ប៉ាស៊ីហ្វិកខាងត្បូង៖បន្ទាប់ពីកោះសាឡូម៉ុង ចិនបានចុះហត្ថលេខាលើកិច្ចព្រមព្រៀងជាមួយកោះសាម័រ
នៅថ្ងៃសៅរ៍ ទី២៨ ឧសភា ប្រទេសចិន និងកោះសាម័របានចុះហត្ថលេខាលើកិច្ចព្រមព្រៀងមួយដើម្បីឆ្ពោះទៅមានកិច្ចសហប្រតិបត្តិការទ្រង់ទ្រាយធំ។ ពិធីចុះហត្ថលេខាបានធ្វើឡើង ខណៈដែលប្រមុខការទូតចិនលោកវ៉ាង យីកំពុងបំពេញទស្សនកិច្ចនៅក្នុងតំបន់ប៉ាស៊ីហ្វិកខាងត្បូង។ គួររម្លឹកថា កិច្ចព្រមព្រៀងស្រដៀងគ្នានេះត្រូវបានចិនចុះហត្ថលេខាជាមួយកោះសាឡូម៉ុងនាពេលថ្មីៗកន្លងទៅ។ ការពង្រីកឥទ្ធិពលរបស់ចិននៅក្នុងតំបន់កំពុងបង្កឲ្យមានក្តីបារម្ភពីអូស្រា្តលី និងអាមេរិក។
ចុះផ្សាយនៅថ្ងៃ៖
ស្តាប់ - ០២:១៩
សេចក្តីលំអិតនៅក្នុងសេចក្តីព្រាងកិច្ចព្រមព្រៀងដែលភាគីចិន និងភាគីកោះសាម័របានចុះហត្ថលេខាមិនត្រូវបានប្រាប់ឲ្យដឹងជាផ្លូវការទេ។ តែមានព័ត៌មានបែកធ្លាយថា សេចក្តីព្រាងកិច្ចព្រមព្រៀងបានផ្តោតសំខាន់លើកិច្ចសហប្រតិបត្តិការទ្រង់ទ្រាយធំនៅក្នុងវិស័យសេដ្ឋកិច្ច និងសន្តិសុខ។ ចំណែករដ្ឋាភិបាលកោះសាម័របានបញ្ជាក់នៅក្នុងសេចក្តីប្រកាសព័ត៌មានថា រដ្ឋមន្រ្តីការបរទេសចិនលោកវ៉ាង យី និងនាយករដ្ឋមន្រ្តីកោះសាម័រលោកស្រីហ្វីយ៉ាមេ ណាអូមី ម៉ាតាហ្វាបានជួបគ្នាដើម្បីជជែកពីការប្រែប្រួលអាកាសធាតុ ជំងឺឆ្លង និងសន្តិសុខ។
តាមសេចក្តីប្រកាសព័ត៌មានដដែល ចិននឹងបន្តផ្តល់ជំនួយសម្រាប់ការអភិវឌ្ឍន៍ហេដ្ឋារចនាសម្ព័ន្ធ ហើយក្របខណ្ឌថ្មីមួយនឹងត្រូវរៀបចំដើម្បីកំណត់នូវគម្រោងមួយចំនួននាពេលអនាគត។ ទន្ទឹមគ្នានេះ សេចក្តីប្រកាសព័ត៌មានក៏បានបន្ថែមថា ចិន និងកោះសាម័រនឹងបន្តស្វែងរកកិច្ចសហប្រតិបត្តិការបន្ថែមទៀតដើម្បីឈានទៅសម្រេចឲ្យបាននូវផលប្រយោជន៍ និងការសន្យារួម។ គួរបញ្ជាក់ថា ការចុះហត្ថលេខាលើកិច្ចព្រមព្រៀងរវាងចិន និងកោះសាម័របានធ្វើឡើងនាឱកាសទស្សនកិច្ចក្នុងតំបន់របស់គណៈប្រតិភូចិន។
មុននឹងទៅដល់កោះសាម័រនាយប់ថ្ងៃសុក្រ ទី២៧ ឧសភា គណៈប្រតិភូចិនបានធ្វើដំណើរទៅកោះសាឡូម៉ុង និងកោះគីរីបាទី។ នៅរសៀលថ្ងៃសៅរ៍ ទី២៨ ឧសភា គណៈប្រតិភូចិនដដែលនឹងបន្តដំណើរទៅកាន់ប្រទេសហ៊្វីជី តុងហ្កា ប៉ាពូអាស៊ីនូវែលហ្គីណេ និងប្រទេសទីម័រខាងកើត។ អ្វីជាការកត់សម្គាល់ ការពង្រីកឥទ្ធិពលរបស់ចិននៅក្នុងតំបន់ប៉ាស៊ីហ្វិកខាងត្បូងមិនបានធ្វើឲ្យប្រទេសគូប្រជែងផ្សេងក្នុងតំបន់ឈរឱបដៃមើលទេ ពិសេសអូស្រា្តលី។ ប្រមុខការទូតអូស្រា្តលីលោកស្រី Penny Wong ដែលបានធ្វើដំណើរទៅកាន់ប្រទេសហ៊្វីជីបានថ្លែងពីក្តីបារម្ភទាក់ទងនឹងកិច្ចព្រមព្រៀងសន្តិសុខរវាងចិន និងកោះសាម័រ។
លោកស្រី Penny Wong យល់ថា កិច្ចព្រមព្រៀងសន្តិសុខដែលចិនបានចុះហត្ថលេខាជាមួយកោះមួយចំនួននៅប៉ាស៊ីហ្វិកមានបង្កប់ដោយផលវិបាក និងថា វាសំខាន់ដែលសន្តិសុខរបស់តំបន់ត្រូវកំណត់ដោយតំបន់ខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ