ចិនប្រកាសផ្តល់រង្វាន់ជាលុយដល់អ្នកណាដែលផ្តល់ដំណឹងទាក់ទងនឹងសន្តិសុខជាតិ
អាជ្ញាធរចិនប្រកាសផ្តល់រង្វាន់ជាលុយរហូតដល់ទៅប្រមាណជា ១ម៉ឺន៥ពាន់ដុល្លារ ដល់អ្នកដែលផ្តល់ព័ត៌មានដល់សមត្ថកិច្ច ជុំវិញសកម្មភាពដែលគំរាមកំហែងដល់សន្តិសុខជាតិ។ នេះបើយោងតាមការផ្សាយរបស់បណ្តាញផ្សព្វផ្សាយរដ្ឋ កាលពីថ្ងៃអង្គារ ដោយដកស្រង់ប្រភពចេញពីក្រសួងសន្តិសុខជាតិ។
ចុះផ្សាយនៅថ្ងៃ៖
រង្វាន់គិតជាទឹកប្រាក់ក្នុងចន្លោះពីជាង ៦០០ដុល្លារ ទៅ ១ម៉ឺន៥ពាន់ដុល្លារ នឹងត្រូវប្រគល់ទៅឲ្យអ្នកណា ដែលផ្តល់ព័ត៌មានដល់អាជ្ញាធរ ហើយដែលនាំទៅដល់ការចាប់ខ្លួន ឬផ្តន្ទាទោស អ្នកដែលប្រព្រឹត្តសកម្មភាព ប៉ះពាល់ធ្ងន់ធ្ងរទៅដល់សន្តិសុខជាតិ។ នៅក្នុងករណីពិសេសខ្លះ រង្វាន់អាចនឹងបានលើសពី ១ម៉ឺន៥ពាន់ដុល្លារនេះទៅទៀត ចំពោះអ្នកដែលបានផ្តល់ព័ត៌មាន និងដើរតួនាទីរឹតតែសំខាន់ នៅក្នុងការបង្ក្រាបសកម្មភាពដែលគំរាមកំហែងដល់សន្តិសុខជាតិ។
គួរបញ្ជាក់ថា ការផ្តល់រង្វាន់ដល់សាធារណជន ដែលជួយក្នុងកិច្ចការសន្តិសុខជាតិបែបនេះ មិនមែនជារឿងថ្មីនោះទេ នៅក្នុងប្រទេសចិន។ ការអនុវត្តបែបនេះធ្លាប់មានជារឿយៗរួចមកហើយ នៅក្នុងរយៈពេលប៉ុន្មានឆ្នាំកន្លងទៅនេះ ក៏ប៉ុន្តែ សេចក្តីសម្រេចចេញពីក្រសួងសន្តិសុខជាតិនៅពេលនេះ ទំនងជាធ្វើឡើង ដើម្បីជំរុញឲ្យការអនុវត្តនេះត្រូវបានធ្វើដោយផ្លូវការ និងឲ្យបានកាន់តែទូលំទូលាយជាងមុន។
យោងតាមក្រសួងសន្តិសុខជាតិចិន ដែលដកស្រង់ដោយកាសែតផ្លូវការ ឈ្មោះ Legal Daily ការប្រកាសផ្តល់រង្វាន់នេះ ធ្វើឡើងក្នុងគោលដៅ លើកទឹកចិត្តឲ្យសាធារណជនទូទៅ ឲ្យចូលរួមយ៉ាងសកម្ម ជួយអាជ្ញាធរ ក្នុងកិច្ចការរក្សាការពារសន្តិសុខជាតិ។
កិច្ចការពារសន្តិសុខជាតិ ដែលជាទូទៅ អាជ្ញាធរក្រុងប៉េកាំងចង់សំដៅលើការប្រឆាំងនឹងចារកិច្ច ក៏ដូចជា ប្រឆាំងនឹងឥទ្ធិពលបរទេសមកលើប្រទេសចិន។ ក៏ប៉ុន្តែ នៅចិន បទល្មើសទាក់ទងនឹងសន្តិសុខជាតិនេះ គឺមានលក្ខណៈទូលំទូលាយខ្លាំង ដោយក្នុងករណីខ្លះ ការចោទប្រកាន់ពីបទល្មើសប៉ះពាល់សន្តិសុខជាតិ ត្រូវបានអាជ្ញាធរក្រុងប៉េកាំងយកមកប្រើប្រាស់ ដើម្បីបង្ក្រាបសកម្មជនប្រឆាំង សកម្មជនសិទ្ធិមនុស្ស ឬក៏ប្រើទៅលើពលរដ្ឋបរទេស ដើម្បីជាសម្ពាធ នៅក្នុងករណីមានភាពតានតឹងផ្នែកការទូតជាមួយនឹងប្រទេសណាមួយក៏មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ