អ.ស.ប.៖ វិបត្តិបច្ចុប្បន្នមិនគួរនាំឲ្យពិភពលោកបង្វែរអាទិភាពពីបញ្ហាអាកាសធាតុ
មន្រ្តីអង្គការសហប្រជាជាតិទទួលបន្ទុកកិច្ចការអាកាសធាតុ បានអំពាវនាវកាលពីថ្ងៃចន្ទថា បើទោះបីជាពិភពលោកកំពុងឆ្លងកាត់នូវវិបត្តិ ក្នុងពេលបច្ចុប្បន្ននេះ ក៏ប៉ុន្តែ គ្រប់ប្រទេសទាំងអស់ ត្រូវបន្តផ្តល់អាទិភាពដល់ការដាក់ចេញនូវនយោបាយ ទប់ស្កាត់ការប្រែប្រួលអាកាសធាតុ ពីព្រោះថា បញ្ហាអាកាសធាតុនេះ គឺជាបញ្ហាចម្បង និងបន្ទាន់ ដែលមិនអាចចេះតែពន្យារពេលតទៅទៀតបាននោះទេ។
ចុះផ្សាយនៅថ្ងៃ៖
ស្តាប់ - ០២:២០
ការអំពាវនាវត្រូវបានធ្វើឡើងដោយលោកស្រី ប៉ាទ្រីស្យា អេស្ពីណូសា (Patricia Espinosa) ប្រធានលេខាធិការដ្ឋាននៃអនុសញ្ញាអ.ស.ប.ស្តីពីការប្រែប្រួលអាកាសធាតុ នៅក្នុងកិច្ចប្រជុំតំណាងប្រទេសហត្ថលេខី នៅក្នុងទីក្រុងបូន ប្រទេសអាល្លឺម៉ង់ ដើម្បីពិនិត្យមើលឡើងវិញ នូវការអនុវត្តគោលដៅ ដែលបានដាក់ចេញ នៅក្នុងអំឡុងសន្និសីទអាកាសធាតុ នៅទីក្រុងក្លាសហ្គោ កាលពីឆ្នាំទៅមិញ។
នៅក្នុងអំឡុងសន្និសីទនោះ សហគមន៍អន្តរជាតិបានបញ្ជាក់សាជាថ្មី អំពីគោលដៅ ទប់ស្កាត់ការឡើងកម្តៅផែនដី មិនឲ្យលើសពី ១,៥អង្សា។ ក៏ប៉ុន្តែ ចាប់ពីពេលនោះមក ពិភពលោក ដែលទើបនឹងចាប់ផ្តើមងើបចេញពីវិបត្តិកូវីដបានបន្តិច ក៏ត្រូវធ្លាក់ចូលទៅក្នុងវិបត្តិដ៏ធ្ងន់ធ្ងរមួយទៀត គឺសង្រ្គាមនៅអ៊ុយក្រែន ដែលកំពុងតែបង្កនូវផលវិបាកយ៉ាងធ្ងន់ធ្ងរទៅដល់ទីផ្សារថាមពល និងស្បៀងអាហារ បូករួមជាមួយនឹងបញ្ហាអតិផរណា ដែលកើតមានស្ទើរតែគ្រប់ទីកន្លែង។ ទាំងនេះកំពុងតែធ្វើឲ្យពិភពលោកទាំងមូលត្រូវវក់វីនឹងវិបត្តិ បង្វែរអាទិភាពចេញពីបញ្ហាអាកាសធាតុ។
ជាក់ស្តែង ៦ខែក្រោយសន្និសីទក្រុងក្លាសហ្គោ ប្រទេសសមាជិកនៅមិនទាន់ដាក់ចេញនូវនយោបាយជាក់ស្តែង និងច្បាស់លាស់នៅឡើយ ដើម្បីបំពេញទៅតាមគោលដៅ ដែលបានសន្យា ក្នុងពេលដែលសន្និសីទឆ្នាំថ្មី ក៏កាន់តែខិតជិតចូលមកដល់ គឺសន្និសីទអាកាសធាតុលើកទី ២៧ (COP27) ដែលគ្រោងធ្វើនៅក្នុងប្រទេសអេហ្ស៊ីប នៅដើមខែវិច្ឆិកាខាងមុខ។
សម្រាប់លោកស្រី ប៉ាទ្រីស្យា អេស្ពីណូសា ជាការពិតណាស់ថា ពិភពលោកកំពុងឆ្លងកាត់នូវបញ្ហាស្មុគស្មាញច្រើន ក៏ប៉ុន្តែ វិបត្តិអស់ទាំងនេះមិនត្រូវក្លាយជាហេតុផល ឬជាលេស ដើម្បីទុកបញ្ហាអាកាសធាតុមួយឡែកសិននោះទេ ពីព្រោះថា ការទប់ស្កាត់ការឡើងកម្តៅផែនដី គឺជាចំណាត់ការចាំបាច់ និងបន្ទាន់ ដែលយើងមិនអាចពន្យារពេលទៅថ្ងៃក្រោយបាននោះទេ។
យោងតាមរបាយការណ៍ថ្មីចុងក្រោយរបស់ក្រុមអ្នកជំនាញអាកាសធាតុរបស់អ.ស.ប នៅក្នុងពេលបច្ចុប្បន្ននេះ ភពផែនដីបានឡើងកម្តៅរហូតដល់ទៅ ១,១អង្សារួចទៅហើយ បើធៀបនឹងកាលពីមុនបដិវត្តន៍ឧស្សាហកម្ម ហើយប្រសិនបើមនុស្សយើងបន្តធ្វើអ្វីៗ ដូចជាពេលបច្ចុប្បន្ននេះ ភពផែនដីនឹងត្រូវឡើងកម្តៅរហូតដល់ទៅជិត ៣អង្សាឯណោះ នៅត្រឹមឆ្នាំ២១០០ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ