ក្រុមគ្រួសារនិងអ្នកស្និទ្ធនឹងលោកស្រីអ៊ុងសាន ស៊ូជី ដាក់ពាក្យប្តឹងទៅក្រុមអ្នកជំនាញនៃ អ.ស.ប.
ការចាប់ឃុំខ្លួនលោកស្រីអ៊ុងសាន ស៊ូជី គឺជា “អំពើចាប់ជំរិត ដោយប្រើប្រាស់ប្រព័ន្ធតុលាការ” របស់របបសិកភូមា។ នេះគឺជាការលើកឡើង របស់មេធាវី២នាក់ ដែលត្រូវបានកូនប្រុសរបស់លោកស្រី អ៊ុងសាន ស៊ូជី រួមជាមួយអ្នកស្និទ្ធនឹងលោកស្រី បានរួមគ្នាពឹងឲ្យជួយរៀបចំសំណុំឯកសារ ទៅកាន់ក្រុមការងារជំនាញនៃអង្គការសហប្រជាជាតិ។ យោងតាមមេធាវី របបសិកភូមាកំពុងតែចាប់បង្ឃាំងលោកស្រី អ៊ុងសាន ស៊ូជី ដោយខុសច្បាប់ ព្រមទាំងរំលោភសិទ្ធិមនុស្សធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:២៤
មេធាវីជំនាញសិទ្ធិមនុស្សចំនួន២នាក់ គឺលោក François Zimeray និងលោកស្រី Jessical Finelle បានដាក់សំណុំឯកសារ ទៅកាន់ក្រុមការងារពិសេស របស់អង្គការសហប្រជាជាតិ នៅថ្ងៃពុធទី២៥ឧសភា ដើម្បីតវ៉ាប្រឆាំងអំពីការចាប់ឃុំខ្លួនក្រៅប្រព័ន្ធច្បាប់ ដោយអយុត្តិធម៌ ដែលរបបសិកភូមា បានធ្វើទៅលើរូបលោកស្រីអ៊ុងសាន ស៊ូជី។
នៅក្នុងឯកសារនោះ មេធាវី ដែលតំណាងឲ្យកូនប្រុសរបស់លោកស្រីអ៊ុងសាន ស៊ូជី បានលើកឡើងថា លោកស្រី អ៊ុងសាន ស៊ូជី បច្ចុប្បន្នអាយុ៧៦ឆ្នាំ ត្រូវបានរបបសិកភូមា ចាប់ដាក់ឃុំនៅទីកន្លែងសំងាត់ តាំងតែពីថ្ងៃទី១កុម្ភៈ ឆ្នាំ២០២១ម្លេះ។ លោកស្រី ត្រូវបានគេដកហូតសិទ្ធិសេរីភាពទាំងស្រុង ហើយគ្មាននរណាម្នាក់ដឹងថាលោកស្រីនៅទីណា សុខទុក្ខយ៉ាងណាទេ។ គេអាចប្រទះឃើញលោកស្រី ម្តងម្កាល តែក្នុងពេលបើកសវនាការ កាត់ទោសលោកស្រីតែប៉ុណ្ណោះ។
មេធាវីទាំងពីរនាក់ បានសង្កត់ធ្ងន់ថា ការចាប់ឃុំខ្លួនលោកស្រីអ៊ុងសាន ស៊ូជី គឺត្រូវបានធ្វើឡើង ដោយខុសច្បាប់ទាំងស្រុង តាមរយៈបទចោទប្រកាន់ប្រឌិតស្រស់ៗ។ នៅពីក្រោយការចាប់ខ្លួនលោកស្រីអ៊ុងសាន ស៊ូជី គឺប្រជាជនភូមាមួយប្រទេសតែម្តង ដែលត្រូវបានរបបសិកដកហូតសេចក្តីសង្ឃឹម នៃពន្លឺលទ្ធិប្រជាធិបតេយ្យ និងសិទ្ធិសេរីភាព។
គួរបញ្ជាក់ថា ក្រុមការងារជំនាញរបស់អង្គការសហប្រជាជាតិ ដែលមេធាវីបានបញ្ជូនសំណុំឯកសារទៅនេះ គឺមានសមាជិកចំនួន៥នាក់។ លោក François Zimeray បានអះអាងថា ថ្វីបើក្រុមការងារនេះ មិនមានអំណាចយុត្តាធិការចាប់បង្ខំ ដូចតុលាការក៏ដោយចុះ តែអ្នកជំនាញទាំង៥ គឺជាអ្នកជំនាញបច្ចេកទេសសុទ្ធសាធ ដោយយកច្បាប់មកវែកញែក មិនពាក់ព័ន្ធនឹងបញ្ហានយោបាយទេ។ យោងតាមការអនុវត្តកន្លងមក ក្រុមការងារពិសេសនេះ អាចបញ្ជូនមនុស្សឲ្យចុះទៅស្រាវជ្រាវ អង្កេតផ្ទាល់ដល់ក្នុងប្រទេស ដើម្បីស្វែងយល់ជាក់ស្តែង ទាក់ទិននឹងករណី រំលោភសិទ្ធិជាមូលដ្ឋាន ព្រមទាំងករណីចាប់បង្ឃាំងមនុស្ស ក្រៅប្រព័ន្ធច្បាប់ជាដើម។
យោងតាមលោកមេធាវី François Zimeray ករណីលោកស្រីអ៊ុងសាន ស៊ូជី គឺវាសឹងតែជាករណី “បាត់ខ្លួនដោយបង្ខំ” ទៅហើយ។ ពោលគឺរបបសិកភូមា ប្រើប្រាស់ប្រព័ន្ធតុលាការ ដើម្បីចាប់លោកស្រីអ៊ុងសាន ស៊ូជី បង្ឃាំងទុក។ ជាមួយនឹងបទចោទប្រកាន់ប្រឌិតកុហក លោកស្រីអ៊ុងសាន ស៊ូជី អាចប្រឈមនឹងទោសជាប់ពន្ធនាគារ រាប់សិបឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ