ជាប់ទណ្ឌកម្មបស្ចិមលោក រុស្ស៊ីបង្ហូរប្រេងលក់ឱ្យចិនយ៉ាងគំហុក
បើតាមតួលេខផ្លូវការចេញផ្សាយនៅថ្ងៃចន្ទទី ២០មិថុនា ២០២២ ចិនបាននាំចូលប្រេងពីរុស្ស៊ី ក្នុងបរិមាណដ៏ច្រើនលើសលុបកាលពីខែឧសភា និងក្នុងបរិមាណច្រើនជាង ការនាំចូលប្រេងមកពីប្រទេសអារ៉ាប៊ីសាអូឌីត ដែលធ្លាប់ជាម៉ូយផ្គត់ផ្គង់ដ៏ចំបងទៅទៀត។ លំហូរប្រេងទៅចិន បានជួយរុស្ស៊ីឱ្យគេចរួចពីឥទ្ធិពលនៃទណ្ឌកម្មរបស់ក្រុមលោកខាងលិច។
ចុះផ្សាយនៅថ្ងៃ៖
ស្តាប់ - ០២:០៣
ប្រឈមនឹងសង្គ្រាមឈ្លានពាននៅអ៊ុយក្រែន ក្រុមបស្ចិមលោកដាក់ទណ្ឌកម្មយ៉ាងធ្ងន់ធ្ងរលើរុស្ស៊ី និងបានកាត់បន្ថយការនាំចូលប្រេងពីរុស្ស៊ីជាលំដាប់។ ក្រុមប្រទេសលោកខាងលិចថែមទាំងព្រមានជាញឹកញយ មិនឱ្យប៉េកាំងជួយរដ្ឋាភិបាលរបស់លោកពូទីនទេ។ ប៉ុន្តែ ម៉ូស្គូនៅតែអាចរំពឹងលើមហាអំណាចចិនបាន ដើម្បីអាចដើរចេញពីភាពឯកាសេដ្ឋកិច្ច។
កាលពីខែឧសភា២០២២ ចិនបាននាំចូលប្រេងពីរុស្ស៊ី ក្នុងបរិមាណដល់ទៅ៨,៤២លានតោន ទល់នឹង៥,៤លានតោនកាលពីឆ្នាំទៅក្នុងរយៈពេលដូចគ្នា ពោលគឺមានកំណើនដល់ទៅ៥៥% និងច្រើនជាងការនាំចូលប្រេងមកពីប្រទេសអារ៉ាប៊ីសាអូឌីត (៧,៨២លានតោន) ដែលធ្លាប់ជាប្រទេសនាំចូលប្រេងលេខមួយរបស់ចិនទៅទៀត។ មិនតែប៉ុណ្ណោះ ចិនបានដំឡើងការទិញឧស្ម័នធម្មជាតិរាវពីរុស្ស៊ី ច្រើនគួរកត់សម្គាល់ដែរ ក្នុងកំរិត៥៤%ក្នុងមួយឆ្នាំកាលពីខែឧសភាដដែល។ នេះបើតាមតួលេខរបស់ការិយាល័យពន្ធដារចិន ដោយបញ្ជាក់ទៀតថា ការនាំចូលផលិតផលពីរុស្ស៊ីបានកើនឡើងជាទូទៅ និងជាសរុប ៨០%ក្នុងរយៈមួយឆ្នាំ សម្រាប់ខែឧសភាកន្លងទៅ។
ប៉េកាំងគឺជាដៃគូសេដ្ឋកិច្ចដ៏ចំបងរបស់រុស្ស៊ី។ ហើយកាលពីថ្ងៃពុធសប្តាហ៍មុន ក្នុងឱកាសជជែកគ្នាតាមទូរស័ព្ទជាមួយប្រធានាធិបតីពូទីន លោកប្រធានាធិបតី ស៊ីជីនពីង បានបញ្ជាក់ជាថ្មីថាចិននិងរុស្ស៊ីខិតចូលគ្នាកាន់តែស្និទ្ធ។ ប្រមុខដឹកនាំកុម្មុយនិស្តចិន បានថែមទាំងចាត់ទុកលោកពូទីន ជាមិត្តចាស់ និងបានជួបពិភាក្សាគ្នាដោយផ្ទាល់មិនតិចជាង៣០ដងទេ គិតចាប់តាំងពីលោកបានឡើងកាន់អំណាចនៅឆ្នាំ២០១២មក។ ប្រមុខដឹកនាំទាំងពីរបានជួបគ្នាដោយផ្ទាល់ជាលើកចុងក្រោយ កាលពីខែកុម្ភៈ បីសប្តាហ៍មុនការផ្ទុះសង្គ្រាមនៅអ៊ុយក្រែន។
បើតាមរបាយការណ៍របស់ទីភ្នាក់ងារថាមពលអន្តរជាតិចេញផ្សាយកាលពីសប្តាហ៍មុន ការនាំចេញប្រេងរបស់រុស្ស៊ីទៅបស្ចិមលោកបានធ្លាក់ចុះយ៉ាងខ្លាំង និងបន្តធ្លាក់ចុះទៀតនៅខែឧសភា តែត្រូវបានបង្គប់មកវិញដោយការនាំចេញទៅចិននិងទៅឥណ្ឌា ព្រមទាំងបណ្តាប្រទេសមួយចំនួននៅអាស៊ី ក្នុងទំហំ០,១លានធុងបារីលក្នុងមួយថ្ងៃ កាលពីខែកុម្ភៈ២០២២ ទៅ ០,៩លានធុងនៅខែឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ