លោកម៉ាកូសថានឹងមិនបណ្តោយឲ្យចិនជាន់ឈ្លីសិទ្ធិហ្វីលីពីននៅសមុទ្រចិនខាងត្បូង
លោក ហ្វ៊ែរឌីណង់ ម៉ាកូស ជូញ៉រ (Ferdinand Marcos Jr) ដែលទើបនឹងជាប់ឆ្នោតជាប្រធានាធិបតីហ្វីលីពីន បានអះអាង នៅថ្ងៃព្រហស្បតិ៍នេះថា លោកនឹងមិនបណ្តោយឲ្យចិនជាន់ឈ្លីសិទ្ធិរបស់ហ្វីលីពីន នៅក្នុងតំបន់សមុទ្រចិនខាងត្បូងនោះទេ ហើយថា ហ្វីលីពីននឹងអនុវត្តទៅតាមសេចក្តីសម្រេចរបស់តុលាការអន្តរជាតិ ដែលកាត់ឲ្យចិនចាញ់ក្តី នៅក្នុងជម្លោះនៅក្នុងសមុទ្រចិនខាងត្បូងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ថ្លែងក្នុងបទសម្ភាសន៍ជាមួយសារព័ត៌មានក្នុងស្រុក នៅថ្ងៃព្រហស្បតិ៍នេះ លោកហ្វ៊ែរឌីណង់ ម៉ាកូស ជូញ៉រ បានលើកឡើងថា តំបន់ជម្លោះរវាងហ្វីលីពីននិងចិន នៅសមុទ្រចិនខាងត្បូង វាលែងជាតំបន់ជាប់ជម្លោះទៀតហើយ តែវាជាទឹកដីរបស់ហ្វីលីពីនយ៉ាងពេញសិទ្ធិ ព្រោះថា តុលាការអន្តរជាតិបានកាត់សេចក្តីឲ្យហ្វីលីពីនឈ្នះចិនរួចទៅហើយ។
គួររំឭកឡើងវិញថា តុលាការអាជ្ញាកណ្តាលអន្តរជាតិ នៅទីក្រុងឡាអេ ដែលជាតុលាការមានដែនសមត្ថកិច្ចជំនុំជម្រះលើជម្លោះ ទាក់ទងនឹងអនុសញ្ញាអង្គការសហប្រជាជាតិស្តីពីដែនសមុទ្រ បានចេញសេចក្តីសម្រេច កាលពីឆ្នាំ២០១៦ ទៅតាមបណ្តឹងរបស់ហ្វីលីពីន កំណត់ថា ការទាមទាររបស់ចិន នៅក្នុងតំបន់សមុទ្រចិនខាងត្បូង ដោយយកកត្តាប្រវត្តិសាស្រ្តមកសំអាងនោះ គឺជាការទាមទារដោយគ្មានមូលដ្ឋានច្បាប់នោះទេ។
ក៏ប៉ុន្តែ កាលពីពេលកន្លងមក លោកឌុយទែរតេ បានសុខចិត្តទុកសេចក្តីសម្រេចរបស់តុលាការអន្តរជាតិនេះមួយឡែក ដើម្បីធ្វើយ៉ាងណាចង់សម្រុះសម្រួលទំនាក់ទំនងជាមួយចិន នៅក្នុងបរិបទនៃទំនាក់ទំនងដ៏តានតឹងជាមួយនឹងសហរដ្ឋអាមេរិក។
លោកហ្វ៊ែរឌីណង់ ម៉ាកូស ជូញ៉រ វិញ បានអះអាងថា ហ្វីលីពីននឹងអនុវត្តយ៉ាងខ្ជាប់ខ្ជួនទៅតាមសេចក្តីសម្រេចរបស់តុលាការអន្តរជាតិនេះ ដោយនឹងមិនទុកបណ្តោយឲ្យចិនរំលោភបំពាន សូម្បីតែ១មីលីម៉ែត្រ ទៅលើដែនដីរបស់ហ្វីលីពីននោះទេ។
ទោះជាយ៉ាងណា លោកក៏បានបញ្ជាក់ផងដែរថា បើទោះជាត្រូវប្រកាន់ជំហរតឹងរ៉ឹងជាមួយចិន ក៏ប៉ុន្តែ ហ្វីលីពីនចាំបាច់ត្រូវតែយកការចរចាជាដំណោះស្រាយ ដោយមិនអាចប្រថុយនឹងការផ្ទុះសង្រ្គាមជាមួយចិនបាននោះទេ។
សម្រាប់លោកម៉ាកូស ជូញ៉រ ហ្វីលីពីនគឺជាប្រទេសតូចមួយ ដែលស្ថិតនៅកណ្តាលការប្រជែងគ្នា រវាងប្រទេសមហាអំណាច ហើយថា ហ្វីលីពីនមិនគួរត្រូវបង្ខំឲ្យជ្រើសរើសយកខាងណាមួយ ដូចកាលពីសម័យសង្រ្គាមត្រជាក់នោះទេ ផ្ទុយទៅវិញ ហ្វីលីពីនគួរតែមានគោលនយោបាយការបរទេសឯករាជ្យផ្ទាល់ខ្លួនឯង ដែលអាចឲ្យហ្វីលីពីនរក្សាទំនាក់ទំនងល្អទាំងសងខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ