រដ្ឋRajasthan ភាគខាងលិចឥណ្ឌា។ នៅក្នុងវីដេអូផ្សាយផ្ទាល់ ឃាតករទាំង២ ដែលគេស្គាល់ថាជាអ្នកកាន់សាសនាអ៊ីស្លាម ទំនងជាកំពុងយកកាំបិត អារផ្តាច់បំពង់កជនរងគ្រោះ និងបានលើកកាំបិតស្រែកគំរាមថាចង់សម្លាប់លោកនាយករដ្ឋមន្ត្រី ណារិន្ទ្រ ម៉ូឌី។ ឃាតករទាំង២បានអះអាងថា ខ្លួនសម្លាប់ជនហិណ្ឌូរូបនេះ ក៏ដោយសារតែជននេះ បានគាំទ្រចំពោះសម្តីរបស់ស្ត្រីអ្នកនាំពាក្យ គណបក្ស Bharatiya Janata Party (BJP) ដែលបាននិយាយប្រមាថមកលើព្រះអាឡា។
ក្រោយហេតុការណ៍ឃាតកម្មបែបគំនុំសាសនានេះ មានអ្នកកាន់សាសនាហិណ្ឌូជាច្រើនពាន់នាក់ បានមកជួបជុំគ្នានៅម្តុំផ្ទះជនរងគ្រោះ និងបានចាប់ផ្តើមធ្វើបាតុកម្មជេរប្រមាថក្រុមអ្នកកាន់សាសនាអ៊ីស្លាម។ នៅតាមបណ្តាញសង្គម ក្រុមអ្នកនយោបាយហិណ្ឌូជាតិនិយមជ្រុល បានផ្សព្វផ្សាយសារ បន្ថែមធ្វើឲ្យផ្ទុះជម្លោះសាសនា។
ដោយខ្លាចក្រែងផ្ទុះហិង្សាទ្រង់ទ្រាយធំ អាជ្ញាធរឥណ្ឌានៅរដ្ឋ Rajasthan បានចេញបញ្ជាដាក់បំរាមគោលចរ នៅទីក្រុងឧដៃពួរទាំងមូល។ ការជួបជុំចាប់ពី៣នាក់ទៅ ត្រូវហាមឃាត់។ កងសមត្ថកិច្ចប្រមាណ៦០០នាក់ត្រូវបានដាក់ពង្រាយការពារសន្តិសុខ។ បណ្តាញអ៊ីនធ័រនិតលើទូរស័ព្ទ ត្រូវបានកាត់ផ្តាច់ ដើម្បីរារាំងកុំឲ្យមនុស្ស ចែកចាយព័ត៌មានបំផុតបំផុតឲ្យផ្ទុះរឿងកាន់តែធំ។
គួរបញ្ជាក់ថា ភាគខាងលិចឥណ្ឌ តែងតែជាទីលាននៃជម្លោះហិង្សា រវាងអ្នកកាន់សាសនាអ៊ីស្លាម និងអ្នកកាន់សាសនាហិណ្ឌូ។ ភាពតានតឹងដែលមានកម្រិតកាន់តែធំ ជាមួយនឹងរដ្ឋាភិបាលដឹកនាំគណបក្សរបស់លោកណារិន្ទ្រម៉ូឌី ដែលជាបក្សហិណ្ឌូជាតិនិយមជ្រុល។ យ៉ាងណាមិញ កាលពីចុងខែឧសភា ស្ត្រីអ្នកនាំពាក្យម្នាក់របស់គណបក្សលោកណារិន្ទ្រម៉ូឌី ឈ្មោះ Nupur Sharma បាននិយាយរិះគន់ទៅលើទំនាក់ស្នេហា រវាងព្រះអាឡា ជាមួយនិងភរិយាវ័យក្មេងចុងក្រោយគេ ឈ្មោះAïcha។ សម្តីរិះគន់ ដែលបានធ្វើឲ្យផ្ទុះបាតុកម្មហិង្សាជាច្រើនថ្ងៃមកហើយ នៅតាមតំបន់ខ្លះក្នុងប្រទេសឥណ្ឌា។ ស្ត្រីអ្នកនាំពាក្យរូបនេះ ត្រូវបានបណ្តេញចេញពីបក្ស តែអង្ករក្លាយជាបាយ មានប្រទេសកាន់សាសនាអ៊ីស្លាមជាង២០ប្រទេស បានកោះហៅអគ្គរដ្ឋទូតឥណ្ឌាទៅសាកសួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ