ចិនបង្ហាញនាវាផ្ទុកយន្តហោះទំនើបទី៣ នៅចំពេលដែលកំពុងតានតឹងជាមួយអាមេរិកនិងតៃវ៉ាន់
នៅក្នុងកាលៈទេសៈដែលកំពុងកើតមានភាពតានតឹងនៅច្រកសមុទ្រតៃវ៉ាន់ ប្រទេសចិនបានបង្ហាញនាវាដឹកយន្តហោះដ៏ធំទំនើបទីបីរបស់ខ្លួន នៅថ្ងៃសុក្រនេះ នៅក្នុងពិធីសម្ពោធដាក់ឲ្យដំណើរការ នៅការដ្ឋានសាងសង់ជើងទឹក នៅទីក្រុងសៀងហៃ។ ចិនមាននាវាដឹកយន្តហោះសរុប ចំនួន៣គ្រឿង ប៉ុន្តែ ហ្វូជៀន ជានាវាផ្ទុកយន្តហោះធំ ទី២ ដែលចិនមានសមត្ថភាព សាងសង់ផលិតដោយខ្លួនទាំងស្រុង។
ចុះផ្សាយនៅថ្ងៃ៖
ស្តាប់ - ០២:៣៩
ដូចនាវាដឹកយន្តហោះចម្បាំង២មុនៗ ដែលយកឈ្មោះតាមខេត្ត របស់ចិន គឺស្ហានតុង និងលីវនីង នាវាដឹកយន្តហោះធំទី៣ដែលចិនបានកសាងឡើងក្នុងស្រុក ដោយដៃឯង មានឈ្មោះ ហ្វូជៀន ឈ្មោះរបស់ខេត្តចិន ដែលស្ថិតនៅទល់មុខនឹងកោះតៃវ៉ាន់។
ទីភ្នាក់ងារព័ត៌មានរដ្ឋចិន Chine nouvelle មិនបានបញ្ជាក់កាលបរិច្ឆេទនៃការដាក់ឲ្យប្រើប្រាស់ជាផ្លូវការ នាវាដឹកយន្តហោះហ្វូជៀន ប៉ុន្តែ គេរំពឹងថា នៅក្រោយការធ្វើតេស្តសាកល្បង ជាច្រើនដង កងទ័ពជើងទឹកចិននឹងអាចប្រើប្រាស់នាវាចម្បាំង ហ្វូជៀន នៅក្នុងប្រតិបត្តិការរបស់ខ្លួន នៅប៉ុន្មានឆ្នាំខាងមុខ។
សម្រាប់អ្នកជំនាញមកពីសកលវិទ្យាល័យសិង្ហបុរី លោកCollin Koh នៅក្នុងនយោបាយផ្ទៃក្នុងចិន នាវាដឹកយន្តហោះហ្វូជៀនជាមោទភាពជាតិ។ វាជានិមិត្តរូបនៃកម្លាំងអំណាចរបស់ចិន និងបញ្ជាក់សារនយោបាយរបស់បក្សកុម្មុយនិស្តចិន ដែលបានសន្យារុញច្រានឲ្យចិនវិលត្រលប់ទៅធ្វើជាមហាអំណាចឡើងវិញ នៅក្រោយ ធ្លាក់ចុះខ្សោយអស់ប៉ុន្មានទសវត្សរ៍។
នាវាដឹកយន្តហោះចម្បាំងថ្មីនឹងជួយធានាសន្តិសុខ ឲ្យផលប្រយោជន៍សេដ្ឋកិច្ច ដែលចិនបានពង្រីក នៅទឹកដីបរទេស។ ម្យ៉ាង វាក៏ជាសាររបស់ចិន សម្រាប់បញ្ជាក់ទៅមហាអំណាចអាមេរិក ដែលចេញមុខការពារកោះតៃវ៉ាន់ ដែលចិនចាត់ទុកជាដីខេត្ត និងគំរាមវាយចូលកាន់កាប់ បើសិនតៃវ៉ាន់ប្រកាសឯករាជ្យ។
នៅបរទេស នាវាដឹកយន្តហោះហ្វូជៀន របស់ចិន ក៏មិនស្ថិតក្នុងក្រសែភ្នែកល្អរបស់ប្រទេសជិតខាង ដូចជាជប៉ុន ហ្វីលីពីន វៀតណាមដែរ។ ប្រទេសទាំងនេះកំពុងជាប់ជម្លោះដណ្តើមដែនទឹកសមុទ្រជាមួយចិន នៅក្នុងតំបន់។ អាចថា ដោយបង្កើនចំនួននាវាដឹកយន្តហោះចម្បាំងដល់ទៅ៣គ្រឿង ចិនមានបំណងសំញ៉ែង ធ្វើឲ្យគេបាក់ខ្លបខ្លាចខ្លួនជាមុន និងយ៉ាងហោចមាននាវាផ្ទុកយន្តហោះចម្បាំង ដែលអាចមានសមត្ថភាព ចេញទៅធ្វើប្រតិបត្តិការឆ្ងាយៗ ក្នុងកាលៈទេសៈសង្រ្គាម។
នាវាដឹកយន្តហោះហ្វូជៀនស្តែងឲ្យឃើញបច្ចេកវិទ្យាកាន់តែទំនើបរបស់ចិន ព្រោះថា ខុសពីនាវាដឹកយន្តហោះពីរមុន នាវាដឹកយន្តហោះ ហ្វូជៀនមានបំពាក់ដោយប្រព័ន្ធសម្រាប់ទាញ ពន្លឿនការហោះចេញដំណើររបស់យន្តហោះ។ ប្រព័ន្ធដ៏ទំនើបថ្មីនេះនឹងអនុញ្ញាតឲ្យនាវាហ្វូជៀនមានសមត្ថភាពទទួលដឹកយន្តហោះច្រើនប្រភេទ ហើយយន្តហោះចម្បាំងផ្ទាល់ក៏មានឱកាសចូលមកដឹកបានច្រើន ជាពិសេស គ្រឿងសព្វាវុធ។
នៅមុនអាចផលិតនាវាដឹកយន្តហោះដោយខ្លួនឯង ដល់ទៅ២គ្រឿង ចិនធ្លាប់បានទិញនាវាចម្បាំងរបស់ អ៊ុយក្រែន ផលិតឡើងក្នុងសម័យសហភាពសូវៀត ដើម្បីយកមកកែច្នៃ ចេញជានាវាដឹកយន្តហោះលើកដំបូង របស់ខ្លួន ដោយដាក់ឈ្មោះថា លីវនាង។ ដាក់ឲ្យដំណើរការនៅឆ្នាំ ២០១២ នាវាផ្ទុកយន្តហោះ លីវនីងត្រូវបានគេប្រើភាគច្រើនជាកន្លែងសម្រាប់ការហ្វឹកហាត់របស់កងទ័ព។
ដោយមាននាវាដឹកយន្តហោះ៣គ្រឿង ចិន ស្ថិតនៅចំណាត់ថ្នាក់លេខ២ បន្ទាប់ពីអាមេរិក ដែលមាននាវាផ្ទុកយន្តហោះ សរុប ១១គ្រឿង។ ប៉ុន្តែ ចិនស្ថិតនៅមុខអង់គ្លេស ដែលមាន២គ្រឿង និងនៅមុខបារាំង រុស្ស៊ី អ៊ីតាលី ឥណ្ឌា និងថៃ ដែលមាននាវាដឹកយន្តហោះ តែមួយគ្រឿងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ